مَش تا رہی آ تالان زیبا غا خلق ہرا مُر آن اخس زیبدار خننگک خڑک ہننگ آ دا خلق ئنا زیبائی پین زیات نمدار مریسہ مونا بریک. بلکن زند ئٹی ہچبر مشک آ ہننگ متوکہ اگہ دا شہید امتیاز جان نا خلق متوکہ. شہید امتیاز نا شہادت آن گڈ اسہ جتاؤ اُست خواہی اس ودی مس کہ ہرا بڑز کڑدار آ بندغ تون ہمگام مننگ کتوٹ ولے کاؤ ہمو خلق ءِ تو خنیو ہراڑے شہید امتیاز ودی مس، ہراڑے او گوازی کریسہ ورنائی ٹی گام تخا اندا اُست خواہی کنے مشک اسکان پند کریفے، ہمو اسکول ہراٹی شہید امتیاز جان بناء ٹی تعلیم دوئی کرے، ہمو میدان ہراڑے مِش نا زیبا غا گند آن امتیاز ءِ مابت نا سبخ رسینگا، ہمو انار نا باغ ہرادے امتیاز تینا دوتیٹ خلکوسُس داسہ او تیوہ غاک برم تروکو درخت مسوسُر ہرافتیا انار نا برم آک خیسن خیسن تینا سنگت نا ندر مننگ آ فخر کننگ ئسر، ہمو بندغاک ہرافتا خنک امتیاز ءِ یات کریسہ خڑینک آتیٹ غُلغلو کریرہ، اسہ زیبدارو خلق اس ہراڑے تیوہ غاک ئسرہ اَلو تو امتیاز اَلو.
دا خلق آن دیخہ مُرّی آ اسہ قبر اس ئس ہراٹی خاچوکا بندغ وخت اسیٹی راہشون اس ئس. بلوچستان نا مخلوق ہرادے ایوب جتک نا پِن آ چائسکہ تیوہ غا بلوچستان آنبار زہری نا مخلوق ہم ایوب جتک ءِ تینکن اسہ خیرخواہ اس سرپند مسرہ اونا ہر اسہ توار آ جی پاریرہ ولے شہید فدا نا دا سنگت و مخلوق نا خیرخواہ ہراتم پارلیمنٹ آ سر مس تو تینا دروشم ءِ اسُل مٹ کرے. ٹغلینگا بہا مس، شہید آتا دتر نا قوم نا اُمیت آتا سودائی ءِ پارلیمنٹ ئٹی خلیسہ تینا فرض، مسخت، تینا زمہ واری تیان نریسہ غدار مس ولے ہراتم دا جہان آن ہنا کس اس اسہ ہیتس ہم اونا صفت ئٹی نوشتہ کتو.
اندا زہری نا چنکو خلق سلمانجو ٹی اسہ ورنا اس ودی مس ہرادے اینو بلوچ و بلوچستان بیرگیر نا پِن اٹ چاہک، ہرادے اونا سنگتاک نثار و خاہوت والاک حیو نا پِن اٹ اُستا اتیرہ. ہرا سوراب نا ڈغار ءِ تینا دتر تیان آبات کرے. مُسہ بندغ ہرافتیٹ عمر ئنا فرخ، آزموندہ نا فرخ، سیاسی چاہنداری نا فرخ، اسٹ بی ایس او نا بڑز بالی تا وخت ئنا چیئرمین تو ایلو اِرٹ پر آشوب آ وخت اٹ بلوچ قوم نا سپاہی. اسٹ ہراتم چیئرمین مریک تو پارلیمنٹ نا وزیری نا بدل اٹ قوم نا ننگ ءِ سودا کیک و ایلو ارتوماک توفک ارفیسہ قوم نا عزت ءِ بچفنگ کن تینے ندر کیرہ. اسٹ نن نا تارمئی ٹی دژمن نا کیمپ آ ہنسہ سلامی کننگ کن زَر ہلیک تو ایلو اِرٹ نن نا تارمئی ٹی دژمن آ جلہو کیرہ. اسٹ قوم نا ورنا تے اُست کُٹّہ کیک تو ایلو ارٹ تینا توفک نا توار آن قوم نا ورنا تیٹی اسہ پوسکنو جوزہ اس شاغرہ. اسٹ ہرا آخر تینا سنگت آتے یلہ کریسہ سرکار ءُ سڑدار تون اوار مریک تو ایلو ارٹ سرکار ءُ سڑدار کن کاٹم خڷ مریرہ. اسٹ نا ہننگ آن مخلوق اودے گیرام کیک ایلو ارٹ نا شہادت آن گڈ اوفتا پِن آ باگل پاننگک، اوفتا کسّہ غاک بنفنگرہ.
جہان آن تو ہر مُسٹ آک ہنانو ولے گچینا مرک اِرٹ دوئی کریر. اسٹ نا ہننگ آن گڈ اونا پڑس آ ہنوکاک منٹس اس ئسر ایلو ارٹ نا شہادت آ ہرا ہراکان مخلوق بس. ہنار تو ہر مسٹ آک، اسٹ وطن ءِ سودا کرے ہنا ایلو ارٹ تینا جند ءِ وطن آ ندر کریسہ ہنار. ایڑے (ایلو جہان اٹ) اسٹ ایلو تون ہراتم اوڑدئی مرو تو گوڑیفوکو کیفیت اس مرو اسٹ نا کاٹم شرمندئی آن شیف مریک ایلو ارٹ نا کاٹم فخر آن جِک مرور. لمہ وطن تیوہ غاتے اسہ وڑ ودی کیک اوڑکن تیوہ غاک اونا جغر نا ٹکر مریرہ ولے گواچنی مار ہمو مریک ہرا لمہ نا نَت تا شیفان کُنٹہ آتیا تینا دُوتے تخیسہ کسر جوڑ کے، ہرا تینا لمہ وطن نا دڑد ءِ سرپند مریسہ اودے ماس کش کریسہ خسنگ نا جہد ئٹی تینا آخریکو دَک آخریکو گام آخریکو ساہ اسکان اوڑا سلوک مرے.
مشک و سلیمانجو ٹی حئی بلوچ و امتیاز تون اوار چُنکی آن گوازی کروکاک یا اوفتیان مُست بروکاک ہم اندنو الواد ءُ دا لمہ وطن نا دُنکہ دا ئسرہ بس فرخ انداخس ءِ کہ ہمو تیوہ غاتے گیرام کینہ یا گیرام کننگ خوانہ ہرافتا خواست ءِ اسہ لمہ اس تینا مڷ آتیان ہموتم کیک ہراتم اونا نازرک آ نَت تے تینا گور آ محسوس کیک. ہراتم او تینا اولیاد نا کاٹم ءِ تینا دوتیا تخسہ اودے آسودہ ءُ تغ اسیٹی خاچفک.
ہمو تم او لولی اس بنفسہ تینا معصوم آ چُنا ءِ تینا دڑد و اونا فرض ءِ یات کریفک. بنرہ سرپند مریرہ تیوہ غاک، دیر ءِ ہرا تینا لمہ نا چرکاؤ ءِ بنپک. بس منٹس بیرگیر مریسہ دژمن ءِ لتاڑرہ دامون ایمون کیرہ منٹس پارود آن بولان اسکان نت تا رند یلہ کیرہ و منٹس مفاد آتیٹی غرق مریسہ تینا ذات اسکان سلوک سرکاری تنخواہ خوری ٹی غداری کیرہ.
دا پک ءِ وطن نا دا اِرا مڷ آک پارلیمنٹ پرست راہشون تیان زندہ سلور انتئے کہ زندہ ہمو مننگ کیک ہرا ایلوفتیکن تینا زند ءِ ندر کیک. او کہیپسہ تاریخ جوڑ مریرہ و تاریخ ہچبر گیرام کننگپک.
داسہ ہم جاہ اس انار نا درخت ئسے نا شیف آن، میدان اسیٹی، اسکول اسیٹی، لمہ ئسے نا کُٹ اٹ، جاہ اس تہوتا چِرک اسیٹی، جاہ اس جُو ئسے نا توار اٹ حئی و امتیاز آجوئی نا زیبا غا باگل ءِ پاریسہ بھلن مننگو.
………………★★★★………………..
