براہوئی زبان نا پُر فکرا شاعر”ظہورصدیقی” نا شئر آتیا تالان اولیکو کتاب “پِر آن پد” آماچ ادبی دیوان مستونگ نا پارہ غان شینک مس۔
کتاب نا پد پنہ غا پنی آ شاعر و ادیب سید غریب شاہ انجم تینا خیال آتا درشانی ءِ ’’سوگوْ آ ہمت آتا علامت‘‘ نا سرحال تون کریسہ پائک ’’توبے آمبار روشنائی، استار پنی ءُ لوز منہ، مہر نا حرف آتے کل ءِ دے ٹکی و دیکی بلینگ نا ساعت آتا پُدینی و حساس تبی ءِ۔ جل تیٹی مدام دیر تا روانی ءِ، خل تا کشادہ غا سینہ غاتیان تِرک کروکا گواڑخ آتا سوگوْ آ ہمت ءِ، نل تیان پیش تموکا زیمل آتے، تل مروکا اُست ئنا لکیراتے و پل مروکا ڈغار نا لیک آتے نن لکھن، تُولن سوچن تو محترم خلیفہ قادر بخش ابابکی نا پُر ہمت، پُرمہر و پُر جوزہ غا مڷ ’’ظہور صدیقی‘‘ نا ہشست پہلو آ شخصیت و ادبی دروشم ننا مونا بریک۔
او مستی پائک کہ مسہ مارچ 1975 نا دے خلق شیریں آپ مستونگ نا گلزمین آ ودی مروکا ظہور صدیقی 1989 ٹی ادبی پڑ آ تینا اولیکو گام ءِ تخسا درستی راستی مریک، حاجی محمد حسن غمخوار، حاجی شاہ بیگ شہدا و استاد رحیم ناز استا پُدین آ ادبی سیخا، حمید عزیزی آبادی، فیض بولانی، ملک فیاض علی بلوچ، بشیر احمد شاد و احسان وسیم و راقم استا پُرمہر آ سنگتی و ہمکوپئی ٹی سال 1992 نا دے ئس فتح محمد شاد و اوکان پد استاد صابر ندیم استا شاگردی نا شرف ءِ دوئی کیک۔
غریب شاہ انجم مُستی ظہور صدیقی نا بابت نوشتہ کیک کہ ادب نا پڑا شاعری آن بیدس کالم نویسی نا بشخ ٹی ہم اسہ بھلو پن اس کٹسا شعر پاننگ (گلوکاری) نا میدان ٹی ہم تینا لائخی تے درشان کیک، دو ئنا پوریا کرسا زند ئنا سختی سوری تے سگسہ اسہ دے ئس متحدہ عرب امارات نا کسر ءِ ہلیک کہ زندہ نا ویل آتیان آسراتی دو برے۔
او پائک کہ ظہور صدیقی اینو پگہ تینا ادبی تنظیم گوشہ ءِ براہوئی نا بنجائی کماشی تون تینا بولی نا شونداری و شینکاری نا فرض آتے ایسری تننگ ٹی ءِ۔ ظہور صدیقی تدوکا دور باری نا اسہ پُر ءُ کتاب ئسے، اونا شاعری راج ٹی زند ئنا آدینک ءِ، دا آدینک ءِ پِر ئنا پڑیک وختس اندن سفا کیرہ کہ پر آن پد دا راج آدینک ٹی تینا بد رنگ آ دروشم ءِ خننگ تون مون ءِ ہڑسک۔
بلوچستان ادبی فورم کتاب نا شینکاری آ امیت و استخواہی نا درشانی کریسہ ظہور صدیقی تون اوار آماچ ادبی دیوان ءِ مبارک بادی تسونے و پارینے کہ ظہورصدیقی و آماچ ادبی دیوان راجی زبان وادب نا شونداری و شرحالی کن تینا تخلیقی، علمی، ادبی جُہد ءِ ہندا ڈول خواری و خلوص تون برجا تخور
