پاکستانی فورسز نے ایک شخص کو حراست میں لینے کے بعد نامعلوم مقام پر منتقل کردیا ہے۔
بلوچستان کے علاقے پسنی سے موصول ہونے والی اطلاعات کے مطابق گزشتہ شب پاکستانی فورسز نے چیک پوسٹ سے پسنی کے وارڈ نمبر 1 کے رہائشی آصف حاصل کو حراست میں لے کر نامعلوم مقام پر منتقل کردیا ہے۔
جبری لاپتہ شخص کے لواحقین کے مطابق، گزشتہ رات تقریباً ایک بجے پاکستانی فورسز نے ہمارے گھر پر چھاپہ مارا، گھر کی تلاشی لی اور اہلِ خانہ کو تشدد کا نشانہ بنایا۔
انکے مطابق چھاپے کے دوران فورسز آصف حاصل کے بارے میں پوچھ گچھ کررہی تھیں، تاہم وہ اس وقت گھر پر موجود نہیں تھے، اسی روز شام 7 بجے پاکستانی فورسز اور سی ٹی ڈی اہلکاروں نے آصف کو پسنی چیک پوسٹ سے حراست میں لے کر اپنے ہمراہ لے گئے۔
اہلِ خانہ کے مطابق چھاپہ کے دوران پاکستانی فورسز کے اہلکار زبردستی گھر میں داخل ہوکر مکمل تلاشی لی اور موبائل فون اپنے قبضے میں لے لیے، انہوں نے آصف حاصل کے بارے میں پوچھ گچھ بھی کی۔
لواحقین نے مزید بتایا کہ پسنی چیک پوسٹ سے حراست میں لیے جانے کے بعد آصف حاصل کو نامعلوم مقام پر منتقل کردیا گیا ہے، جس کے بارے میں کوئی اطلاع فراہم نہیں کی جارہی۔
اہلِ خانہ نے کہا ہے کہ انہیں آصف حاصل کی زندگی اور سلامتی کے حوالے سے شدید خدشات ہیں، انہوں نے ان کی فوری بازیابی کا مطالبہ کیا ہے۔
