ورلڈ ہیلتھ آرگنائزیشن ءُ چین
شاہ جان بلوچ
دی بلوچستان پوسٹ
دنیا ءِ تہ ءَ اگاں ھترناکیں نادراھی یے سر بہ کش ایت کہ پیش ءَ نہ کس ءَ دیستگ یا اِشکُتگ گُڑا دنیا ءِ تہ ءَ زندگی کنوکیں انسان ءِ چم پہ کُمک ءَ کے ءَ سّک بنت؟
الّم دنیا ءِ توامیں ملک ءُ راج جھانی جاندراھی گَل(ورلڈ ہیلتھ آرگنائزیشن) ءِ نیمگ ءَ چار انت ءُ اوست کن انت کہ دوا ءُ درمانے شوھاز بکن یا اڈ بکنت بلے اگاں ھمے جھانی جاندراھی گل لّب ءُ ملامی تب ءِ واھند بہ بیت گُڑا انسانی زندگیانی چے بیت؟
جھانی جاندراھی گَل، میان استمانی (یونائیٹڈ نیشن) ءِ یک بھرے کہ دنیا ءِ توامیں ملک ءُ راج انسان ءُ چرِند، پرِند، جناور ءُ بالی ءُ زمینی کڑوکانی جان سلامتی ءِ زمہ وار اِنت.
کورونا وائرس بابت ءَ جھانی جاندراھی گل ءَ چہ دیمروی کُتگ، دوا ءُ درمان اڈ کنگ ءَ یا ھمے نادراھی دارگ ءَ چے پیمیں گامگیجے زُرتگ ھمیشی ءِ سر ءَ گپ کن ایں ءُ چاریں کہ انگت انسان ءَ چِہ نپ ءُ چہ نُکس رس اتگ۔
بلے پیسر ءَ چمشانکے دے ایں ،کورونا وائرس ءَ وھدے چین ءَ سرکش اِت گُڑا چینی حکومت ءَ اشی دارگ ءِ واستا چے کُت؟
چینی حکومت ءَ دو گام چِست کُت یکیں وَ ھمے کہ اے نادراھی چیر دیگ بہ بیت کہ چین دنیا ءِ دیم ءَ بنام بیت ءُ چینی کاروبار دنیا ءِ تہ ءَ زوال مہ بیت۔
30 دسمبر ءَ چین ءِ شہلھر ووھان ءِ نادراھجاہ ءَ داکتر ” زئی لینکا” کینسرے داکترانی وی چیٹ دیوان ءَ یک کلوھے شنگ کنت کہ مروچی ماھیگیرانی بازار ءَ چہ لھتیں نادراہ نادراھجاہ ءَ آرگ بیتگ اشاں “سارس” پیمے نادراھی ءَ گِپتگ وتی ھیال ءَ بکن اِت ءُ بازار ءِ نیمگ ءَ مرو اِت.
3 جنوری ءَ پولیس زئی لینکا پون کنت ءُ بیھار دنت کہ چُشیں دروگیں ھال شنگ مکن ناکہ ترا دستگیر کن ایں.
زئی لینکا ءِ ھمراھی ءَ کساس ھشت داکتر ھمے نادراھی ءِ سبب ءَ بیران بنت اشانی تہ ءَ نادرھجاہ ءِ کارمستر ھوں گون انت۔ اشاں ابید کورونا وائرس ءِ ھالے شِنگ کنگ ءِ بُھتام ءَ لھتیں اھِوالکار ھوں بندیگ کنگ بیت ءُ آیانی بازیں چاگردی رسانکدار(سوشل میڈیا) ءُ دامگ(انٹرنیٹ) ءَ شنگ بیتگیں نبشتانک بند (بلاک) کنگ بنت، ھمے نبشتانکانی تہ ءَ ووھان نادراھجاہ ءِ داکترانی ھوں گِلگدار ءُ مان انت، بلے چاگردی رسانکدار ءِ زمانگ ءَ چُشیں ھال داں کّد چیر دیّگ بیت؟
چین حکومت ءِ وائرس ءِ ھال دنیا ءَ سر بیت، نوں آ وتی میان استمانی شرپ ءَ برجاہ دارگ ءِ ھاتر ءَ چین ءَ ووھان ءِ شھر بند کُت، مھلونک ءِ سر ءَ پابندی جت ءُ مھلونک قرنطینہ راہ دیگ ءِ جار جت بلے مھلونک ءَ کمیونسٹ ھکومت ءِ سر ءَ ھچ اوست نیست اَت آیاں وتی زھرشانی بنا کُت وتی لوگانی دریگ ءَ چہ ھانک کانگ ءَ زھرشانی کنوکیں مھلونکے سؤت الھان کُت”ماں اھد کناں ءُ گُشاں اے سرزمین ءَ کس ارسیگ نہ بیت”
چین ءِ تہ ءَ “نیو سٹیزنز موومنٹ “کہ انسانی ھکانی یک فاونڈیشنے آئی ءِ بُن ھِشت ھیر کنوک کانون زانت”زوو زیونگ “کمیونسٹ ھکومت ءِ تُرندیں ایرادگِراں چہ یکے آئی ءَ چینی مزن وزیرے ءِ بابت ءَ گُشت”اے مردکار ھچ نزانت مُپت ء ناھک ءَ بزگیں چینیاں کُشارین ایت”.
دنیا ءِ سیاسی، لبزانکی ، سائنسی ءُ چاگردی زانتکار اے گپ ءَ جیڑگ ءَ ات اَنت کہ چین ءِ تہ ءَ سکیں ھترناکیں وائرسے یلہ انت بلے جھانی جاندراھی گَل ھچ کامگیجے زورگ ءَ نہ انت پرچا؟
ھمے کہ اے جُست سر کشگ ءَ ات اَنت چین ءِ کمیونسٹ ھکومت ءَ وتی دومی گام چِست کُت ءُ جھانی جاندراھی گل ءِ تہ ءَ وتی زّر ءُ سیاسی زور کارمرز کُت.
جھانی جاندراھی گل ءِ کارمستر “ٹیڈروس ادانم گبریسّس” کمیونسٹ ھکومت ءِ دوستیگیں مردماں چہ یکے ،وھدے اھِوالکاراں ٹیڈروسءَ جُست کُت کہ شما چین ءِ ھلاپ ءَ اے کورونا ءِ چیر دیّگ ءُ دنیا ءَ را بے سما کنگ ءِ بابت ءَ چے جیڑ اِتگ؟ چے شور کُتگ؟
ٹیڈروسءَ پسو دات “چین باز جوانیں وڑے کورونا ءِ گِر ءُدار ءَ انت ءُ باز شریں وڑے ءَ گر ءُ دار کُتک، چین ءِ نادراہ جاھاں شاباش اِنِت ستاہ کرز اَنت.
اے وائرس ءِ ھال نومبر ءَ دنیا ءِ رسانکدار ءَ سر بیتگ چُشیں ھالے کہ جھانی جاندراھی گل ءَ سر بیت آ داکترانی یک ایڈوانس ٹیمے پٹ پول ءَ دیم دے انت بلے چین ھکومت ءِ سنگت ٹیڈروسءَ جوائنٹ مِشن ھاتر ءَ جھانی جاندراھی گل ءِ ٹیم فروری ءِ 10 رمس ءَ چین ءَ دیم دات۔
وھدے امریکی ھکومت ءَ وتی ملک ءَ چین ءِ سپر کنگ ءِ سر ءَ پابندی جت ٹیڈروس ءَ اےسَلاہ ءِ سر ءَ امریکہ ھکومت ایرجت۔
ٹیڈروس ادانم ایتھوپیا ءِ تیگرے پیپلز لبریشن فرنٹ ءِ سروک ءَ چہ یکے کہ اے سوشلسٹ کِسہ ءِ منوک انت، ایتھوپیا سرکار ءِ جاندراھی وزیر ھوں بیتگ،
2017 ءَ ٹیڈروس ءُ چینی مزن وزیر ءِ میان ءَ یک گِند ءُ نِندے بیت ءُ چین ایتھوپیا ءِ تہ ءَ جان سلامتی ءِ پِڑ ءَ کار کنگ ءِ واستا جھان جاندراھی گل ءِ کارمستِر ٹیڈروس ءَ 80 ڈالر ءِ کُمک دنت، ابید چہ اے کُمک ءَ چین ءِ 4.4 بیلیون ڈالر ءِ کُمک ءِ ایتھوپیا ءَ داتگ کہ ھود ءَ چین ءِ درملکی پوجی اڈا ءِ ھست کہ آ یل ریلے پاٹکے لوٹ ایت کہ ادن ءِ زِربار ءَ گوں جمھوریہ جیبوتی ءَ ڈیک بُوارت۔
اے درستیں کاراں ءُ کرپشن ءَ چہ زانگ بیت کہ جھانی جاندراھی گل ءِ پیم ءَ دنیا ءِ مستریں ادارہ کہ چُش انت گُڑا میان استمان ءِ تہ ءَ کرپشن ءِ چہ ھیال بیت کہ توامیں دنیا ءِ پایدگ بندوک انت۔
بیت کنت کہ راجدوستیں (نیشنلسٹ) کِسہ منوکیں زوراوریں ملک ءُ راج چین ءَ اے بری دیم ءَ بکن انت ءُ دنیا ءِ نوکیں راھبند ءِ تہ ءَ بدلی بیار انت پرچا کہ دیر اِنت راجدوستیں( نیشنلسٹ) کِسہ ءِ منوک وداریگ بیتگ انت کہ کدی آیاں چُشیں موہ بِرس ایت کہ آ وتی کِسہ ءَ دیم ءَ بِہ بر انت۔
نوں ودار ءِ ھمے ساھتاں کورونا چہ انسان ءِ سر ءَ امینچو زیت چُٹ ایت چین ءِ ھلاپ ءَ شریں وڑے ءَ سیاسی جنگے بِنا بیت ءُ اشی ڈائریکٹ نپ بلوچ سیاست ءَ ھوں رس اِت کنت کہ پاکستان چہ چین ءِ سیاسی ردوم ءَ سک نزور بیت ءُ بے وار بیت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
