ھُدا تئی ھُدائی مھکم انت بلے بزگ کن!
نبشتہ کار: عبدلواجد بلوچ
دی بلوچستان پوسٹ
اے پاکیں زات تئی بادشاھی ءُ مزنی ءِ سر ءَ منی ستک مھکم انت ءُ من اِے زاناں کہ ترا چہ مستریں زات نیست چی بکناں؟؟؟ دنیا ءِ ھرس تماہ ءُ لالچ ءَ مئے گمراھی ءِ سر ءَ یک مھکمیں مُھرے سبت کتگ یک سھتے من اے بے ھیال باں کہ ھو تئی پیمیں بلاھیں زاتے ھست ۔۔۔۔۔۔۔۔۔۔۔تئی ھُدائی تا جھاں ھست برجم انت ۔۔۔۔۔۔۔۔۔۔۔۔۔۔۔۔بلے چی کن ئے اے تئی زات ء پاکیں ھستی ءِ سیکیولر بوگ ءِ مستریں نشانی انت کہ وھدے تو اے جھان جوڑ کنگ ءَ پیسر آدمے وتساچ (تخلیق) کُت ءُ تئی دوستناکیں پرشتہ ازازیل ءَ وھدے تئی ھُدائی چیلنج کُت گڑا اے واستا کہ من اے انسان ءَ ھچ پیم ءَ سجدہ نہ کناں ۔۔۔۔۔۔۔۔۔۔۔۔۔آئی ءَ تئی ھُدائی چیلنج کُت بلے ابید ء تو آئی ءَ ھما جھان ءَ بہ گر ئے تو آ شیتان موہ دات ءُ آدم ءِ ھمراھی ءَ دنیا ءَ دیم دات کہ برو ترا موکل انت منی جوڑ کتگیں بنی آدماں ھمینچو گمراہ کُت کن ئے بہ کن ترا موکل انت من چاراں کہ تو چینچو سوبمند بہ ئے؟؟؟؟؟
او ھُدا ردیانی جوڑ بوتگیں بُت ءُ ما ھما بُت ایں کہ ردی کوتائی سلّی مئے گوما سرزد بیتگ اے ردیانی کنگ مئے گوما پہ زانت نہ بوگ ءَ انت اے ھما شیتان ءِ داتگیں تئی رزا انت کہ تو آئی ءَ وتی مکابلہ ءَ بادشاھی بکشات…………مرچی امروز ءَ تئی نارازگی ءِ وڑ وڑیں نشان زاھری دیگ ءَ انت!
تئی نام ءِ سر ءَ اے دنیا ءَ تئی نائباں وتی جتا جتائیں دکان پچ کتگ ءُ سوداگری کنگ ءَ انت ما ھمے اشکتگ کہ کَسے تئی ھُدائی ءَ پجا کار ایت تئی غفور ءُ رحیم ءِ ھمراھی ءَ تئی قھاری ءَ وھدے پجا کار ایت گڑا ھمے ترس ءَ تئی سر ءَ بنی آدم ءِ ستک ءُ ترس گیشتر بیت بلے اے دنیا ءَ تئی نائبانی لاپ روچ پہ روچ مستر بیگ ءَ انت…………..!
ھُدا تئی سیکیولری داستان ءُ کسہ ما اشکتگ ات انت کہ تو وھدے شیتان ءِ با رزا کُت!
بلے بیا کہ اے امروز ءَ تو یک انچیں وبایے دیم داتگ کہ اے ناں بنی آدم کلّ ایت ءُ نا دگہ ساھداریں چیزے………….!
اے ھُدا تو بے شک رھیمے ئے اے بلے وتی رھیمی ءِ پاسداری ءَ بہ کن ءُ اے کھر آماچیں جھان ءَ چہ پیسر ءَ تئی دو بلاھیں نائبانی ڈیھ کہ بیست ءُ چار ساھت اے دوئیں ڈیھانی واجہ اے داوا ءَ کن انت کہ تئی ھکمانی منوک ایں بلے آ گپ دگرے کہ مرچی کرناں گیش انت کہ یک راجے آئی نام “بلوچ” انت اے دوئیں ڈیھانی زلم ءُ زوراکیانی آماچ انت……… اَے ھُدا اے درتہ پچ، بزگر، شدیگ ءُ زلم آماچیں راج سر ءَ کمو بزگ بہ کن کہ پیشگیں جبر ءُ زلم گر ءُ بند شوموک ءِ مرز آماچیں اے راج ءَ پہ کُرونا ءَ رکھین ۔۔۔۔۔۔۔۔۔ وتی قھاری ءِ تھاریں جمبراں ھما جاھاں گوارین کہ تئی بادشاھی ءُ ھکمتانی سوب ءَ ھود ءَ آسراتی ھست…….
اے ھُدا من یک گناہ گاریں انسانے آں کہ وتی زند ءَ من ھچ شریں کار نہ کتگ بگند ئے تئی گناہ گاریں بندھے آں ۔۔۔۔۔۔۔۔۔ھو من ءَ تئی ھاکمیت ءُ ھُدائی سر ءَ ھچ شک نیست بلے شیتان ءِ بارزا کنگ ءَ رند بگند ئے من شیتان ءِ ٹولی ءَ پہ ردی ھوار کپتگاں……….. بلے بزگ کن پہ اے راج ءَ کہ تئی جوڑ کتگیں امروز ءَ دنیگت آئی ھچ پیمیں وشی نہ دیستگ بلکیں آئی وشی تئی نائباں پہ زور پچ گپتگ انت………………… بہ گند ئے اے ھُدا تو سک زھر ئے بلے اے زھری ءَ پہ ھُدا ءَ بچار ھما جاگہ ءَ تالان بکن کہ ھمود ءَ تو آسراتی داتگ……………!
من ءَ امیت انت تو وتی غفور ءُ رحیمی سر ءَ داں جھاں ھست اوشتوک بہ ئے!
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
