27 مارچ نا شورانک
نوشت: کامران بلوچ
دی بلوچستان پوسٹ – براہوئی کالم
نن تینا زند اٹ بھاز آ ڈَول ئنا شورانک آتیتون مون پہ مون مرینہ، بھاز آ شورانک آتا وخت ئتون اوار علاج مریک و اوفک دُراخ مریرہ و بھاز آ شورانک آک دُراخ تو مریرہ ولے اوفتا ہمو نشانی ننا بدن آ سلیک، و بھازا شورانک آتے ننے تینٹ ہر وخت کرنڈوئی مریک کہ اونا ٹپ تازہ سلہ، ہرانا دڑد آن ننے ہمو دے و ہمو شورانک تروکا یات بریسہ کائے.
27 مارچ 1948ء آ ننا لمہ وطن بلوچستان اندنو شورانک ئسے نا گواچی مس، ہرانا ٹپ اینو اسکان دُراخ مننگ اَف. دا ہمو دے ءِ کہ ہرازدے زوراک آ کوزہ گیر پاکستان، بلوچستان نا خلق، گدان آتے و میری ءِ لتاڑسہ تینا ناپاک آ گام تے دا ڈغار آ تخا، دا ہمودے ءِ ہراڑان نسل ئسے تون بے دادی پوسکنو چِر اس بناء کرے. او وختا پاکستان تینا ودشت نا اولیکو سال ءِ ہم پورو کتویسُس کہ تینا زوراکی تا بناء ءِ کرے. انگریز سامراج نا چالاخی و سازش آتا رِد اٹ جوڑ مروکا غیر فطری ریاست پاکستان تینا بینائی دے زوراکی تے بلوچ و بلوچستان آن بناء کرے.
اینو دا کوزہ گیریت ءِ شست و پنچ سال آن زیات مننگ ءِ و بھازا شیفی بڑزی تیان مریسہ بلوچ قومی جہد تینا پنچمیکو دروشم نا بنائی کرن آن گدرینگسہ. داخہ سال اٹ ہزار آتا کچ اٹ بلوچ مخلوق شہید کننگار، بے گواہ مسر و ہزار آ اُراک درپدر مسر و اینو ہم اندا حالیت برجاء ءِ ولے سوج دا ودی مریک کہ او ہرا سوب آکو اینو اسکان بلوچ جہد اسہ سوگَو ءُ دروشم اسیٹی بفک؟
داخہ در قربانی تننگ آن گڈ ہم اسہ طاغت ئسے نا ودشت ءِ کننگ کپک کہ او کوزہ گیر تون مُون ایتے و تینا آزات آ حیثیت ءِ اسیکہ وا دوئی کے؟
دا ہیت آن کس نمّن مفرو کہ دا وار بلوچ قومی جہد مالو نا ارفوکا جُہد آتیان سوگو ءِ و بھاز آ سرسہبیک اینو دوئی مسونو ولے حالیت آتیا خوڑتی اٹ اُننگے گڑا خواست آک بھاز خننگرہ ہرافتیان اینو ہم بلوچ جُہد مُرسلوک خننگک.
اینو اسہ پارہ غا دژمن نا طاغت و زوراکیک زیات مننگو و ایلو پارہ غا بلوچ جہد نا کوالخواک اسٹ ایلو نا زنچک آتیٹ ہلوک خننگرہ. دا وار نا جُہد ءِ سائنٹفک اصول آتیا تالان پاروکاک دا الّمی فریشانی ہیتس مرے کہ ہرا رِد اٹ نن بھلو دعویٰ کننگ ئسون اوفتیان دائسکان بلوچ کوالخواک ہورک خننگرہ. دا گچین ءُ ایت ئسے کہ بھاز آ تنظیم آک اینو اسہ جاہ مریسہ جُہد کننگ نا پڑو کرینو ولے دا ہم الّمی ءُ ہیت ئسے کہ دا بیرہ پڑو اسکان سلیپس بلکن عملاً کاریم کریسہ تینا اسٹی ءِ نشان ایتر و ایلو پارہ غا اندا اسٹ مروکا تنظیم آتا کنڈا بھاز آ ایلو تنظیم آتیان مُرّی ہم بھلو سوج بش کیک ہرافتا ورندی تا پٹنگ جُہد نا کالخواہ تا زمہ واری تیٹ بریرہ.
سرفیس پارٹی تا حالیت آ چمشانک اس شان گڑا اوفک ہم بھاز سفت کننگ لائخ پاننگ مفسہ، انتئے کہ داڑے ہم شخصیت پرستی، پارٹی پرستی نا دکّ ئٹی بسونن ہراڑان قومی جہد ءِ دا نسخان مس کہ مخلوق ءِ باور کریفنگ کن ڈنّی ملک آتیٹ ہم اسہ بھلو مچی اس ہڈ تننگ اٹ ہم نن اینو بے سہب خننگنہ یا جہانی ادارہ غاتیٹ بلوچ وطن نا آزاتی و بلوچستان اٹ بندغی حق آتا لتاڑنگ نا بابت ننا موقف ءِ مونا ہتوکا بندغاک اُور تیا حساب مریرہ.
27 مارچ نا دے گواچنی ہمو شورانک ءِ ہرا ننے یاتگیری کریفک کہ دائسکان لمہ وطن کوزہ گیر نا دوٹی ءِ، بلوچ مخلوق دائسکان زوراکی تا گواچی ءِ، دائسکان بلوچ نا خلق آک بوٹ آتیٹ لتاڑنگسہ ءُ، دائسکان ننا مخلوق بے گواہ مریسہ ءِ.
اگہ نن دا شورانک نا ایسری و دا مرض آن دُراخی ءِ خواوہ گڑا تینا ذات، ہنا و است خواہی تیان پیشن مریسہ حقیقی وڑ اٹ زمینی خواست آتا رِد اٹ تینا کاریم تیٹ سوگوی نشان تریسہ دژمن تون مُون ایتن نہ تو دا شورانک بے دُراخ مریسہ اندنو مرض اسیٹی مَٹ مرو ہرانا علاج ہچبر مننگ کپرو و دادے نن اندن سوگ کریسہ، مودہ کشیسہ گدریفسہ کرون.
