اترپردیش میں سابق ایم پی عتیق احمد بھائی سمیت کیمروں کے سامنے قتل

وکیل نے بتایا کہ ’میں ان کے قریب ہی کھڑا تھا جب ان پر نزدیک سے گولیاں چلائی گئیں۔‘

گینگسٹر قرار دیے جانے والے عتیق احمد کا بیٹا اسد دو روز قبل ہی اتر پردیش میں ایک پولیس مقابلے میں مارا گیا تھا۔

 واقعے کے بعد تین افراد کو حراست میں لیا گیا ہے۔ پولیس کا کہنا ہے کہ حملہ آور صحافیوں کے بھیس میں آئے تھے۔

واقعے کی فوٹیج میں دیکھا جا سکتا ہے کہ عتیق احمد اور ان کے بھائی اشرف صحافیوں سے چلتے ہوئے بات کر رہے ہیں کہ اچانک فائرنگ ہوتی ہے۔

عینی شاہدین کا کہنا ہے کہ دونوں کو سروں میں گولیاں ماری گئیں اور وہ موقع پر ہی ہلاک ہوئے۔

پولیس کا کہنا ہے کہ واقعے میں ایک پولیس اہلکار اور ایک صحافی بھی زخمی ہوا۔

وزیراعلٰی یوگی ادتیاناتھ نے واقعے کی تحقیقات کا حکم دیا ہے اور اس کے لیے جوڈیشل کمیشن بھی بنایا گیا ہے۔