مکران میڈیکل کالج تربت میں سپلیمنٹری امتحانات کے نتائج کے خلاف طلباء کا احتجاج شدت اختیار کر گیا، طلبہ و طالبات نے کالج انتظامیہ کے فیصلوں کے خلاف احتجاج کرتے ہوئے کالج کے مرکزی گیٹ کے باہر ایم 8 شاہراہ پر دھرنا دے کر ٹریفک معطل کردی۔
احتجاج کرنے والے طلباء کا کہنا ہے کہ حالیہ سپلیمنٹری امتحانات کے نتائج میں طلباء کو جان بوجھ کر فیل کیا گیا ہے، جبکہ تین طلباء کو ریپیٹ ایئر کرنے کے فیصلے نے ان کے مستقبل کو شدید متاثر کیا ہے۔
طلباء مظاہرین کے مطابق نتائج غیر شفاف ہیں اور بارہا نشاندہی کے باوجود کالج انتظامیہ نے ان کے اعتراضات کو نظرانداز کیا۔
اس سے قبل میڈیکل کے طلباء نے گزشتہ دو دنوں کے دوران کالج احاطے میں ریلیاں نکالیں اور ایڈمن بلاک کے سامنے احتجاجی مظاہرے کیے، تاہم مطالبات نہ سنے جانے پر انہوں نے احتجاج کو وسعت دیتے ہوئے شاہراہ پر دھرنا دینے کا فیصلہ کیا۔
ایم 8 شاہراہ پر جاری دھرنے کے باعث ٹریفک کی روانی شدید متاثر ہے جبکہ مسافروں کو مشکلات کا سامنا ہے، دوسری جانب کالج انتظامیہ کی جانب سے تاحال کوئی باقاعدہ مؤقف سامنے نہیں آیا۔
طلباء نے مزید کہا کہ اگر انتظامیہ ان کے مطالبات پر عمل درآمد نہیں کرتی ان کا احتجاج جاری رہے گا اور اس میں مزید وسعت دی جائے گی، جس کی ذمہ داری کالج انتظامیہ پر عائد ہوگی۔
