بلوچستان کے ضلع کیچ میں پاکستانی فورسز سی ٹی ڈی کے ہاتھوں چار نوجوانوں کے جعلی مقابلے میں قتل کے بعد آج چوتھے روز بھی احتجاجی دھرنا جاری ہے۔
تربت کے شہید فدا چوک پر مقتول بالاچ بلوچ کے لواحقین سمیت دیگر سیاسی و سماجی افراد اور جبری لاپتہ افراد کے لواحقین گذشتہ چار روز سے زیرحراست افراد کے قتل کیخلاف سراپا احتجاج ہیں۔
گذشتہ روز سینکڑوں کی تعداد میں لوگوں نے میت کے ہمراہ سیشن کورٹ تک احتجاجی ریلی نکالی جبکہ اس دوران تربت بازار میں مکمل شٹرڈاؤن رہا۔
بروز ہفتہ مقامی عدالت نے ایس ایچ او تربت سٹی تھانہ کو سی ٹی ڈی کے آر او سمیت نامزد اہلکاروں کیخلاف مقدمہ درج کرنے کی ہدایت کردی، لیکن ذرائع کے تاحال ایف آئی آر درج نہ ہوسکی جبکہ گذشتہ رات ضلعی حکام اور مظاہرین کے مابین مذاکرات ناکام رہیں۔
تربت مظاہرین سے اظہار یکجہتی کیلئے وائس فار بلوچ مسنگ پرسنز کے رہنماء ماما قدیر بلوچ گذشتہ روز تربت پہنچے جو تاحال مظاہرین کے ہمراہ ہیں۔
مظاہرین بالاچ بلوچ کے حراستی قتل میں ملوث سی ٹی ڈی و دیگر اہلکاروں کی گرفتاری کا مطالبہ کررہے ہیں۔ مظاہرین جبری گمشدگیوں اور جعلی مقابلوں کے خاتمے بھی مطالبہ کررہے ہیں۔
یاد رہے کہ بالاچ مولا بخش کو 23 نومبر کی رات سی ٹی ڈی نے دیگر تین زیر حراست افراد کے ہمراہ پسنی روڈ تربت میں ایک مبینہ مقابلے میں قتل کرنے کا دعویٰ کیا تھا۔
بالاچ کی فیملی کے مطابق اسے 29 اکتوبر رات 12 بجے آپسر میں گھر پر چھاپہ کے دوران جبری غائب کیا گیا اور 12 نومبر کو اسے اے ٹی سی تربت کے سامنے پیش کرکے دس روز کا ریمانڈ کیا گیا۔
جعلی مقابلوں میں جبری لاپتہ افراد کے قتل کے خلاف گذشتہ روز دارالحکومت کوئٹہ میں احتجاجی ریلی نکالی گئی اور مظاہرہ کیا گیا جبکہ بلوچ یکجہتی کمیٹی نے حب میں احتجاجی مظاہرے کا اعلامیہ جاری کیا ہے۔
اعلامیہ کے مطابق آج بروز اتوار بلوچ یکجہتی کمیٹی کراچی اور بلوچ یکجہتی کمیٹی حب مشترکہ طور پر بلوچستان میں موجودہ مارو پھینکو پالیسی کے خلاف احتجاجی مظاہرہ کرینگے۔
پاکستانی فورسز کے ہاتھوں بلوچ نوجوانوں کے قتل کے خلاف تربت میں تیسرے روز احتجاج جاری، مظاہرے میں وائس فار بلوچ مسنگ پرسنز کے چیئرمین ماما قدیر بلوچ کی شرکت
مظاہرین جعلی مقابلوں میں جبری لاپتہ افراد کے قتل کی بندش اور لاپتہ افراد کے بازیابی کا مطالبہ کررہے ہیں۔ pic.twitter.com/6PdCWB2PpP— The Balochistan Post (@BalochistanPost) November 25, 2023
