اِزمکار – غمخوار حیات | ھلیل بلوچ

آزمانک
اِزمکار

آزمانکار: غمخوار حیات | رجانک: ھلیل بلوچ

دی بلوچستان پوسٹ

آئی ءَ اے اِزم ءِ تہ ءَ اُمرے گْوازینتگ اَت۔۔۔
وڑ وڑیں بُت(مجسمہ) ئِے جوڑ کُرتگ اَت۔۔۔
ساھدارانی۔۔۔ مردُمانی۔۔۔ بے کَساس بُت ئِے جوڑ کُرتگ اَت۔۔۔
بازین دادِن ءُ سَنَد وتی نام ءَ کُرتگ اَت ئِے۔۔۔
چہ وَتی مُلک ءَ ڈَنّ بازین نُمائش ئِے ءَ ھم شُتگ اَت۔۔۔
بَلے آئی ءِ واھَگ ایش اَت کہ آ وتی زِند ءِ یک انچیں شاھِکارے جوڑ بِہ کَنت۔۔۔ یک انچیں بُتے بِہ تْراش ایت کہ چہ آئی ءَ پیسر ناں کہ آئی ءَ چُشیں بُت جوڑ کُرتگ ءُ نیکہ چہ آئی ءَ رَند چُشیں بُت جوڑ کُرت بِہ کَنت۔۔۔

آ ھر وھد ھمے پِگر ءُ ھیال ءِ تہ ءَ گار اَت کہ وتی اِزمکاری ءِ شاھِکار ءَ چےوڑ جوڑ بِہ کَنت۔۔۔

دنیگتا آئی ءَ را ھما نْدارگ دَست کپگ ءَ نہ اَت۔۔۔

آئی ءَ ھر وھد بُتے جوڑ کُت اِنت، ھمے گْوشت ئِے کہ اے منی اِزم ءِ ھما شاھِکار نہ اِنت کہ من ئِے جوڑ کنگ لوٹ آں۔۔۔
اَنچو بِہ زان کہ آئی ءَ وتی اِزم ءِ بُرزی شُون دَیگ لوٹ اِت۔۔۔

یک روچے آئی ءَ ھیال کُت کہ آئی ءَ دُنیا جھان ءِ ساھدار ءُ مردُمانی بُت جوڑ کُتگ کہ گچین کنگ بُوتگ اَنت ءُ نام اِش کَٹّ اِتگ بَلے دنیگتا وتی جِند ءِ بُت ئِے جوڑ نہ کُتگ۔۔۔

ھمے ھیال ءِ سرجم کنگ ءِ ھاتر ءَ آئی ءَ وتی جِند ءِ بُت جوڑ کنگ بُنگیج کُت۔۔۔

آئی ءَ باز بَر ءَ بُت سرجم ءَ جوڑ کُت ءُ پد ءَ پْروشت ئِے، آئی ءَ را دوست نہ بُوت پرچا کہ ھما شاھِکار ءَ آ جوڑ کنگ لوٹگ اَت آ دنیگتا درشان بُوّگ ءَ نہ اَت۔۔۔

اے کار ءِ تہ ءَ آئی ءَ را سالانی سال لگّ اِت اَنت، چہ مھلوک ءَ چَٹ اندیم بُوت۔۔۔

روچ ءُ شَپ وتی کارگِس ءَ نشتگ اَت ءُ بُت ئِے جوڑ کُت، برے سرجم ءَ برے نیم بُندگ ءَ پْروشت اَنت ئِے۔۔۔

مھلوک آئی ءَ را پولگ ءَ اَت، اینگو آنگو سوج ءَ کُرت اِش گُڑا آئی ءِ کَھول ءِ مردُماں گْوشت کہ واجہ انچیں بُتے ءِ جوڑ کنگ ءَ گَٹّ اِنت گْوش ایت ایشی ءَ چہ پَد من دِگہ بُت جوڑ نہ کن آں، اے منی اِزم ءِ گُڈّی شاھِگانی بیت۔۔۔ پمشکا ھما شاھِکار ءِ جوڑ کنگ ءَ روچ ءُ شَپ دزگَٹّ اِنت۔۔۔

مھلوک ءَ اے بارو ءَ اِشکُت تا ھمے شاھِکار ءِ گِندگ ءِ ھاتر ءَ گیشتر بے تاھیر بُوت اَنت کہ اے چونیں بُتے بیت کہ اِزمکار ایشی ءَ وتی اِزم ءِ گُڈّی شاھِکار گْوشگ ءَ اِنت۔۔۔

پد ءَ ھما روچ آتک کہ اِزمکار ءِ شاھِکار جوڑ بُوت کہ ایشی سرجم بُوّگ ءَ پَد آ دِلجم بُوت نہ پْروشت ئِے۔۔۔

وتی جِند ءِ یک انچیں بُتے جوڑ کُرتگ اَت ئِے، اولی دید ءِ گِندگ ءَ گوں مردُم ءَ گْوشت کہ اے آئی ءِ جِند اِنت زِندگ اِنت اوشتاتگ۔۔۔ بَلے ایشی تہ ءَ پَد ءَ آئی ءَ دِگہ کمّی یے دیست۔۔۔

آئی ءَ ھیال کُت کہ اے بُت ءِ تہ ءَ ھَم منی وڑیں مارِشتے ساڑی بِہ بیت۔۔۔ ایشی ءِ تہ ءَ ھم منی اَگل ءُ پَھم منی اِزمکاری ءِ گُشاد سَھرا بِہ بیت۔۔۔

آئی ءَ ھیال کُت ءُ گوں وَت ءَ گْوشت: “اے بُت ءِ چمّ من ءَ دوست نہ بَنت، اے چَمّانی تہ ءَ من ءَ زِندگی ءِ ھِچ وڑیں نشانی یے گِندگ ءَ نئیت۔۔۔ اے بُت ءِ چمّانی دیدگ مُردگ اَنت ءُ تیوگیں بدن ھَم، ھاٹی ئِے ڈولدار اِنت بَلے چمّانی تہ ءَ باید اِنت زِند ءِ یک جَلشکے بِہ بیت اگاں چمّ زِندگ مہ بَہ اَنت گُڑا چے زِندے بیت۔۔۔ باید اِنت مردُم چُشیں اِسپیت چمّے مہ بیت۔۔۔ چمّانی اِسپیت بُوّگ وَ مزنیں شَگانے۔۔۔ من وَ مردے آں۔۔۔ مئے راج ءِ تَہ ءَ اِسپیت چمّ باز بَدیں چَمّے ءَ گوں چارگ بہ اَنت۔”

اے ھَیال ءَ گوں آ چُرتے ءِ تہ ءَ کَپت کہ نوں پَد ءَ بُت ءَ تیوگ ءَ کروج آن ءُ پْروش آں یاں کہ تھنا چمّاں ئِے جوڑ بِہ کن آں۔۔۔
اے نْیام ءَ ھَم آئی ءَ را لھتیں روچ لگّ اِت بَلے ھما آئیڈیا آئی ءَ را دَست کپگ نہ اَت۔۔۔

یک سُھبے مھلّہ آتک وَتی کارگِس ءِ تہ ءَ پُترت۔۔۔ بُت ءِ چمّ ئِے کَشّ اِت اَنت ءُ وتی جِند ءِ دوئیں چمّ ئِے پہ بُت ءِ ھاتر ءَ ایر کُت اَنت۔

دلگوش: اے آزمانک براھوئی لبزانک ءِ نامداریں آزمانکار ءُ کَواس واجہ غمخوار حیات ءِ آزمانکانی کتاب “زِند۔۔۔ زِندان اسے” ءَ چہ گچین کنگ ءُ رجانک کنگ بوتگ۔ اے آزمانک ءِ رجانک کنگ ءِ مول ءُ مُراد براھوئی لبزانک ءُ ساچشت ءَ توامیں بلوچانی گْور ءَ سر کنگ اِنت۔ داں کہ بلوچانی زُبان بلوچی ءُ براھوئی گوں وت ھمگْرنچی ءَ دیمروئی بکن اَنت – رجانکار