بلوچستان اور خیبرپختونخوا کو ملانے والی زیر تعمیر ژوب میر علی خیل ٹانک روڈ کے سیکشن ٹو پر واقع ایک تعمیراتی کمپنی کے کیمپ پر مسلح افراد نے حملہ کرکے کیمپ سے ٹھیکیدار سمیت تین افراد کو اغواء کر لیا ہے۔
واقعہ ژوب شہر سے تقریباً 70 کلومیٹر دور بلوچستان اور خیبرپختونخوا کی سرحد کے قریب علاقے کچھ مینا میں پیش آیا، مقامی پولیس کے مطابق اغوا کیے گئے افراد کا تعلق ژوب کے علاقے کلی خوژکزئی سے بتایا جا رہا ہے۔
ذرائع کا کہنا ہے کہ اغوا کی واردات رات گئے اس وقت پیش آئی جب تعمیراتی کام کے لیے کیمپ میں موجود افراد آرام کر رہے تھے۔
پولیس نے واقعے کے بعد تحقیقات کا آغاز کر دیا ہے اور علاقے میں مغویوں کی بازیابی کے لیے سرچ آپریشن شروع کر دیا گیا ہے۔ متعلقہ حکام نے کہا ہے کہ واقعے کے پس منظر اور اغوا کاروں کے مقاصد کے حوالے سے مزید تفصیلات جلد سامنے آئیں گی۔
