بلوچستان کے دارالحکومت کوئٹہ میں پاکستانی فورسز کو یکے بعد دیگرے دو بم دھماکوں میں نشانہ بنایا گیا ہے۔
آج صبح کوئٹہ کے قمبرانی روڈ سے متصل اللہ والا چوک پر ناکہ بندی میں مصروف فورسز اہلکاروں کو موٹر سائیکل پر نصب ریموٹ کنٹرول آئی ای ڈی دھماکے میں نشانہ بنایا گیا۔
ذرائع کے مطابق دھماکے کے وقت پولیس اور ایگل اسکواڈ کے دس کے قریب اہلکار مذکورہ مقام پر جمع تھے۔
دریں اثناء مذکورہ مقام کی جانب پیش قدمی کرنے والے کرائم برانچ کے اہلکاروں کو قمبرانی روڈ پر دھماکے میں نشانہ بنایا گیا۔
حکام نے دھماکوں کی تصدیق کردی ہے تاہم نقصانات کے حوالے سے کوئی تفصیلات فراہم نہیں کی ہے۔
گذشتہ چوبیس گھنٹوں میں بلوچستان کے علاقے جیونی اور کوئٹہ میں تین آئی ای ڈی دھماکے رپورٹ ہوئے ہیں جبکہ گذشتہ شب بھی کوئٹہ، ولی جیٹ میں فورسز کے پوسٹ کو دستی بم حملوں میں نشانہ بنایا گیا تھا۔
