سابق وزیر اعلیٰ بلوچستان اور چیف آف سراوان نواب اسلم رئیسانی نے بلوچ طالب علم حیات بلوچ کے قتل کی جوڈیشل انکوائری کا مطالبہ کرتے ہوئے کہا ہے کہ بلوچستان ہائی کورٹ کے چیف جسٹس کی سربراہی میں جوڈیشل کمیشن تشکیل دی جائے جس میں پاکستان بار کونسل کے صوبائی صدور بطور ممبران شامل ہوں۔
اسلم رئیسانی نے مزید کہا ہے کہا کہ مریم نواز شریف کے ساتھ جو واقعہ پیش آیا یہ ریاستی دہشت گردی ہے جس کی جتنی بھی مذمت کی جائے کم ہے، اب مسلم لیگ (ن) کو وفاق پاکستان میں بسنے والی قوموں کے حقوق کے جدوجہد میں بھرپور حصہ لینا چاہیئے۔
انہوں نے کہا کہ چینی مزدوروں نے فورسز کے جوانوں کو زدوکوب کیا اور ان کی گاڑیاں چھین لیں، سی پیک کا آغاز ایسا ہے تو قرضوں کے ذریعے گلے میں موت کا پھندا ڈال کر گھیرا تنگ کیا جائے گا۔
یاد رہے گذشتہ دنوں بلوچستان کے ضلع کیچ میں تربت آبسر کے مقام پر پاکستانی فورسز نے ایک بلوچ نوجوان حیات مرزا بلوچ کو انکے والدین کے سامنے پکڑ تشدد کے بعد گولیاں مار کر اس وقت جاں بحق کردیا جب وہ اپنے والد کے ہمراہ کجھور کے ایک باغ میں کام کررہے تھے۔
