” ھبر راست انت ستر سوچاک انت شیر ءِ “
پزل شیر بلوچ
لہتے سکیں ترپش ءُ تہلیں راستی انت کہ منا دائم تہ ءَ چو شومکیں ریش ءَ ورنت، من جیڑگ ءَ لاچاراں کہ اے چیزاں ھما سنگت کہ پہ انسانی ھکاں کار ءَ انت ءُ گیشتر شوسل میڈیا ءَ ایکٹو انت، درست سرپد انت کہ دژمن چنچو غیر مہذب انت ءُ چنچو درندگ انت بلوچستان ءِ تہ ءَ زورگریں استانی لشکر ءِ زوران سری روچ پہ روچ گیشتر بووان انت بلے مئے لہتے ناپوہ ءُ اسپیت پسیں سرنب چار ءُ لہتے مفادپرستیں نام نہادیں ءُ وتگلاہ کہ وت ءَ راجءِ رہشون لیکگ ءِ جہد ءَ گوں گر ءُ چیلاں اشاں اے بیگواھیں بلوچ پسگانی ءُ شہیدانی ریتکگ ایں ھون کہ دیما نیاینت اے پہ راج ءَ کجام درد ءَ ور انت، وتی چکانی سُرکی ءُ لنٹی میکپ ءُ بوٹ سوٹانی اکس ءِ شنگ کنگ ءِ بدل ءَ ھما کلیرک کہ لوگ ءَ سرتگیں نانے گوں پیمازے وارت ءُ وتی وھدا تیلانک دنت، ھامگیں آرت سروشیت وارت بلے پہ آجوئی ءِ شروکیں باندات ءَ جوش ءُ جزبگءِ چو چلتن بولان سائیجی ءُ البرز ءَ مہکم انت، ھمائی درتہ پچیں ءُ بیگواھیں چک ءِ اکس ماں سوشل میڈیا ءُ پرنٹ میڈیا ءَ شنگ ءُ تالان کنگ بہ بیت داں دنیا ءَ سرپدی ئے بہ رسیت، ھمے بے پاھدگیں اکسانی شنگ کنگ ءُ وت ماں وت گر ءُ چیلی ءِ بدل ءَ یک گار ءُ بیگواھیں بلوچ پسگ ئی ءِ اکس ءِ شنگ کنگ بہ بیت تہ آئی کہول ءِ مردم ئی ءِ چمءِ کپیت زانت کہ من بے وارث نیاں ءُ نا کہ منی بیگواھیں چک لاوارث انت،
چہ بلوچستان ءِ کلیں ھند ءُ دمگاں ھرروچ زھگ زالبول ورنا پیر ءُ کماش بیگواہ کنگ بووگ ءَ انت، لوگ بمب ءُ ٹوپانی زدا انت، مہلوک بے جاگہ ءُ بے لوگ انت بلے مئے کاٹن ءُ شاٹن نہ پرش انت، آیا ما یک باکسے کہ قیمت ءِ یک کلدارے نہ بیت شہید ءِ یا بیگواھیں پسگ ئے ءِ لوگ ءَ دات مہ کناں گڈا مئے گلامی ءِ مارشت کجا بوتاں؟مئے کامریڈ شفی کجا بوت؟، مئے بلاہیں بٹاکاں کہ نہ پرشتیں کوہ کپ کتگ انت کجا بوتگاں، آوکیں وھدءَ وتا شگانی مکنے بے جنگ ءُ دیم ھونی ءُ کربانی ءَ نہ آجوئی گرگ بیت ءُ نہ کہ دنیا ءِ دگہ چشیں راجءِ ھست کہ وپتگیں واب ءَ آجوئی ءِ بشارتءِ رستگ، جنگ کنے زندگ بئے جنگ نہ کنے گار ءُ بیگواہ بئیت،
اچ وتی باتن ءَ مِرے وتی لوگ ءَ پجارگ نہ بئے دری دنیا ءِ ھبر کنگ ءُ آجوئی ءِ گرگ ءُ دیگ آگہیں وابیں، زوراں گوں وتی مزاریں باسکاں بدے ات، ءُ دگہ یک چیزے منا مدام جیڑگ ءَ سک لاچار کنت ءُ برے برے ھد ءَ گیش چہ تہءَ پروش باں آیا اے بلوچ پسگ کہ گار ءُ بیگواہ بووگا انت کل بلوچ انت ءُ بلوچستان ءِ نندوک انت، مئے جنگ جہد منزل آجوئی انت آجوئی کلیں انسانانی بنکی ھک انت بشمول بلوچ راج بلے نزاناں چیا چہ ھمے بیگواھیں پسگاں لہتے گیشتر پروموٹ کنگ بوگءَ انت ما ھمے جیڑگءَ لاچار بہ ایں زہن ءَ الم جست چست بنت کہ یک چمءِ سرومگ ءُ یک چمءِ پرچہ پُر ماں کنگ بوگءَ انت؟،
ساہ ءِ کلانی مان ءَ یک انت بلے وھدے کہ سوشل میڈیا ءَ کمپین کہ چل انت لہتے مردم ما گندیں گیشتر پروموٹ کنگ بووگا انت، آرٹیکل ءُ گانگول انت، واجوزادگ ءُ بااثرے مردمانی مردم آژمان ءَ انت دستانی دل ءَ انت بلے بزگیں گریبکیں کلیرک ءُ اللک ءِ چک ءِ نام ءُ نشان نیست انت آیا اے مئے نزوری انت یا ما کلیرک ءُ اللک ءِ کربانیاں مان نیاراں؟
گڈ سرا لہتے ناسرپدیں ھبر کناں اگاں کسے کمار اش کنت گڈا ھمے جیڑھانی سرا چمشانکے بدے انت گوں کہ کلیرک ءُ اللک ءِ چک اوں انسان انت.۔
