خدا بے ڈس مسونے – امر جلیل | عتیق آسکوہ بلوچ

خدا بے ڈس مسونے

نوشت: امر جلیل | مٹ: عتیق آسکوہ بلوچ

دی بلوچستان پوسٹ

منہ دے آن خدا بے ڈس مسونے، کنا سنگت ءِ، ننا اسٹ ایلو تون جیڑہ ہم متوسس بس سلوک سلوک بے ڈس۔ منہ ساہت اکن کنے گمان مس کہ خدا ءِ پک بے ڈس کروک آک بے ڈس کرینو، اوفتا رہی آن واپس بننگ بھلو خواری ئسے، خدا داسہ ہچبر واپس بروف و اگہ وختس واپس بس تو او کنے درست کپرو بلکن کس ءِ ہم درست کپرو تینا خدائی ءِ ہم گیرام کرو داڑ اسکان کہ اودے تینا پن ہم یات مفرو۔

انتیکہ بے ڈس کروک آتا رہی آن واپس مننگ آن گڈ زیات اندن مریک، اسہ وار ننا سنگت دھنی بخش ءِ بے ڈس کننگاسس، سیال و قریب آک گمان کریر کہ خلنگانے، ولے ناگمان تینا پنچمیکو سال دے آ فریشانی نا حالیت تون واپس بس، مغفرت کن دعا کروک آتیتون توس و دوتے بڑز کریسہ تینکن مغفرت و جنت الفردوس اٹ ہند اس خواہنگا آ لگا، مخلوق درست کرے، اُرا نا تہٹی دریر، او تینا زائیفہ ءِ تاتہ و تاتہ ءِ تینا زائیفہ سرپد مس، تینا ہلہ ءِ طالبان نا شہید اعظم ضیاء الحق سرپد مس، اینو پگہ گدو بندر (حیدر آباد نا تاریخی آ گنوک آتا ہند و ساڑی دماغی ناجوڑی تا بھلا ہسپتال) ئٹ بند ءِ و رنگ آتا فرخ ئٹ اڑینگوک ءِ، وانگڑ ءِ مولی و مولی ءِ وانگڑ سرپد مریک۔ کنے خلیس ئس کہ بے ڈس کروک آک خدا تون ہم دھنی بخش آنبار کروک مفس، خدا اگہ پیہن و مون نا فرخ ءِ بے خیال کرے گڑا کاروکاری نا جاگہ غا او پیہن و پیہنی کریسہ کسفو، خلیس تون اڑینگوک کنے گمان مس کہ خدا آخر ہراتم خدا ءِ، بے ڈس کروک آتے بے ڈس کریسہ واپس برو، کنے آن بیدس مننگ کپرو، ای ہم اوڑان بیدس مننگ کپرہ، کنے یخین ءِ کہ خدا واپس برو، ولے کنا سیال، سنگت و دژمن تا پاننگ ءِ کہ کنا خدا واپس بفرو، اوفتا ردئٹ ای ہرادے خدا سرپد مسونٹ او گواچن ئٹ سرگواسی گوپال داس نا روح ءِ، سرگواسی گوپال داس کنا ہم سن ئس و پیری ئٹ دین ءِ مٹ کریسہ مسلمان مسوسس، خُلوک اس ئس اندا سوب سنت کرفتوسس، پن خدا بخش تخاسس ولے خدو نا پن ئٹ پنی ئس، روچہ نماز نا پکا ئس، پنچ وخت مسیت ئٹ خننگاکہ۔

اسہ دے مولوی صاحب خدا بخش عرف خدو ءِ اسہ کنڈ اسیٹی درے و پارے کہ بِن خدا بخش نی ہراتم اسکان سنت کرفپیسہ او وخت اسکان پک ءُ مسلمان اس مننگ کپیسہ، خدا بخش عرف خدو لڑزہ ٹی بس، اوڑا بیم تالان مس۔ ٹَک خلک کہ دین ءِ مٹ کریسہ اسیکہ وا گوپال داس مریو گڑا سنت کرفنگ آ بچیوہ، سنگت آتون صلہ کرے، سنگت آک خبڑدار کریر داسہ واپس دین ءِ ہلاس مرتد مریسہ کہوس، واجب القتل پن کننگوس و خلنگوس، داسہ نا مرضی ءِ کہ زند ءِ بچفسہ یا سنت ءِ بچفسہ۔۔۔۔ خدا بخش زند ءِ گچین کرے، سنگت آک کاٹم آ دستار تفیر، لخ ئٹ پُھل آتا ہار شاغار و نائی نا رہی آ دریر، او وخت اسکان خلیس ئٹ خدا بخش نا نیم ساہ ہنیسہ کرے، چچی آنبار لرزہ ٹی بس، سنگت آک بٹیسہ دوٹی ہلکر تا، نت دو خلک، بیوس آ نائی آن رد اس مس و اِٹ کرے، استرہ خدا بخش نا کاریم ءِ لُڑفیسس، داخس دتر وہا کہ ہسپتال سر مننگ اسکان ساہ تس، داٹی ہچو شک اس اف کہ خدا بخش نا کہنگ آ کنا اُست بھاز ہسون مس ولے دا اسل رد ءِ کہ خدا بخش نا روح کنتون حوال ئٹی ءِ یا ای خدا بخش نا روح تون حوال ئٹی اٹ۔

ای ہراتم آن ہوش سنبھالان اٹ خدا کنتون ءِ، ای ہراتم کھلونہ غاتیتون گوازی کریٹہ او وخت خدا ہم کنتون اوار تولسہ گوازی کریکہ، ای گلی ٹی ٹِلی کریٹہ گڑا خدا کنتون ٹِلی کریکہ، اسکول ئٹ، کالج ئٹ، یونیورسٹی ئٹ کنتون مسکہ، کنتون اوار سینیما ئٹ فلم اُراکہ، دا ہمو دے تا ہیت ءِ ہراتم سندھ نا مغل اعظم صدر کراچی ئٹ سینیما نا پیشن ٹکٹ بلیک ئٹ بہا کریکہ او وخت اسکان شہزادہ سلیم ودی متویسس۔

کنا پاننگ نا مطلب ءِ کہ خدا کنا وہم اف، او ساڑی ءِ، ای اوڑان بیدس پورو افٹ، او کنے آن بیدس پورو اف، ای اریٹ تو او ارے، او متوکہ گڑا ہچس متوکہ، نئے ڈیہہ نہ آسمان نہ طوبے نہ دے نہ استارک، نہ مش نہ چیل نہ ریگستان نہ جنگل نہ دریا نہ انسان نہ سوئر، ہچس ہم متوکہ، او ارے گڑا ہر گڑا ارے، خدا ٹی بھازا جوانیک اریر، او سوختہ مفک، او کس آن بیر ہلپک، کس ءِ بیم بش کروک عذاب آتیان خلیفپک، کس ءِ داد ئنا جوفہ تفک، کس آن قربانی خواپک، کس ءِ عبادت کن بیوس کپک، خدا نا جوانی تا لڑ بھاز مرغن ءِ ولے خدا ٹی اسہ اِرا خامی ہم ارے دنکہ خدا ہچس کُننگ کپک، نہ برگر نہ بریانی، دا سرپد مفیرے کہ گڑاس کُننگ آن خدا نا ہاضمہ خراب مریک، نئے نئے دنو ہچو ہیتس اف۔

اسہ وار خدا کنتون لاہور آ بس، پھجے نا ہوٹل ٹی تولوک ئسون، ای تولوک سرپاچہ کُننگ ئسوٹ، خدا خنتے خلوک کنے اوننگ ئس، ای اسہ باخو اس خدا نا پارہ غا مریفسہ پاریٹ کہ اسہ باخو اس کُننگ آن کہیپیسہ، خدا پارے کہیرہ تو انسان آک۔۔۔ ای خدا اٹ ای کہیپرہ، ای سوج کریٹ گڑا انتکن کنپیسہ؟ پارے کنیرہ بیرہ بندغ آک، ای خدا اٹ ای ہچ کنپرہ، ای پاریٹ سہی ءِ نا بشخ ئنا سرپاچہ ءِ ای کنیوہ، پارے ولے اسہ ہیت اس یات تخس، نی چاہے پھجے نا سرپاچہ نا دئے دیگ ہم کنیس چٹفس ولے نی پاکستان نا وزیراعظم مننگ کپیسہ۔۔۔۔

اسہ وار ای خدا ءِ سرگڑدار کریٹ، ای سوج کریٹ کہ نی اسہ لکھ بیست و چار ہزار نبی رادہ کرینس اوفتیٹ اسہ زالبول اس ہم اف، اسہ زالبول ئسے نبی کتوس۔۔۔ نی انتکن دن کریس؟ ورندی تننگ نا جاگہ غا داڑے ایڑے اوننگ آ لگا، ای پاریٹ کہ کنے سما ءِ نی انتکن دُن کریس انتیکہ نے لمہ و لمئی مہر نا بارہ ئٹ ہچس سما اف۔

کنا پارہ غا اریسہ پارے کہ کنتو مریسہ نی تینے خدا سرپد مننگ آ لگانس؟
ای پاریٹ کہ ای بخت والا ئسے اٹ کہ ای خدا افٹ، کنے اسہ لمہ اس ودی کرینے، اندا سوب کنے زالبول نا عظمت نا گمان ارے۔
خدا نی بخت والاس افیس کہ نے لمہ اس ودی کتنے، اندا سوب نے سما اف کہ اسہ لمہ و لمہ نا مہر انتس مریک، اگہ سما مسکہ گڑا دئے پانزدہ زالبول ءِ ہم نبی کریسہ الّمی رادہ کریسہ، نی دا جہان ءِ نرینہ تیکن جوڑ کرینس، راوان و بدروح تیکن جور کرینس۔۔۔
خدا پارے کہ پاسہ گڑا نے داسہ زالبول اس کیو؟
ای دمدستی تون پاریٹ کہ دنو ظلم کپیس، کنا چار اُرائی ءُ و چار پیشن والا، ای زالبول اس جوڑ مسوٹ گڑا برامی زند ئٹ ہڑاند اس برو، شرعی ویل اس ودی مرو و اسلامی جمہوری مملکت خداد نا آئین ئٹ ترمیم کروئی تمو۔۔۔

خدا ءِ بخت متئو کہ خدا نا لمہ اف، اودے کس ودی کتنے۔۔ خدا نا اسہ پین خامی اس بھاز افسوز نا ئسے، دڑد تروک ءِ، اُست ءِ ہسون کروک ءِ، کائنات نا ہر مخلوق کن جوڑی ودی کرے، نر چُک اکن مادہ، شیر اکن مادہ شیر، بندغ و سوئر آتیکن ہم جوڑی تخلیق کرینے ولے تینے تنیا تخا، تینکن مادہ ودی کتئو، چھڑا چھانڈ ءِ جہان شک ئنا چمشانک تون اریک، خدا اگاں بندغ اس مریسہ جہان اٹ برے گڑا اودے ہندی مننگ کن کس کرایہ غا اُرا اس ہم تف۔

جُوانیک انداخس کہ اوفتا حساب اف ولے خدا نا اسہ پین خامی اس کنے کُٹہ کیک، تولوک تولوک پائک کہ خوابو، انتس کہ خوارے، تیوی جہان کنے آن خوائسہ بسونے نی ہم خوا۔۔۔
ای پاوہ کہ نی بیرہ خدا مہ فضول ئٹ سر وزیر مفہ، کنے نے آن ہچو کنٹریکٹ ئسے نا خواست اف۔۔
دُن ءُ ورندی اس بنیسہ خدا دیخہ در ہم سوختہ متئو، دا خدائی سفت ئسے ہرا ننے ٹی اف۔

اسہ وار منگھو پیرنا مگر مچھ آتا رہی آ سلوک ئسون، اسہ دم تون پارے کہ نی کنے آن گڑاس خوا، نی خواپیسہ انتئے، گراس تو خوا۔۔
کنا ملی پیری کرے، است اٹ بس کہ دھکہ ایتیو مگر مچھ آک کنیر تا۔
داڑان مُست کہ خدا ءِ دھکہ ایتوسٹ، ای تینٹ لغوشت کریسہ تلاپ نا رہی آ تولوک بھلا مگر مچھ آتا نیامٹ ہناٹ تماٹ، مگر کچھ آک ہچ سُرتویس، گوڑینگاٹ، خدا آن سوج کریٹ کہ دا مش ئنا ڈوک آتیانبار آ مگرمچھ آک داخہ جانبڈ انتکن ءُ، خدا ورندی تس کہ دا سندھی مگرمچھ ءُ۔

اسہ وار نن بوٹ بیسن ٹی پیری کننگ ئسون، یکدم خدا پارے کہ کنے آن گڑاس خوا، پار انتکن خواسہ۔۔
ای پاریٹ کہ کنے کترینہ کیف ات ایت، ای کترینہ کیف آ عاشق مسونٹ، کترینہ کیف ات ایت۔
خدا پارے اڑے چادی، اسہ کترینہ کیف اکن اِرا ملک ئنا نیامٹ ایٹمی جنگ کرفسہ انت۔
ای سوج کریٹ کترینہ کیف نا اہمیت کشمیر آن ہم زیات مسونے انت۔
پارے کہ کترینہ کیف کن مسٹمیکو جہانی جنگ نا گمان ءِ، ای نیکن جہانی امن ءِ خطرہ ٹی شاغپروٹ۔
ای پاریٹ نی ہم کنتون مریسہ مریسہ پیری تروک اس مسونس، ہیت ءِ چپ شاغاس۔

اوکان گڈ خدا کنے ہچ سوج کتئو کہ خوا انت خواسہ، و اوکان گڈ بھاز دے اسکان خدا کنے گڑا خواہنگ نا پاتئو۔ ای است اٹ خوش ئسوٹ کہ تنک کروک آ ہیت خدا نا ذہن آن پیشن مسونے، ہراڑا ای بھاز تنک مسوٹہ، خوا، منت کہ، کنے آن گڑاس خوا۔۔۔
خدا نا دا ہیت کنے ہچبر دوست بتوکہ، کنا عزت نفس ءِ مجروح کریکہ۔
اسہ وار ای داخس سوختہ مسوسٹ کہ صدر نا نیام آ چیہانٹ کریسہ پاریٹ فقیر اس افٹ۔۔۔۔ ای پنڈوخ ءُ پخیر اس افٹ۔۔۔۔۔۔ ای پنڈوخ اس افٹ۔۔۔۔۔۔۔۔ بننگ اس نہ خدا۔۔۔۔۔۔۔۔ ای نے آن پنڈہ خواپروٹ۔۔۔۔۔۔۔۔

کنا چیہانٹ ءِ بنیسہ مخلوق مچ مس، کنے آن بیدس کس خدا ءِ خننگ اَلو، اسہ پیر ءُ جوگی اس کنا کوپہ غا دو تخا، و پارے کہ دیر پائک نی پنڈوخ ئسے اُس۔۔۔۔۔ نیتون دیر پاننگ ءِ کہ نی کس آن پنڈہ خوا۔۔۔
ای خدا نا پارہ غا اشارہ کریسہ پاریٹ کہ دا پائک کہ کنے گڑاس خوا۔۔
کنے آن گڑاس خوا۔۔۔ کنے آن گڑاس خوا۔۔۔۔۔۔ ای ہچس خواپرہ۔
ای پنڈوخ اس افٹ۔۔۔
ای پنڈوخ اس افٹ۔۔۔
مخلوق دانگ اینگ اُرا، کس ہچس خنتو، کنے چادی سرپد مریسہ کنا حالیت آ ہلیسہ افسوز کریسہ ہنار۔

ولے کنا خوشفہمی اُرے اسکان سلتو، اسہ وار مفروک ءِ مروک کننگ کن ای سیم سر آن ایمون مریسہ ایلو پارہ غا ہناٹ سلیسٹ، کیکر نا درخت نا مون آ کُٹ ءِ تورسہ بیر خوائنگ آ لگاٹ، گڑا خدا نا توارے بنگٹ۔۔۔ کیکر آن بیر خوائنگ اُس۔۔۔ کنے آن خوا انت خواسہ۔
کنا پد آن بسوسس سلیسوسس۔
ای پاریٹ فضول اٹ بھلنی نشان تفہ، کنے سما ءِ نی ہچس تننگ کپیسہ۔
پاننگ آ لگا کہ اڑے نی گڑا خوائسہ تو اُر۔
ای پاریٹ نی فضول اٹ ضد کپہ خدا، کنے تننگ کن نیتون ہچ ہم اف۔
پارے ای خدا اٹ، ای ضد کپرہ، اینو خوا۔۔۔۔ انتس کہ خواسہ خوا۔
انت کہ است نا خوائے۔
ای پاریٹ سوچ خل۔
پارے سوچ بندغ آک خلیرہ، ای خدا اٹ، خوا انتس کہ خواسہ۔۔۔
ای پاریٹ سہی ءِ۔۔۔۔ اگہ تننگ کیسہ گڑا کنے تینا خدائی ءِ ایت۔۔۔۔ و تینٹ کنے آنبار بندغ اس مہ۔۔۔
کنے تینا خدائی ءِ ایت۔۔۔
و تینٹ بندغ اس مریسہ بہ۔
بس دوارہ چُھپی۔۔۔۔ اسل چُھپی تالان مس۔۔۔۔
دنکہ کرن آک گدرینگانو۔
ای چک ءِ ہڑساٹ اُراٹ
خدا بے ڈس مسوسس۔۔۔۔۔۔۔۔۔۔۔۔۔۔

_______________
اُردو مَٹ: ٹھاکر ظہیر حسین