تدو کا دے کوئٹہ زرغون روڈ نا رہی آ چرچ آ مروکا جُلہو ٹی بھاز آ عیسائیک کسکر و بھاز آک ٹپی مسُر. جُلہو کروک آتیٹ وت کش آک ہم بشخ ہلکر ہرافتا سَوب آن نسخان نا کچ زیات آن زیات مس. کوئٹہ و بلوچستان ٹی دُنو جلہو داکان مُست ہم مسونو ہرافتیٹ تدوکا سال وکیل آتیا مروکا وت کش جلہو، 2016 ٹی خضدار ٹی ‘شاہ نورانی’ نا مزار آ مروکا وت کش جلہو ہراٹی پنجا و چار بندغ کسکر و سد آن زیات ٹپی مسر، جھل مگسی ٹی 6 اکتوبر 2017 ٹی درگاہ فتح پور آ مروکا وت کش جُلہو ہراٹی مُسہ چنا تون اوار ہژدہ بندغ کسکر و بیست و شش ٹپی مسُر و اندن داکان مُست ہزارہ غاتیا برجا وڑ اٹ مروکا جلہوک گیرام کننگ مفسہ.
دُن انگا ہر جلہو مالو نا مروکا جلہو آن زیات نسخان تریسہ بندغی (انسانیت) ءِ دتر چُر کریسہ مُر آ چغل تسونے. ہر وار بندغی گار و پریات خلیسہ انصاف نا کسر آ اُروک سلیسنے کہ نوائے کس اس انصاف ایتے ولے ہر جُلہو نا زی آ ارٹمیکو جلہو بریسہ مُست ئنا جُلہو آن مروکا بندغی نا نسخان ءِ بے خیال کریفینے.
بلوچ قوم نا مزاج ئٹی مذہبی جنونیت اسُل اَف ولے سوج دا ودی مریک کہ دُن انگا جُلہوک انتئے و امر دُن برجا وڑ اٹ مننگو؟ دافتا رند اٹ دنّا دُو ءِ کہ اودے بلوچستان ئٹی مروکا دُن انگا نسخان آتیان فائدہ رسینگک؟
بلوچستان اٹی مروکا دُن انگا واقعہ غاتیا خوڑتی اٹ اگہ اوننگہ تو پاش وڑ اٹ خننگک کہ دا جُلہوک باقاعدہ اسہ دانست و پروگرام ئسے نا پد اٹ مریسہ ءُ.
کوئٹہ ٹی چرچ آ مروکا جلہو نا بابت غور کننگہ تو سوج دا ودی مریک کہ کوئٹہ نا وڑ انگا شار اٹ دا جُلہو کروکاک امر پیہار حالانکہ حکومتی کارندہ غاک تینٹ دا دعوٰی ءِ کیرہ کہ سکیورٹی نا بست و بند آک کوئٹہ شار ئٹی انتہائی سخت کننگانو، چار سد آن زیات کُبین نرخ آتیا ہلوکا ‘سی سی ٹی وی’ کیمرہ غاک ہرجاہ خلوکو، بھاز آ جاگہ تیا ‘سکیننگ سسٹم’ خلنگانو… حکومتی دعویٰ غاتیا اگہ غور کننگہ تو نن خنینہ لس آ مخلوق اسہ چوک آن ایلو چوک اسکان ہننگ آ بھاز آ جاگہ تیا چیکنگ تننگ آن پد خوار مریسہ سر مریک گڑا دا حالیت اٹ اندا ظاہر مریک کہ حکومت نا جند ئنا کارندہ غاک دا جُلہو تیٹ کمکار ءُ کہ اسہ وٹ کش کروک اس بارود و تفنگ آتیتون دا تیوی آ بست و بند آتیان پیشن مریسہ جُلہو کننگ اٹ سرسہب مریک.
دا رِد اٹ بلوچ راہشونک و سیاسی کارکن آک ہمیش پارینو کہ دا جُلہو تا پد اٹ ریاستی ایجنسی تا دُو ءِ نئے تو داخہ آسانی تون کسس اسہ ہند ئسے آ جُلہوکننگ کپک. اندن ہزارہ غاتا ٹارگٹ کلنگ نا رند اٹ ایجنسی تا ودی کروکا ‘لشکر جھنگوی’ پنی آ تنظیم مسونے ہرا پاش وڑ اٹ ‘سپہ صحابہ پاکستان’ نا پِن اٹ بریک جلسہ جلوس کیک و حکومت نا پارہ غان ہچس پاننگپک تا، داڑان ظاہر مریک کہ حکومت نا کمک دافتیتون ءِ کہ اندا تنظیم نا سرکردہ غاک بریرہ مخلوق نا مون آ تران کیرہ، ہزارہ غاتے خلنگ نا پڑو کیرہ و حکومت سیل کیک.
ایلو پارہ غان بلوچ سیاسی تنظیم آتیا پابندی خلیسہ اوفتے برانز ارفنگ نا حق ہم تننگپک، اوفتا کتاب آتے شینک کننگ آ پابندی خلنگک و اوفتا کارکن آتے بے گواہ کننگک و دوارہ اندا کارکن آتا چشوک آ جُونک گیاوان تیان خننگرہ.
داڑان حکومت و اونا ایجنسی تا پالیسیک پاش مریرہ کہ او دانستہ وڑ اٹ بلوچستان ئٹی مذہبی نفرت و بے جاراتی ءِ زیات کریسہ قومیت نا سوچ آن مخلوق ءِ چَپ کریفنگ خوارہ.
دا حالیت اٹ بلوچ سیاسی تنظیم و کارکن آتا بڈ زیات مریک کہ اسہ کنڈان اوفتے قومیت نا بابت تینا مخلوق ءِ زیات آن زیات سرپندی ایتر و ایلو پارہ غا ریاستی ایجنسی تا پالیسی تے تینا مخلوق و جہان نا مونا پاش کروئی تمک کہ دافتا پالیسی تا رند اٹ بلوچ قوم ءِ نسخان تننگ نا دا مسخت آکو، ہرافتے ہر حالیت اٹ توننگ ننا زمہ واری ءِ.
۔۔۔۔۔۔
