ایران کے وزیر داخلہ نے تاکید کی ہے کہ اسلام آباد کو اس بات کی ہرگز اجازت نہیں دینی چاہیے کہ دہشت گرد عناصر پاکستان میں اپنا کوئی اڈہ بنا سکیں۔
ایران کے وزیر داخلہ احمد وحیدی نے کہا ہے کہ حکومت پاکستان کو چاہیے کہ اپنی سرحدوں کا تحفظ کرے اور اس طرح سے کنٹرول کرے کہ اس کے ملک میں دہشت گرد عناصر اپنا کوئی اڈہ نہ بنا سکیں ۔
انھوں نے راسک میں ہونے والے حملے کے مقام کا معائنہ کرتے ہوئے کہا کہ یہی وہ جگہ ہے کہ جہاں سامراج سے وابستہ عناصر نے امن و سلامتی کے کئی محافظین کو نشانہ بنا کر ہلاک کر دیا۔
ایران کے وزیر داخلہ احمد وحیدی نے کہا کہ تحقیقات سے پتہ چلا ہے کہ یہ حملہ آور پڑوسی ملک کی سرحد سے ایران کی سرحد میں داخل ہوئے اور رات کی تاریکی اور علاقے کی جغرافیائی صورت حال سے فائدہ اٹھاتے ہوئے راسک کے پولیس اسٹیشن تک پہنچنے میں کامیاب ہوگئے اور اس پولیس اسٹیشن کو نشانہ بنایا۔
انہوں نے کہا کہ ان عناصر کو کیفر کردار تک پہنچایا جائے گا۔
