بلوچستان کے ضلع چاغی میں پولیس اور مسلح افراد کے درمیان فائرنگ کے تبادلے میں ایک پولیس اہلکار سمیت دو افراد ہلاک ہوگئے۔
پولیس کے مطابق واقعہ اُس وقت پیش آیا جب ایک مکان میں موجود مشتبہ ڈاکوؤں کے خلاف کارروائی کی گئی۔
کارروائی کے دوران پولیس پارٹی پر فائرنگ کے نتیجے میں ایک پولیس اہلکار موقع پر ہلاک ہو گیا جبکہ جوابی کارروائی میں ایک حملہ آور بھی مارا گیا۔
فائرنگ کے تبادلے میں ڈپٹی سپرنٹنڈنٹ پولیس (ڈی ایس پی) عابد شیرزئی اور ایک اور پولیس اہلکار سفیر شیرزئی شدید زخمی ہو گئے۔
زخمیوں کو فوری طور پر ابتدائی طبی امداد کے لیے پرنس فہد ہسپتال دالبندین منتقل کیا گیا جہاں سے انہیں تشویشناک حالت میں کوئٹہ منتقل کر دیا گیا ہے۔
