راسکوہ ادبی دیوان گرگینہ ہنکین نا مجلس، کابینہ نا سوغندی دود

42

راسکوہ ادبی دیوان گرگینہ ہنکین نا مجلس 25 اگست یک شنبہ نا دے کلی خراسانی گرگینہ ٹی مس۔ مُسہ بشخ اٹ تالان دا مجلس نا کماشی ءِ گرگینہ زون نا گچین مروک آ صدر غنی ہشام کرے و خاص انگا مہمان مسکوہی نائب ناظم میر محمد صادق رودینی، اعزازی مہمان گرگل ادبی دیوان نا سینٹرل کمیٹی نا باسک میر سمیع اللہ سرپرہ ئس۔

مجلس نا شونکاری نا دود آتے راسکوہ ادبی دیوان نا بنجائی جنرل سیکرٹری جمیل فاکر سر تس۔ دا مجلس نا مسہ بشخ ئسر، اولیکو بشخ اٹ گرگینہ زون نا گچین مروکا کابینہ نا سوغندی دود مس۔ دا وخت آ راسکوہ دیوان نا چیئرمین کابینہ غان سوغند ہلک، دا کابینہ کن صدر غنی ہشام، نائب صدر ذاکر ندیم، جنرل سیکرٹری ذاکر بلوچ، فنانس سیکرٹری ورند راز، پریس سیکرٹری ثناء صابر، جوائنٹ سیکرٹری شبیر زیب و آفس سیکرٹری ظفر شاہین گچین مسر۔

ارٹمیکو بشخ اٹ براہوئی ادب و وخت نا خواست آتا سرحال آ جمیل فاکر، عابد سلام، غنی ہشام ہیت کریر۔ مجلس نا گڈیکو بشخ اٹ محفل مشاعرہ مس۔ راسکوہ ادبی دیوان گرگینہ زون نا ساز و زیمل گروپ نا شئر پاروک آک ساحل غلام، عالم نسیم، زبیر ساگر، آصف زیب ترنم اٹ شیر بنفیر۔ مشاعرہ ٹی شاعراتا نمونہ کلامک دا وڑ اٹ ءُ:

عابد سلام
کنا الے قلم دوٹی مرے وخت اس
ای تینا است نا نقشہ ءِ کشو زرس

جمیل فاکر
نی تہارآ تو سنگتی کیسہ نے جہالت نا زنگ لگانے
ظالم ءِ کاٹم آ تخنگ اس نی تین تون نفرت نا رنگ لگانے

ہشام غنی
ہراتے راج نا آدینک پارہ
ہموفتا شیوہ مسک چندہ خوری

ملک اشرف فراز
زو برک شام تما
منزل اس پد گام تما

عالم نسیم
امر دا بخت ءِ شنا نسیم
خڑینک اس خن تیٹ رُدا نسیم

ذاکر بلوچ
نے زاکر حوصلہ ایتک تو زبر ءِ
پدا ار گپ ءِ وا جنجال کیسہ

شاہد نواز
دا راج اٹ خرین ءُ گپ کیرہ
است آتے پرغرہ گپ کیرہ

ظفر شاہین
سہب انا وخت آنی کرن تا ہُر
نے بفک باور ننا نی خن تا ہُر

عزت اللہ عزت
نی الے نسل ءِ رنگ ءِ قوم ءِ الے
اسہ زات اس تینے لکھن برک نی

ابراہیم ابرارر
تینا اقرار تینا کل ءِ حقیقت کے بس
او برے مہراتے مہراٹی رخصت کے بس

ذاکر ندیم
خوشی تا نیامٹ اے غم تے بنوک آ
پدا دو بفک زندگانی تدوک آ

ثناء صابر
یاتو کنا تقدیر نا ہیت آک یا تو دا ہیت پین ءِ سنگت
اینو ای پاوہ یار سفا ءِ راست انگا ہیت پین ءِ اے سنگت

شبیر زیب
خڑینک آتا خن تیٹی نا وڑ سلوک ءِ
ارفک زندگی نا ہرا وڑ سلوک ءِ