نیشنل پارٹی کے سینئر رہنماء سینیٹر میر حاصل خان بزنجو نے حکومت سے مطالبہ کیا ہے کہ 23 جولائی کو بارکھان میں قتل کئے گئے صحافی انور جان کھیتران کے قاتلوں کو فوری طور پر گرفتار کیا جائے۔
ایک بیان میں میر حاصل خان بزنجو کا کہنا تھا کہ یہ انتہائی بدقسمتی کی بات ہے کہ حکومت کی بدعنوانی اجاگر کرنے والی آواز کو خاموش کرنے والے مجرموں کی گرفتاری کے لئے ابھی تک کوئی ٹھوس کارروائی نہیں کی گئی۔
حاصل خان بزنجو نے کہا کہ پاکستان دنیا میں صحافیوں کے لئے سب سے خطرناک ملک بن گیا ہے لیکن بدقسمتی سے حکمران صحافی برادری کو تحفظ فراہم کرنے کے لئے کچھ نہیں کررہے۔ میڈیا کے افراد پر حملوں کے پیچھے ریاست کے طاقتور عناصر، بااثر سیاستدان اور مختلف مجرم ذہنیت والے لوگ ہیں۔ موجودہ وقت میڈیا کے لئے سب سے مشکل وقت ہے۔
حاصل بزنجو نے اس عزم کا اظہار کیا کہ انور جان کے قتل اور صحافتی برادری کے مسائل کو تمام فورمز میں اٹھایا جائے گا۔
