بلوچستان میں جبری گمشدگیوں کا سلسلہ بدستور جاری، ڈیرہ بگٹی سے ایک درجن افراد لاپتہ ، چھ کی شناخت ہوگئی ۔
تفصیلات کے مطابق گذشتہ شب طاہر ولد شادمان بگٹی کو ایف سی نے گھر میں چھاپہ مار کر جبری طور پر لاپتہ کردیا ہے جبکہ ریاض ولد محمد بخش بگٹی کو ڈیرہ بگٹی کے مین بازار سے پاکستانی فورسز نے حراست میں لے کر لاپتہ کر دیا ہے ۔
مزید ڈیرہ بگٹی شہر میں ایک گھر پر فورسز نے چھاپہ مار کر رضا محمد ولد محمود بگٹی کو جبری طور پر لاپتہ کر دیا ہے جبکہ ڈیرہ بگٹی میں جانی خان بگٹی کے گھر پر چھاپہ مار کر ان کے بیٹے علی خان بگٹی کو جبری طور پر لاپتہ کر دیا ہے ۔
وہاں سوئی سے ایک دکاندار عارف ولد مٹھو بگٹی کو پاکستانی فورسز نے ان کی دکان سے اغوا کرنے کے بعد شدید تشدد کا نشانہ بنا کر نامعلوم مقام پر منتقل کر دیا۔
دریں اثنا سوئی کے تحصیل بازار کے جتھ ہوٹل سے انور ولد ریحان بگٹی کو سی ٹی ڈی کے اہلکاروں نے غیر قانونی حراست میں لے کر جبری طور پر لاپتہ کردیا۔
مقامی افراد کے مطابق ضلع ڈیرہ بگٹی میں پاکستانی فوج اور خفیہ اداروں کی جانب سے بڑے پیمانے پر جبری گمشدگیوں کا سلسلہ جاری ہے۔
