ما پرچا گُلام ایں؟
هالد تاج بلوچ
دی بلوچستان پوسٹ
ما پرچا چو بزّگ اِیں وتی زمین ءِ سر ءَ ؟
کس وتی لوگ ءِ توک ءَ درآمد نیل ایت کس وتی ھک ءَ دگیراں ندَنت کس وتی مات ءَ بها نکنت کس وتی دوداں بے هیال نکنت کس وتی لوگ ءَ نہ سوچ اِیت ءُ پُر نکنت پرچا کہ پُر ءزل ھرید نیست !
گڑا ما پرچا وتی لوگ ستکگ ءُ پُر کُتگ اَنت؟
ما پرچا وتی زمین ءِ سر ءَ بزّگ اِیں؟
ما پرچا وتی لوگ ءِ توک ءَ درآمد اِشتگ اَنت؟
ما پرچا وتی ھک دگراناں داتگ؟
ما پرچا وتی مات بها کُتگ؟
ما پرچا وتی دود بے هیال کُتگ اَنت؟
پرچا کہ مئے زمیر مُرتگ ءُ ما بے شھور ایں،جست اِش اِنت مئے زمیر چوں زندگ بیت ءُ مارا شھور چوں کیت اِنت؟
مئے زمیر ھما وهد ءَ زندگ بیت ءُ مارا شھور ھما وهد ءَ کیت ، ھما وهد ءَ ما وتی ڈیھ ءِ بابت ءَ بہ جیڑ ایں ءُ سرپد بہ ایں. مارا ھمے جیڑگ لوٹ ایت کہ ما پرچا گُلام اِیں؟ پرچا مئے سر ءَ دری راج آکھمی کنگ ءَ اَنت ؟
زندگیں زمیر ءُ شھور پیداگ بیگ ءِ ھاتر ءَ اوّلی چیز وانگ ءُ زانگ اِنت،بے وانگ ءُ زانگ ءَ اِچ چیز گرگ کنگ نہ بیت ما باید تاں ھما وهد ءَ بوان اِیں دانکہ ما ھمے سرپد نہ بہ ایں کہ ما گُلام اِیں. ھما وهد ءَ ما وتی وانگ ءَ ساڑی بکن اِیں دانکے مارا شھور بئیت.
ما ھمے سرپد بہ ایں کہ ما گُلام اِیں ما ھمے سرپد بہ ایں کہ مئے سر ءَ دگے راج آکمی کنگ ءَ اَنت ما ھمے سرپد بہ ایں کہ اے زمین مئیگ اِنت ما ھمے سرپد بہ ایں کہ ما بلوچ اِیں ءُ بلوچستان مئیگ اِنت بلوچی براھوی مئے شهدیں زبان اَنت.
ما کہ ایشاں سرپد بہ ایں گڑا مئے زمیر زندگ بیگ ءِ گواھی ءَ دنت مئے شھور مارا وت گندگ ءَ کیت گڑا ھما وهد ءَ ما وت سرپد بہ ایں کہ من ءَ شہمھور ھست ءُ منی زمیر زندگ اِنت.
گیش ءَ چہ گیش ما شریں گِدار، لبزانکی کتاب، راجدپتری کتاب ءُ راستیں کسّہ بوان ایں،وتی ڈیھ ءِ بابت ءَ کتاب بوان ایں، وتی زبان ءُ وتی راج ءَ سرپد بہ بہ ایں کہ ما بلوشی یا بلوچی نہ ایں بلکیں ما بلوچ ایں ءُ مئے مُلک بلوچستان اِنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
