محکمہ داخلہ بلوچستان کے مطابق 15 اگست کو کوئٹہ کے مختلف علاقوں میں موبائل فون سروس معطل رہے گی۔
حکام کے مطابق کوئٹہ کے علاقوں قائدآباد، گوالمنڈی اور بروری میں موبائل فون سروس صبح 9 بجے سے رات 8 بجے تک بند رکھی جائے گی، محکمہ داخلہ بلوچستان کا کہنا ہے کہ موٹر سائیکل کی ڈبل سواری پر پابندی پہلے ہی عائد کی جا چکی ہے۔
واضح رہے کہ رواں ماہ صوبائی حکومت کے حکم پر کوئٹہ سمیت بلوچستان بھر میں موبائل انٹرنیٹ سروسز پہلے ہی معطل کی جا چکی ہیں، اور اب عام موبائل فون سروسز کی بندش کا بھی اعلان کردیا گیا ہے۔
سیکیورٹی خدشات اور ممکنہ حملوں کے پیش نظر بلوچستان کے متعدد علاقوں میں کرفیو نافذ ہے، جبکہ 14 اگست کے موقع پر پبلک ٹرانسپورٹ، انٹرنیٹ، ٹرین سروس اور بینکنگ نظام کو بھی معطل کردیا گیا ہے۔
حکومتی احکامات کے تحت 14 اگست کے موقع پر کوئٹہ کے بولان میڈیکل کمپلیکس میں ایمرجنسی نافذ کر دی گئی ہے، جبکہ مختلف شہروں میں سیکیورٹی ہائی الرٹ ہے اور پولیس کا گشت جاری ہے۔
