بلوچی دود ءُ ربیدگ ءِ روچ ءُ ما بلوچ ۔۔۔
نبشتہ کار: داد بلوچ شاشانی
دی بلوچستان پوسٹ
اے جیڑگی گپے بلوچی دود ءُ ربیدگ ءِ روچ ءَ ھما مردُم دارگ ءَ اَنت کہ بلوچ ءِ ھچ ءَ سرپد نہ اَنت،بلوچ ءَ را وڑ وڑیں سِلیں نادراھیاں گِتگ چو ساہ دار ءَ مِرگ ءَ اَنت ،آ شُومک بِہ بیت یا دگہ سِلین نادراھی یے بہ بنت.
بلوچانی زُبان گار ءُ بیگْواہ بیگ ءَ اِنت اگاں بلوچ ءَ را تو گپ بہ پرما آئی چار گپ اردو، سے گپ انگریزی، دو گپ اربی ءُ پاسی بس گُڈسر ءَ اَنت ءُ اِنت پشت کَپ اَنت، بلوچانی وانگی بزاں کتاب وانگجاھاں وانینگ نہ بیگ ءَ اِنت ناں کہ بلوچ ءَ را موکل ھست کہ بلوچی کتاب بُوان اِیت اگاں کسے ءَ بلوچی ونت یا وَ کُشگ بیت یا گار کنگ بیت ءُ بلوچانی نبشتہ کُتگیں وانگیاں ءَ موکواں تند بستگ یا وَ رمیزان گِتگ اَنت، پمیشکا بلوچ بلوچی وانگ ءَ پہ وت اَیبے سرپد بنت یا بے پایدگ سرپد بنت ۔
بلوچانی چُک چینی بیگ ءَ اِنت، بلوچ اِمروز ءَ نیست ءُ نابود کنگ بیگ ءَ اِنت ،نادراھجاھاں بُرو ترا ڈاکٹر کُش اَنت ءُ درمان جاھاں بُرو ھما ھشت لمبر ءِ درمان ترا کُش اَنت، بلوچ ءِ مال ءُ مڈی لُٹ ءُ پُل بیگ ءَ اَنت ،بلوچ زالبول ھر روچ بے اِزت ءُ بے شرپ بیگ ءَ اَنت، بلوچ مردیں وتی لوگانی تہ ءَ نشت نہ کن اَنت ،بلوچ ءِ رھبر ءُ رھشون وتی سرزمین ءَ نشت نہ کن اَنت، بلوچ ورنا مزن شاہ دربر جاھاں پہ وانگ ءَ زورگ نہ بیگ ءَ اَنت ءُ بلوچ جنک ھر روچ دگانی سر ءَ وتی زند گْوازینگ ءَ مجبور کنگ بیگ ءَ اَنت ، چہ ایشی ءَ ابید مزن شاہ دربرجاھاں یا شاہ دربر جاھاں جانشودانی تہ ءَ چیر اندریں کیمرہ جنگ بیت ءُ بلوچ ءِ جنکیں زھگانی بْرھنگیں اکس ءُ تامُر کَشگ بیت، بلوچ ءِ مات ءُ زالانی سر ءَ دروگیں پندل سازگ بیت، گِرگ ءُ برگ ءُ جھل ءُ زنداناں کنگ بنت، پہ بلوچ ءَ چے پشت کَتگ؟
بلوچ ھر نیمگ ءَ لگتمال اِنت، ھر نیمگ ءَ چیر تر اِتگ ھمے بلوچ کہ دود ءُ ربیدگی روچ دارگ ءَ اَنت ایشان یک روچے ھم جُست نہ کُتگ یا نہ جیڑ اِتگ کہ پہ بلوچ ءَ نوکیں باندات چوں بیت، بلوچ ءِ واستا چے بہ کن ایں، بلوچ راج چَہ اِے ازاباں چوں رَکّ اِت کنت ؟ بس سال ءِ سر ءَ یک روچے دود ربیدگ ءِ روچ دارگ ءَ ھچ بدلی نئیت ءُ ناں کہ بلوچ زندگ کنگ بیت، پہ اے روچ ءِ ناچ ءُ سلوات ءُ کریم ءُ پوڈر کنگ ءَ پد ءَ ھمے کہ دود ءُ ربیدگ دارگ ءَ اَنت اے وت نہ زان اَنت کہ دود ربیدگ چے یے دود ءُ ربیدگ ءَ پہ چنچو دیمھونی دیگ لوٹ اِیت؟
چوناھا ما گوں ھُورتی ءَ بچار اِیں بلوچ ءَ را دود ءُ ربیدگ ءِ روچ دارگی نہ اِنت ءُ ناں کہ بلوچ ءَ را اے نام زیب دنت، پرچاکہ بلوچ وَ ھر روچ دود ءُ ربیدگ ءَ توک ءَ اِنت ،اے روچ ءَ ھما بدار اَنت کہ آیاں وتی دود ءُ ربیدگ یل کُتگ ءُ ھمے یکیں روچ ءَ دار اَنت وت ءَ بے سوبیں زندگ کنگ ءِ جُھد ءَ کن اَنت ، بلوچ ءَ وتی دود ءُ ربیدگ یل نہ کُتگ، بلوچ زالبول ءَ بِگر داں مردین ءَ ھر روچ وتی دود ءُ ربیدگ ءَ اِنت انگت ھما وڑیں دوچ ءُ گْور ءَ کن اَنت انگت ھما وڑ ءَ بلوچ ءِ میارجلی ھست، داں اولی روچ ءَ بِگر داں روچ ء مرچی ءَ برجم اِنت، بلوچ پہ میار ءَ اولی روچ ءَ بگر داں روچ ء مرچی وتی سران ندر کنگ ءُ پیداک اِنت، بلوچ ءِ مھمان جلی ھم اولی روچ ءَ بگر داں روچ ء مرچی ھست ءُ یک شَل ءَ روان اِنت ھچ کمی ئِے گندگ نہ بیت، وشیانی روچان چاپ ءُ ڈُھل ، سوت ءُ زیمر، سیل ءُ سواد، نندگ ءُ دیوان ،گپ ءُ تران، مِھر ءُ دوستی، پاگ ءُ پازوار ،گُد ءُ پُچ، گوک ءُ پَس مالداری، زمین ءُ کار ،ننگار کِشت ءُ کِشاری، ھمساھگانی ھال پُرسی ،مَرگ ءُ پُرس، بیگاری ءُ بجاری، کول ءُ وادہ ءُ سوگند، گِس ءُ بان ،جاگہ ءُ رزان ، دود ءُ ربیدگ ھمیش اِنت ایشاں بلوچ ھر روچ کنگ ءَ اِنت دگہ دود ءُ ربیدگی روچ ءِ دارگ چے لوٹ اِیت؟
چیر دستیں کومانی مجگ چیر دست کنگ بنت بلوچ ءَ گوں انچوش بوتگ ءُ بیگ ءَ اِنت، یکے یک روچے پاد کیت ءُ گْوش اِیت،بیا اِت براھوئی استانے جوڑ کن اِیں ءُ یکے کیت ءُ گْوش اِیت بیا اِت دود ءُ ربیدگی روچے دار ایں، یکے گْوش ایت مَکُرانی بلوچ چُش اَنت ءُ دگہ یکے گْوش ایت کراچی ءِ بلوچ چُش اَنت ، چہ سیمی نیمگ ءَ یکے گْوش ایت ایران ءِ چیر دستیں بلوچ چُش اَنت یا اُوگانستان ئِے یا آدگہ ڈیھانی ۔
دود ءُ ربیدگ مزنیں شلوار ءِ نام نہ اِنت ءُ ناں کہ یک روچے ءِ واستا پاگ سر ءَ کنگ ءُ ناچ کنگ دود ءُ ربیدگ گْوشگ بیت ۔
من انچوش سرپد باں اے دود ءُ ربیدگ ءِ دارگ ءِ روچ گْوشگ نہ بیت بلکیں اے دود ءُ ربیدگ ءِ لگتمالی ءِ روچ گْوشگ بیت، اِنچو سال اِنت ما اد ءَ دود ءُ ربیدگ نہ دیستگ ۔
واجہ ناگمان گْوش اِیت” دود ءُ ربیدگ ءِ روچ ءَ مہ دار بلکیں دود ءُ ربیدگ ءِ جند ءَ بدار “۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
