بلوچستان نیشنل پارٹی ضلع کیچ کے ترجمان نے اپنے ایک بیان میں کہا کہ گزشتہ دنوں ضلع کیچ کے علاقے ہوشاپ میں سیکورٹی فورسز کی جانب سے گھروں پر چھاپے لوگوں کو بلاوجہ خوف و حراس میں مبتلا کرنے اور آٹھ افراد کو لاپتہ کرنے کی شدید الفاظ میں مذمت کرتے ہیں-
انہوں نے کہا کہ بلوچستان میں لوگ ریاستی اداروں سے محفوظ نہیں حکومت اور ملکی اداروں کا فرض ہے کہ وہ شہریوں کی حفاظت کریں ملک کے اندر ہر شہری کو آزاد حیثیت سے جینے کا حق دیں لیکن بدقسمتی سے آج دن تک بلوچستان میں لوگ ملٹری آپریشن سہہ رہے ہیں-
انہوں نے کہا کہ سی ٹی ڈی کے نام پر لاپتہ افراد کو جعلی مقابلوں میں شہید کرتے ہیں یا گھروں پر چھاپہ مار کر چادر اور چار دیواری کی پامالی کے بعد نوجوان، بچوں، بوڑھوں اور خواتین کو تک گرفتار کرکے لاپتہ کیا جاتا ہے جو انسان کے بنیادی حقوق اور مہذب معاشرے کی کھلی خلاف ورزی ہے لیکن یہ استحصالی پالیسی کا سلسلہ بلوچستان میں جاری وساری ہے۔
انہوں نے کہاکہ اربابِ اختیار سے اپیل کرتے ہیں کہ بلوچستان میں جاری ظلم و جبر اور غیر آئینی و غیر جمہوری اقدام کا نوٹس لیا جائے ایسے حرکات میں ہونے والے نقصان پورے ملک کو بھگتنے پڑیں گے۔
