پاکستان کے وزیراعظم عمران خان نے کہا ہے کہ بلوچستان کے علاقے مچھ میں مارے جانے والے ہزارہ برادری کے دس کان کنوں کے لواحقین ان کی تدفین کر دیں تو وہ آج ہی کوئٹہ چلے جائیں گے۔
ان خیالات کا اظہار عمران خان نے آج بروز جمعہ کو سپیشل ٹیکنالوجی زون اتھارٹی کے اجرا کے موقع پر ایک خطاب میں کیا انہوں نے کہا کہ تدفین کے لیے وزیر اعظم کے آنے کی شرط رکھنا مناسب نہیں ہے۔
انہوں نے وزیراعظم کے کوئٹہ آنے کے مطالبے پر کہا کہ پھر ہر کوئی (مجھے) وزیر اعظم کو بلیک میل کرتا رہے گا
انہوں نے کہا کہ یہ حکومت پوری طرح ہزارہ برادری کے ساتھ کھڑی ہے اور لواحقین کو یقین دلاتے ہیں کہ انہیں تنہا نہیں چھوڑیں گے.
انہوں نے کہا کہ جتنا ظلم ہزارہ برادری پر ہوا پاکستان میں کسی پر نہیں ہوا، نائن الیون کے بعد ہزارہ برادری کو ظلم و ستم کا نشانہ بنایا گیا۔
حسب روایت انہوں ایک مرتبہ پر بھارت کو تنقید کا نشانہ بنایا اور کہا کہ ’بھارت پاکستان کے خلاف سازش کر رہا ہے۔
خیال رہے کہ رواں سال 3 جنوری کی شب بلوچستان کے ضلع بولان کے تحصیل مچھ کے علاقے میں مارے جانے والے ہزارہ برادری کے دس کان کنوں کے لواحقین گذشتہ چھ روز سے کوئٹہ میں میتیں رکھے دھرنا دیے ہوئے ہیں اور ان کا مطالبہ ہے کہ وزیر اعظم ان سے ملاقات کریں۔
