گھار بانڑی اَنت داد شاھی سنگراں جنگ دار اَنت
آ مھنازی مھکمیں نازینک اَنت راجی سنگراں مھکم کن اَنت
نبشتہ اکیل مراد
راجانی سوبمندی راجانی چاگرد ءَ گوں سوبمند بیتگ اَنت مروچی آ راج جھان ءِ تہ ءَ راجے ءِ بستار ءَ زانگ بنت کہ آ راجاں دیمھونی داتگ آ راجانی زالبولاں کربانی داتگ مروچی کُردانی زالبول مئے دیم ءَ اَنت ھنچش کہ گْوستگیں روچاں لھتیں اکس منی دیم ءَ گْوست کیچ ءَ چندے بلوچ زالبول اَنت کہ پاکستانی وتگڑیں مراگشے ءَ تپنگانی نمائیش ءَ گوں لشکریاں دست ما دست اَنت من یک برے اجکہ بیتاں پد ءَ بژنیگ بیتاں کہ بلوچ ءِ لوگ ھمک روچ سوچگ بنت ،بلوچ ءِ ورناہ بیگواہ بنت ، بلوچ ءِ جنین آوار جنگ بیتگ اَنت تنی وھدی بلوچ مسنگ پرسنز ءِ رِد ءَ چِل ھزار ءِ کَچ ءَ مردم گار ءُ بیگواہ اِنت تنی وھدی چُنت بندیگانی تیرسپتگیں لاش دزکپتگ چُنت لوگانی زال جنوزام بیتگ اَنت چُنت چُک چورو بیتگ چُنت چُک وتی پتانی ودار ءَ نیشتگ، کسان سالیں گھار مھلب ءَ گوں وتی گھار سمی ءِ ھمراھی ءَ داں ھژدہ سال ءِ تہ ءَ وتی زند پریس کلبانی دیم ءَ گوازینتگ سمی ،مھلب ،پرزانہ ،کسان سالیں الی ھیدر ءَ کماش ماما کدیر ءِ ھمراھی ءَ شال ءَ داں پاکستان ءِ کیپیٹل اسلام آباد ءَ ریڈی دکہ دیان کُرتگ پہ وتی مردمانی درگیجگ ءَ بَلے بژن اِنت کہ شما اے جاورانی گِندگ ءَ ابید ھم ھما دشمن ءِ گور ءَ اوشتوک اِت کہ بلوچ ءِ ھمک پدریچ ءِ مستریں دشمن اِنت آ نہ لوٹ اِت کہ بلوچ جھان ءِِ دیم ءَ یک راجے ءِ بستار ءَ گِندگ بہ بیت آ نہ لوٹ اِت کہ بلوچ ءِ ورناہ بہ وان اَنت اے وَا دیریگیں گپ ءِ نہ اِنت کہ ما پاکستان ءِ کیپیٹل اسلام آباد ءَ بلوچ اسٹوڈنٹس پاکستان ءِ وتگڑیں جماعت اسلامی ءِ ورناہاں لٹ شاپ کرت اَنت ھمے وڑ کراچی ءَ ھم بلوچ نودربر آوار جنگ بیتگ اَنت ۔ شمے جندے شھر کیچ ءَ کسان سالیں چاکر کہ یک نودربرے اَت آ شمے دیم ءَ اَت کہ آوار جنگ ءُ شھید کنگ بیت اے وئیل شمے چم دیتی ءَ گْوستگ اَنت ءُ انگت ءَ برجاہ اَنت ۔
ھمے وڑ بلوچستان ءِ رودراتکی سیمسراں بہ گر داں روکپتی سیمسراں درا اے دمگاں نندوکیں مردماں چہ لشکری زوراں لڈ ءُ بار کُرتگ ءُ در پہ دری زند ءَ گْوازینگ ءَ اَنت اے مھلوک ءِ تہ ءَ چیزے ماں کراچی ءُ چیزے ماں روکپتی بلوچستان ءَ وتی سیاد ءُ وارسانی گْور ءَ پہ میار بندی شتگ اَنت آ شتگیں مردمانی میتگ ھمے ھند بیتگ ،ھمے میتگ بیتگ اَنت ھمے دیار بیتگ اَنت ،شما کسے ءَ جست کُرتگ پرچا شتگے ؟ سبب چی بیتگ ؟ شما وتی میتگ یلہ کُرتگ اَنت ؟ شما ھمے لشکری کارندہ پُرسیتگ اَنت ؟ شما چی سبب ءَ مئے مردم چہ میتگاں لَڈینتگ اَنت ۔
بلے گپ چی اِنت کہ لھتے چانیگ وارانی کرسی ءِ ھاتر ءَ اے دراھیں جاور شموشتگ اَنت ءُ بلوچ ءِ دشمن ءَ گْوں دست ما دست ءِ بلوچ راجدپتر اشی ءَ سھر ءَ کنت کہ بلوچ زالبولاں وتی نَنگ ءِ ھاتر ءَ وتی براتاں گْوں ھمکوپگ بیتگ اَنت ما اگاں داد شاہ ءِ مثال ءَ بہ زوریں یا دودا ءِ مثال ءَ بہ زوریں ،منی ماتاں ، منی گھاراں چُش مہ بیت بانداتیگیں روچ ، آھوکیں پدریچ شمے سر ءَ بدیں کردے ءِ بابت ءَ بدیں کردے نام ءَ راجدپتر ءَ نبشتگ بہ کنت مروچی بلوچستان ءَ بلوچ ورناہاں پہ بلوچ ءِ باندات ءَ وتی زندمان کوہانی تہءَ ندر کرتگ اے کوہانی تہ ءَ نِندوکیں مردم گَنوک نہ اِنت کہ آیاں وتی مات ، چک ،جنین ءُ گھار یلہ کرتگ اَنت ءُ کوہ وتی لوگ جوڑ کرتگ اَنت آ گنوک اَنت ناں اگاں گنوگ اَنت گڑا مروچی پہ زمین گنوک اَنت پہ راج گنوک اَنت مروچی آ اگاں وتی لوگاں بِہ نِنداں ھم نِشت کُرت کن اَنت آہاں سرکار پہ نِندارینگ ءَ بازیں ھُنر ءُ پندل سازگ ءَ ایں آیانی مردماں ترس آماچ کنگ ءَ ایں آیانی لوگاں سوچگ ءَ ایں آیانی مات ءُ گھاراں آوار جنگ ءَ ایں آیانی جنین ءُ چکاں برگ ءُ بیگواہ کنگ ءَ ایں اے شمے دیم ءَ پدر اِنت کہ گوستگیں روچاں پاکستان ءِ چانیگ واراں بلوچ راجی جنز ءِ مزن نامیں رھشون ڈاکٹر اللہ نِزر بلوچ ءِ لوگ بانک پزیلہ گوں لھتے جنینانی ھواری ءَ آوار جت ءُ برت ،ھمے وڑ بلوچ چیرجنگیں سرمچار اسلم بلوچ ءِ گھار ھم آور جت ءُ برت کہ آ نزور بہ بنت آ بلوچ راجی جنز ءَ دزکش بہ بنت زوراک اے چیز ءَ نہ پھمیت کہ بلوچ راجی سرمچاراں وتی دراھیں وشی پہ زمین بباہ کرتگ اَنت آ چشیں جاوراں سرگْوز اَنت آ اے جاورانی مٹ زمین ءِ آجوئی ءَ لوٹ اَنت آزمین ءِ آجوئی ءَ ابید دگہ ھِچ وڑیں لوٹ سرجم کنگ ءَ ساڑی نہ اَنت ءُ نہ بَنت آیاں وتی لوٹ یکشلیں آجوئی کُرتگ اَنت ۔
راجی جنز سوبمند بات
دشمن نیست ءُ نابود بات
