درزی یونین کے صدر اللہ ڈتہ کی قیادت میں سول اسپتال ڈیرہ مراد جمالی کے ایم ایس اور ٹرامہ سینٹر عملے کے خلاف ڈیرہ مراد جمالی میں ایک ریلی نکالی گئی جس میں شہریوں کی کثیر تعداد نے شرکت کی۔
احتجاجی ریلی شہر کے مختلف راستوں سے ہوتےہوئے اللہ والے چوک بے نظیر بھٹو پریس کلب کے سامنے اختتام پذیر ہوا جہاں ریلی کے شرکاء نے دھرنا دیکر احتجاج ریکارڈ کروایا اور ڈویژنل ہیڈ کوارٹر ہسپتال کے ایم ایس، ہسپتال و ٹراما سینٹر کے عملے کے خلاف شدید نعرہ بازی کی گئی۔
درزی یونین کے صدر اللّٰہ ڈتہ، سنی تحریک کے رہنماء مولانا نواب دین ڈومکی، انجمن تاجران نصیر آباد کے سیکرٹری جنرل لیاقت علی چکھڑا، امداد مری، سید گل شاہ سمیت دیگر نے خطاب کرتے ہوئے کہا کہ ٹراما سینٹر اور سول ہسپتال میں دوائیاں نا پید ہیں جبکہ ڈاکٹروں سمیت عملہ غائب رہتا ہے۔
انہوں نے کہا ویکسین تو موجود ہی نہیں، حادثات سے متاثرہ اور دیگر ایمرجنسی کے مریضوں کو بھی دوائیاں باہر سے لیکر آنے کا کہا جاتا ہے۔ ایم ایس سول ہسپتال اپنی ذمہ داریاں پوری کرنے میں بری طرح ناکام ہوچکے ہیں۔
انہوں نے کمشنر نصیر آباد ڈویژن اور سیکریٹری ہیلتھ سے سول ہسپتال کے حالت زار کے حوالے سے نوٹس لینے کی اپیل کی ہے۔
