دھکان روزی کَد سرپد بیت؟
نصیر بلوچ
دی بلوچستان پوسٹ
دھکان روزی ءِ میتگ ءَ چَہ ابید آئی ءِ کر ءُ کَش ءِ میتگ سبز ءُ آباد اَنت، وش ءُ وشھال اَنت، اِلم ءُ زانت ءِ پڑ ءَ باز دیمروی اِش کرتگ، پرچاکہ ھما میتگ ءِ کماش ءُ دھکاناں وتی ڈگارانی سر ءَ جھد ءُ جپاکشی کرتگ، شپ ءُ روچ وتی ڈگارانی سر ءَ جھد کرتگ کہ مئے ڈگار آباد بہ بنت وھدے کہ ڈگار آباد مہ بنت گڑا مئے میتگ چوں دیمروی کرت کنت، پرچاکہ میتگ ءِ وشھالی ءُ دیمروی گوں میتگ ءِ ڈگاراں بندوک اِنت.
دھکان روزی ءِ کَش ءُ کرّ ءِ میتگ ھم روزی ءِ میتگ ءِ وڑ ءَ پدمنتگ ءُ ویران بوتگ اَنت بلے آوانی بن کماشاں وتی میتگانی پدمنتگی پھم اِتگ اَنت کہ بید ء ڈگانی سر ءَ جھد ءُ جپا کشی ءَ دگہ راہ ءُ درے نیست، اگاں ھَور بوتگ یا نہ بوتگ بلے آواں وتی ڈگارانی سر یلہ نہ کرتگ، پد ءَ آوانی یک مزنیں زانتکاری یے اے بوتگ آواں وتی میتگ ءَ دربرجاہ ءُ نادراھجاہ پچ کرتگ دانکہ مئے میتگ گیش دیمروی بہ کنت، وتی بازیں نودربرے آواں مزن مزنیں شھراں پہ وانگ ءَ دیم داتگ دانکہ آ بوان اَنت ءُ مئے میتگ ءَ ھما شھرانی ور ءَ دیمروی دات بہ کن اَنت، پرچاکہ آواں زانتگ اَت اگاں مروچی مزن مزن شھر آباد اَنت گڑا آ اِلم ءُ زانت ءِ برور اِنت.
اگاں مروچی آوانی میتگ ءَ ھَور بیت یا نہ بیت بلے مَشین ءُ ایدگہ شَیاں چَہ ڈگار کِشت ءُ کشان اَنت بلے دھکان روزی ھم ھما وشھالیں میتگانی ھمساھگ اِنت، ڈگار ئِے ھم چَہ آوانی ڈگاراں شرتر اَنت بلے مزنیں بژن یا بدبھتی ءِ گْوش ئے، آئی ءِ جند ءِ ءُ میتگ ءِ مردمانی تہ ءَ اِلم ءُ زانت نیست، اگاں ھَورے بیتگ ڈگار کمو آباد بنت گڑا ھمے پَسھلاں زور اَنت ءُ دل اِش وش بیت مارا باز رس اِتگ، نا میتگ ءَ دربرجاہ ءُ نادراھجاھے ھست نا دگہ وش ءُ وشھالی یے، میتگ انچوش اِنت کہ لشکر جتگ بہ بیت.
دو سے مَشین اِش ھست برے شر ءُ برے ھراب، ڈُک ڈُک ءَ وتی وھد ءِ تِیلانک دیگ ءَ اَنت،دھکان روزی ءِ میتگ ءِ مردم آبادی کن اَنت بلے ھما آبادیانی سر ءَ جھد ءُ جپاکشی نہ کن اَنت گیش پَسل بیماریانی آماچ بنت ءُ سَڑ اَنت، مدام بچار بیماز اِش سُھرروتانی آماچ اَنت یا گَلہ ءُ جَواناں رتی ءَ گِتگ، پرچاکہ دھکان نابلد اَنت ءُ سرپدی اِش نیست اے بیماریانی دیم ءَ چوں بوشت ایں، اے سرپدی اِش ھم نیست کہ اے بیماریانی اِلاج ءِ واستا اِلم ءُ زانت لوٹ اِیت، اے پَسِلانی نادراھی ءِ الاج کنگ ءَ ھم ڈاکٹر ھست بلے اے ناسرپد چے زان اَنت کہ پَسِل ءُ جناورانی واستا ڈاکٹر ھست، پرچاکہ آ انگت مردمانی ڈاکٹر ءَ چَہ زبھر اَنت، انگت ھما وھدی دَور ءِ تہ ءَ زند گُوازینگ ءَ اَنت، بلے انگت دھکان روزی گوں وتی میتگ ءِ مردماں وش اِنت کہ مارا کمو زر رس اِتگ، بلے اے سُد ءَ نہ اَنت کہ مئے ھمساھگ کجا سر اِنت ءُ اما کجا پشکپتگ اَنت، چَہ اے زانت زانگ ءَ دوسد سال پُشت ءَ اَنت بلے پَٹاک ءُ گپ ءَ چَہ درستیں میتگ ءِ مردماں دیم ءَ اَنت، اے بدبھتاناں اے سما نیست اما روچ پہ روچ پدمنتگ ءُ پُشت ءَ روان ایں، برے زھگ اِش پہ گُژن مران اَنت ءُ برے بیماری ءِ آماچ بوان اَنت، اے بدبھتانی یک مزنیں جیڑھے ایش اِنت کہ تپاک نہ اَنت، پمیشکا مروچی پدمنتگی ئِے آماچ اَنت .
اگاں دھکان روزی وتی میتگ ءِ دیمروی ءَ لوٹ اِیت گڑا اِلم ءِ پِڑ ءَ گیش جھد بہ کنت نا کہ وتی میتگ ءِ مردماناں برد ءُ کوڈال بڈ بہ دنت ءُ پد ءَ اے ڈگارانی سر ءَ برو اَنت ءُ مزان اَنت مارا ڈگار چوں کار کنگی اَنت ، دومی تپاکی ودی بہ کنت.
نہ زان آں دھکان روزی کَد سما کنت ءُ ایدگہ میتگ ءِ وش ءُ وشھالیاں پوہ بیت ءُ دیمروی ءِ راہ ءَ جنزان کنت، بلے من ءَ اوست نہ کنت کہ اے کماشیں روزی سُد بہ کنت، بلکیں میتگ ءِ ورنائیں دھکان سرپد بہ بنت ھاں بلے چوناھا دھکان روزی گوں میتگ ءَ بیگواہ بوان اِنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
