بلوچستان کے ضلع ڈیرہ بگٹی سے فوجی آپریشن اور مسلح افراد کے مابین جھڑپ کی اطلاعات ہیں جبکہ دوران آپریشن فورسز نے متعدد افراد کو حراست میں لیا ہے جن میں ابتک دو افراد کی شناخت ممکن ہوئی ہے۔
لاپتہ ہونے والوں کی شناخت عزیز بگٹی اور سلیمان بگٹی کے ناموں سے ہوئی ہے۔ مذکورہ افراد کو گذشتہ شب ڈیرہ بگٹی کے علاقے آدل کالونی سے حراست میں لیا گیا ہے۔
دوسری جانب ضلع ڈیرہ بگٹی کی تصیل سوئی کے علاقے گنڈوئی ، سوناری مٹ ، سردار پٹی ، اوچ کے علاقے بشک ، ڈیم ، لاغر داوان سمیت مختلف علاقوں میں پاکستانی فوج نے وسیع آپریشن کا آغاز کردیا ہے جس میں آٹھ گن شپ ہیلی کاپٹر حصہ لے رہے ہیں، کئی گھروں کو بمباری کر کے تباہ کردیا گیا ہے جس کے نتیجے میں جانی نقصانات کے اطلاعات ہیں۔
سوئی کے قریب سے مسلح افراد اور پاکستانی فورسز کے مابین جھڑپ کی بھی غیر مصدقہ اطلاعات ہیں، تاہم علاقے میں جاری آپریشن کی وجہ سے تصدیق کرنے میں مشکلات کا سامنا ہے جبکہ اس حوالے سے حکام کا موقف تاحال سامنے نہیں آیا۔
