کرومگ ءِ سر ءَ چمشانکے
نبشتہ کار: سید حاتم ناگی کیچ
دی بلوچستان پوسٹ
گوں مھربانیں ھدا ءِ نام ءَ،،
ھنیپ بلوچ ءِ شَیرانی اولی کتاب “کرومگ” منی دیم ءَ اِنت ءُ کتاب ءِ وانگ ءَ پد مردم ءَ گمان نہ بیت کہ اے ھنیپ بلوچ ءِ اولی کتاب اِنت۔
ھیال ءِ پُھتگی ،ندارہ کشّی ،ھاس شَیری تکنیکانی کالب انچو پٹّ ءَ کیت کہ مردم نہ گْوش ایت کہ اے کتاب نوکیں دور ءِ ورنائیں شائرے ءِ کتاب اِنت۔
درانڈیھی اندوہ ، بلوچ زمین ءِ لگتمالی ،زانگولیں ورنایانی لاشانی کنڑگ کنگ ، نا ھکّیں ورنایانی برگ ءُ ازیت دیگ ءُ باتن ءِ ھمے لَھڑاں ھنیپ ءَ شائرے جوڑ کتگ۔۔۔۔
چوں کناں کہ درد کشیت زندگی
وھد ءِ بے وھدیں رباباں ساز کنت
ھمے اندری لھڑیں درد ءُ چیلام انت کہ جاہ جن انت ءُ شئر بنت۔
ھنیپ بلوچ ءِ شَیر ءُ آئی ءِ شِیری ازم ءِ سر ءَ باید انت منی وڑیں کم زانتے ھبر مہ کنت ،چی ءَ کہ من وت انگت یک کسانیں لبزانکی نودربرے آں ،بلے ھنیپ جان ءِ زاتی واھشتانی پد ءُ من اے ڈُبّہ وتی کوپگاں زرتگ چی ءَ کہ من آئی ءَ را مکن کرت نہ کن آں۔
کرومگ نوکیں دور ءِ جوک نبشتہ کنوکانی واستا سنگ ءِ بنیادے، من کرومگ ءَ جدید جوک( نظم) ءُ پد ءَ پابند جوک ءِ اولی شَھکار گوش آں۔
جوک ، پد ءَ بندیں جوک نبشتہ کنگ در کساس ءِ دستونک گوشی ءَ لک درجہ گرانتر اِنت،بلے ھنیپ بلوچ ءَ ماشاءاللہ گوں شائری ءِ اے گرانیں تھرءَ انساپ کتگ.
کرومگ ءِ جوکانی مستریں جوانی کہ اشانی وانگ ءِ وھد ءَ ترا دستوک ، زھیروک ، شَیروند ، رزمیہ لچہ کلیں تھرانی مزا کیت
اے ھنیپ بلوچ ءِ مستریں سوبمندی اِنت۔
دومی ھبر ھنیپ بہ بیت ، من بہ باں ، دومی یا سیمی بہ بیت ھرکسے کہ بہ بیت ، کسے ھچ پڑ ءَ سرجم ءُ برجم نہ انت۔
آم زندگی بہ بیت یا کجام ازمی سپر ءَ ھاپز ، شاملو ، ٹیگور ، جامی ، گالب ، اتاشاد کہ شَیر ءُ لبزانک ءِ دنیا ءِ استار انت،درستاں جاگہ ناں جاگھے ءَ وتی ازمی نزوری منوگر وت انت۔
ھنیپ آمیں بستار ءَ باز جوانیں درد واریں ،ھیرکاریں مردمے ءُ ھنیپ منی نزوریں دستانی دلاں منی چمانی دیم ءَ رستگ ءُ اد ءَ سر بوتگ،باز ھساس تبیں ورنایے، گونڈیں گونڈیں چیزاناں مزن کنت ءُ چار اِیت ، ھما گپ ءُ ھبر ، جیڑہ ءُ جنجال کہ مئے دلاں ھچ نہ انت بلے ھنیپ آیاں گوں وتی دور اندیشیں نگاھاں مزن کنت ءُ چار اِیت ءُ پد ءَ ڈولداریں وڑے ءَ آیانی شرّی ءُ ھرابیاں گوں وتی شھدیں گپتاراں درانگاز کنت.
اے سپت مرچی ئیں دور ءِ مردمانی تہ ءَ انچو کم بوتگ کہ نہ بُوَگ ءِ برابر انت۔
ھنیپ بلوچ ءِ ازم شاھیگان انت ءُ آئی ءَ اوں وتارا بس شَیر گوشی ءِ تہ ءَ نہ داشتگ ،بلکیں شائری ءَ ھوار رم نویسی ءُ ردانک ءِ تہ ءَ ھم مزنیں دزرسے دار اِیت۔
آزمانک ءُ رجانکاری ءِ تہ ءَ ھم آئی ءِ جھد باز انت ، مزن مزنیں دری نبشتہ کارانی نکان بلوچی ءَ ترینتگ اَنت ءُ بلوچ راج ءَ داتگ انت، چوشکہ سعادت حسن منٹو ءُ دگہ۔۔۔۔۔
اے ھون ھوشامیں نوبت ءَ کہ کس وتیگی نہ اِنت۔ ھنیپ ءَ ڈیھ ءِ لگتمالی راج ءِ بدھالی ، بلوچانی بزگی ، مات ءُ گوھارانی بے ارزشتی،کوہ ءُ ھسارانی گَم درچک ءُ دارانی پکر ، سرکگیں ڈن ءُ کمبریں گواشانی ھیال ، کور ءِ گَز ءُ کھورانی گَم ، اے ھما سوب انت کہ ھنیپ ءَ را شائر اِش جوڑ کتگ۔
چو کہ من پیسرتر ءَ گوشت کرومگ ءَ مردم نہ گْوش ایت اے نوکیں دور ءِ ورنا سالیں شائرے ءِ اولی کتاب انت ، اے مبالغہ یا بے سریں ساڑایے نہ یے ءُ من ءَ ھنیپ ءُ دگہ ھرکس زانت کہ منی آدت نہ اِنت کہ وتسر ءُ بے پائدگیں ساڑا بکن آں بلے کسے کہ ساڑا ءِ لائک بہ بیت ، کَے کہ بہ بیت ، من پہ آئی ءِ ساڑا ءَ دل نہ جن آں،بلے چو کہ ھنیپ ءِ ایڈیٹنگ ءِ زمہ یاسر ادا کتگ ءُ یاسر ءَ پہ زانت یا کہ نزانتکاری وتی پرز پورا نہ کتگ ، کتابءِ تھا لبزانی ردی سک باز انت ، اَنچو گمان بیت کہ پرنٹنگ ءَ پد کتاب چاپگ بوتگ ، ھچ ھرت چاری نہ بوتگ ،اگاں واکی یاسر ءَ وتی جھد کتگ ءُ انگت اے وڑ اِنت گڑا اے یاسر ءِ نا لائکی انت۔
یک شَیرے پہ گواھی کہ کتاب سیمی چارمی تاک ءَ انت،
” آس پش انت گشے ارواہ ءِ اجلجاہ منی ،
انچو آس مندگ ءُ آس دیمگ انت زندے آرتاپ۔
آس پش ءِ جاگہ آس پیش
آتراپ ءَ جاگہ آرتاپ
بوت کنت یاسر ءَ دلجمیءَ وھد نہ رس اِتگ بلے اے ھوں چارگی انت کہ کسے ءَ را کہ وھد نیست اے رنگیں زمہ داری مہ زور اِیت ،
ھرت چاری ءِ زمہ پمیشکا دیگ بیت کہ اول شائر انچو شَیر نبشتہ کنت سردردی کنت
دومی کمپیوٹر کمپوزر ھم چیءَ کہ کمپیوٹر مشینے ردی ءِ سد در سد امکان انت ءُ ھرت چاری ءِ کار ھمیش اَنت کہ لبزے کم انت یا گیش انت یا رد اِنت آئی ءَ تچک بہ کنت۔
ترا یات بیت نہ بیت منزور بسمل ءَ شاھپور ءِ چیر ءَ پرنٹنگ ءِ دکانے ھست ات ، وت ھم نامی ئیں شائرے ، چار چار بار رند انگت ءَ کتابانی تہ ءَ گونڈیں ردی ءِ در کپت کہ رند ءَ سیاھیں کلم ءِ سر ءَ راست ئِے کت انت۔
اللہ بہ کنت کلم ءِ زور گیشتر بات ءُ مارا زوت تئی دومی کتاب دست کپات ءُ نوکیں کتاب ءِ ودار ءَ ایں۔
بیگاھے ٦ءُ١۴منٹ
پروریءِ ٢٨ تاریخ ٢٠٢٠سال
سری کھن کیچ
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
