بلوچ ءِ دود ءُ ربیدگ یا بلوچیت
زبیر بلوچ
دی بلوچستان پوسٹ
اے بلاھیں جستے ءَ سر چست کتگ، شر انت کہ ھر نیمگ ءَ زمین جنبیتگ ھر پیر ءُ ورنا ھمے گپ ءَ گیر آرگ ءَ انت جست ءُ پسو ءَ انت کہ بیا اِت کہ ما نہ بوت اِیں ابو کہ مئے دود ءُ ربیدگ ۔۔
گپ بہ بیت، گپ پرچا مہ بیت ، ھمے گپ ءُ واہ ءُ زاری جمود ءِ پروش اَنت ،شر انت کہ ھمے بھانہ چار سنگت نبشتہ کنگ ءَ اِنت ءُ چار سنگت گپ کنگ ءَ اِنت.
کسے گپ جنت گڑا راھے گیش اِیت، ھمے بے راھی ءَ مھلوک پرے ھال ءَ انت ،اگاں نا بے گپی بلاھیں نادراھی یے، اے نادراھی ھچ راج ءَ مہ گیپت ۔
مرچی باندا مھلوک دود ءُ ربیدگ ءَ سک پریشان کتگ، لھیتں گش اِیت بیا کہ اے سکیں لگوریں کارے راج کنگ ءَ انت، لھتیں گش اِیت کہ ناں بِلّے مھلوک دود ءُ ربیدگ ءِ روچ ءَ دار اِیت، لھتیں پہ منّگ ءِ دلیل دیگ ءَ لھتیں پہ ھلاپ ءَ دلیل دیگ ءَ بلے اسل گپ ایش انت کہ اے گپ ءِ جند یک Non issue یے ،اے انچیں جنجال ءُ سر دردے وتی سر ءِ مان کنگ انت،اے انچیں سرے دردے کہ سرجمیں راج چرتے ءَ کپتگ کہ اے چہ بلاہ ءُ مسیبتے مارا نہ چوش ئِے کتگ، بلوچ راج اگاں وتی درستیں توانائی ءَ دگہ شرتریں کارے ءَ بہ جنت یا آ سرپد بنت کہ اے ھرابیں کارے گڑا ایشی شر ءُ گھتر کنگ ءَ بہ جنت باز بدلی ءُ گھتری کیت ۔
دود ءُ ربیدگ ءِ روچ ءِ بابت ءَ سے تھر ءِ مردم دیم پہ دیم انت یکے ھما انت کہ گش اِیت کہ دود ءُ ربیدگ ءِ دود ءُ ربیدگ کجام زبان ءِ لوزے کدی بلوچی ءَ ھوار کپت کجام اتھارٹی ءَ اے گپ بلوچ ءِ گٹ ءَ توک کت واللہ ءُ آلم، ھیر ھمے گپ ءِ منوگر گش اَنت کہ دود ءُ ربیدگ ءِ روچ دارگ بہ بیت بلے دومی گش ایت نبا کن ئے کہ اے کار مزنیں راج ءِ دژمنیں کارے ءُ اے کار ءَ مارا ءُ مئے راج ءَ پد ءَ مئے دود ءُ ربیدگ ءَ مزنیں تاوانے رس اِیت،اے دژمن ءِ پندلے ، اے دوئیناں چہ ابید دگہ پاٹی یے انگت ءَ ھست انت آ گش اِیت کہ کسے داشت کت کنت بہ کنت اے مزنیں ھرچے اگاں ھرچ شمارا در کیت ءُ شما پاگ ءُ نوکیں گد ءُ جَر زرت کن اِت، نول ءُ باڑا کت کن اِت، تر ءُ تاب کت کن اِت یا شما رازی ءُ وش اِت ،وتی رزا ءَ اے کاراں کن اِت گڑا ھچ چوشیں توجیلے نیست کہ دارگ مہ بیت،اے جتا جتائیں سوج انت ۔
باید انت بلوچ راج اے وڑیں گپے ءَ وتی دل ءَ وردین ءُ ورگ ءَ چہ مہ بارت چرتے ءَ مہ کپ اِیت ، بلکیں گوں المی تک ءُ پھناتاں چیزاں بہ چار اِیت ۔
اگاں ما دود ءُ ربیدگ ءَ یک المی میزانے ءِ سر ءَ ایر بہ کن اِیں ءُ بہ چار ایں گڑا دود ءُ ربیدگ ھچ آزمان ءَ چہ اتکگیں (صحیفھے)نہ انت ، سوشیالوجی ءُ سوشل سائینس ءِ رد ءَ دود ءُ ربیدگ زند گوازینگ ءِ دروشمے ،بزاں life style یے ۔ ھر ھند ءُ دمگے ءَ دگہ دگہ دود ءُ ربیدگ بنت۔
انسان وھدے نوک نوک تھزیب ءِ دائرہ اتکگ چاگردی زند ءُ بنا کتگ گڑا ھما وھد ءَ انسان ءَ بے سمائی(لاشعوری) ءِ ھساب ءَ وتی زند یک کالبے ءِ توک ءَ مان کتگ، ھر وڑ کار ءُ کِسابے کتگ ئِے گڑا ھمے کالب ءَ چہ در نہ بوتگ،آھستہ آھستہ اے دراھیں ھرروچگیں سُر ءُ پر ھما زمانگ ءَ انسان ءِ دود بوتگ انت ،دود ءُ ربیدگ چہ بن ءَ ھچ راج ءِ میراس نہ بوتگ بلکیں اے یک یکجاھی (اجتماعی) انسانی میراسے بوتگ ۔
ڈاکٹر جمیل دود ءُ ربیدگ ءَ چو اے وڑ ءَ گیشنگ ءِ کوشست کنت ” دود ءُ ربیدگ یک انچیں گالے کہ زند ءِ سرجمیں چست ءُ ایرانی، آ زھنی بہ بنت یا مادی یا دری یا توکی کلانی (احاطہ)کن اَنت ۔”
چہ اے گپ ءَ پدر انت کہ دود ءُ ربیدگ زھنی ءُ مادی رویہ ءُ وڑ ءِ امل ءِ نام انت،بزاں یک کومے ، راجے دود ءُ ربیدگ ءِ سر ءَ زند گوازینگ ءُ دود ءُ ربیدگ ءَ وتی زند ءِ دروشم ءَ جوڑ کنگ ءَ ساری زھنی پکری ءُ مادی (سطح) ءَ چیزاں چار اِیت ءُ پیسلہ کن انت ۔
روان انت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
