کوئٹہ کے علاقے مغربی پائی پاس پر سوئی گیس پائپ لائن کو دھماکے سے اڑانے کا مقدمہ سی ٹی ڈی تھانے میں درج کر لیا گیا ہے۔
سی ٹی ڈی حکام کے مطابق مقدمہ نامعلوم ملزمان کے خلاف درج کیا گیا ہے، جس میں انسداد دہشت گردی ایکٹ اور دیگر دفعات شامل کی گئی ہیں ملزمان کی تلاش اور واقعے کی تحقیقات سی ٹی ڈی کی جانب سے جاری ہیں۔
یاد رہے کہ گذشتہ روز، کوئٹہ کے مغربی بائی پاس پر نامعلوم افراد نے گیس پائپ لائن کو ٹائم بم سے اڑا دیا تھا، جس کے نتیجے میں سوئی گیس کی فراہمی کوئٹہ شہر، زیارت اور پشین کے مختلف علاقوں میں معطل ہو گئی۔
حکام کے مطابق گیس کی فراہمی میں خلل آنے کے بعد متاثرہ لائن کی مرمت اور بحالی کا کام جاری ہے۔
واضح رہے کہ مذکورہ حملے کی ذمہ داری بلوچ لبریشن آرمی نے قبول کی ہے۔
تنظیم کے ترجمان جیئند بلوچ نے گذشتہ روز میڈیا کو بھیجے گئے اپنے ایک بیان میں کہا کہ سرمچاروں نے ایک آپریشن کے دوران مغربی بائی پاس پر گیس پائپ لائن کو دھماکے سے اڑایا، مذکورہ کاروائی کے دوران بی ایل اے نے کوئٹہ سمیت بلوچستان کے مختلف اضلاع میں مزید 8 حملوں کی ذمہ داری قبول کرلی تھی۔
