گُل ءِ زمین
نبشتہ کار: شاری بلوچ
دی بلوچستان پوسٹ
گُل ءِ زمین زیب ءَ اِت ، زمین ءِ سر ءِ دُراھیں دراچک ءُ دار کُل سیرآپ اِت اِنت ، نہ مردماں گِلگ پِر اِت نہ کہ آدگہ ءَ ساہ دار وبا ءِ آماچ اِت اِنت، بلے انچو سما بوان اَت گُل ءِ زمین ءِ زیبائی درد برُیں زھیرانی آماچ بوان اِنت ،
گُل ءَ زمین ءِ درد سما بوت اَت ، زمین ءَ گُل ءِ درد، ھر دو مھروان اِت اَنت،
گل ءَ سرجمیں دمُک ءُ در گول اِت اِنت نہ شپ ءِ دیست ءُ نہ کہ روچ بلے گُل اِت زمانگ ءِ ھرچ تژنگ ءُ گپ ایر بُرت اَت ، کسہ ءَ گُشت گُل مرچاں گُنوک اِنت ، چوک انی سر ءَ بیھار دنت، لھتیں گُشت اّنا ایش تھنا بیھار دنت بلئلے ھچ نہ اِنت ، ھر وھد ءَ کہ اے گپ گُشگ بوتگ اَت، سیاست ءِ تہ ءَ تژن ءُ شگان یاں مھلونک ءِ نیمگ ءَ چہ سرٹیفیکٹ دایگ کہ “گدارے ” مُناپک ءِ” اے رنگیں ھبرانی ایربرگ گُل ءِ وڑیں با مردے ءِ کار اِت، گلُ سیاست ءِ چیچ ءُ تاب یا سیاست تب آیانی کُلیں ھُنار ءَ سرپد بوگ تئی زانوگی ءِ شاھدی ءَ دنت، بلے ھمیش کہ من جیڑاَں کہ گُل تئی کدر ماں نہ زانت یاں کہ تو وتی جِند ءِ کدر ءُ کیمت وت نہ زانت، ھو واکی سیاست کنگی اِت زمین ءُ مھلونک ءَ چہ درآیگی نہ انت ، بلےچوں سیاست کنگی اَت چوں کار دیم ءَ بُرو اَنت ءُ پد ءَ تئی جند ءِ زِندگ بوگ چنچوں ھژدری انت،؟ اد ءَ چہ لھتیں جُست چِست بنت المی اَِت کہ توچوکانی سر ءَ بیھار داتیں، یاں آ وھد ءَ سیاست ءِ تب ھمیش اِت ، مھلونک ءِ جم کنگ، مُچی ءُ گشتانک کنگ،
اد ءَ چہ من ءَ سبا دشتیاری یاد کیت، بلوچ سیاست ءَ ھوار بلوچ لبزانک ءِ تہ ءَ سبا ءِ بے مّڈیں کرد ءِ، آئی ءِ زندگیں درور آئی ءِ جند ءِ نبشتہ کُتگیں کِتاب بہ بنت یا سید کتابجاہ اِنت ، کہ لبزانک ءِ دُراھیں تھراں ھوار سید سرجم ءَ دست کپ ایت، اے کتابجاہ ءِ چنکس پلگار بوگ ءَ اِنت چنکس نہ اِنت آ دگہ چُستے ِ، بلے جُست اد ءَ ایش اِنت کہ سبا ءَ لبزانک ءِ سر ءَ کار کُتیں، زُبان ءِ دیمروی ءِ سر ءَ یا بلوچ ءِ راج دپتری ءُ سیاست ءِ لبزانک ءِ سر ءَ کار کُتیں ایش المی اَت یا چوکانی سر ءِ بیھار،
لبزانک ءِ پڑ ءَ سبا ءِ جاہ انگت ھالیگ اِنت.
ھمے وڑ ءَ سیاست ءِ میدان ءَ بلوچ رھشونی ءَ گلام مھمد ءِ وڑیں رھشونی ءِ جاہ انگت ھالی اِنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
