پاکستان بنگالی زبان ءِ ولگوج کنگ ءِ جہد ءَ پد بلوچی زبان ءِ ولگوج کنگ ءِ جہد ءَ انت ۔ بی این ایم
بلوچ نیشنل موومنٹءِ بنجاہی جارکشءَ ماتی زبانانی درگتءَ وتی ہیال درشان کنانءَ گُشتگ کہ ہر سال 21 فروریءَ ماتی زبانانی میان اُستمانی روچ تیوگیں دنیاءَ برجم دارگ بیت۔ اے روچءِ بُنکی مولءُ مراد ماتی زبانانی زندگ دارگ انت۔ اے وھدی دنیاءِ تہا بازیں ہنچیں زبان ہست انت کہ آ گارءُ بیگواہ بوھگا انتءُ میوزیمءِ زبان جوڑ بوھگءَ انت۔ چیا کہ دنیاءِ تہا دیما شتگیں زبان ہما انت کہ آزبانانی تہا ہمک سال لکھانی حسابءَ کتاب چھاپءُ شنگ بنت۔ دیماشتگیں زبانانی تہا ہزارانی ہسابءَ ریڈیوءُ ٹیلی ویژن چینل ہست انت کہ آ شپءُ روچ وتی زبانءِ تہا پروگرام پیش دار انت۔ انچو ہمک ماہ صدانی فلم، تھیٹر ءُ ڈرامہ پیش کنگ بنت۔ لکھانی مردم اے پروگراماں چار انت۔ اے گپ گِیش اِتگ کہ اے زبانانءَ سرکاری سرپرستی ہست انت۔ اگن ما وتی زبان بلوچیءُ براہوئی بابتءَ ہبر کنیں گُڑاں ادا ہساب چپ انت۔ ادا سرکار مئے زبانانی ختم کنگءِ پُشتءَ اِنت۔ وت عالمی سروےءِ تہا ہست انت کہ براہوئی گار بوؤکیں زبانانی تہا اوار انت۔
جارکشءَ گُشتگ کہ اے درگتءَ بلوچیءُ براہوئی زبان چارگ بہ بنت، آ سک پشتءَ انت۔ اے وہدی بلوچیءُ براہوئی زبانءِ تاکءُ ماھتاک نہ بوھگءِ برابر انت۔ ہنچو مئے زباناں فلم، تھیٹرءُ ڈرامہ ہم نہ بوھگءِ برابر انت۔ بلوچی زبانءِ تہا چھاپءُ شنگ بووکیں کتابانی تعداد ہم سک کم انت۔ بلئے ایشی مستریں سبب مئے غلامی انت۔ اگن ما دنیاءِ آدگہ زبانانی دیمرویءِ گپءَ کنیں گُڑاں اے چیز الم مارا دیما ایر کنگی انت کہ اے وہدءَ آہانی زند چون انت۔ پہ زندگ بوہگءَ آجو بوہگ المی انت۔ دیما شتگیں زبان ہما انت کہ آ راج وتی حقءُ واکءِ مالک وت انت۔ آہانی استان ءُ تاگت جندءِ دستءَ انت۔ بلوچ راج غلام انت۔ بلوچی وانگ زانگءُ کتابانی سرا پابندی انت۔ تربت عطا شاد ہاسٹلءَ فوجءِ اُرشءُ کتابانی قبضہءَ بگر تاں شالءَ لائبریریانی سرا اُرش ہنچیں درور انت کہ مارا سکین دئینت کہ ما بحیثیت راج وتی زندگ دارگءِ ہاترا وتی ملک بلوچستانءِ آجوئیءِ گرگءِ جنزءَ ہر وڑا ہمراہ بہ بیں۔
بی این ایمءِ جارکشءَ دیمترا گُشت کہ اے جاورءِ گِندگءَ ہمے مارگ بیت کہ بلوچیءُ براہوئی زبان دومی زبانانی نسبت ءَ باز نزور انت۔ حدا مہ کنت کہ مئے زبان گارءُ بیگواہ بہ بنت یا میوزیمءِ زبان جوڑ بہ بنت۔ بلوچی زبانءِ زندگ دارگءِ حاترا باز جہدءُ کوشست کنگی انت۔ ایشی تہا ہچ شک نیست کہ بلوچی کوہنینءُ مزنیں زبانے۔ بلوچیءُ براہوئیءِ گپءُ حبر کنوک اے وھدی روٹکیءُ روکپتی بلوچستان، اوگانستان، ترکمانستان، عمان، امارات، قطر، بحرین، افریقہ، یورپ، آسٹریلیاءُ امریکہءَ جاہ منند انت۔ بلوچی زبانءِ گپءُ حبر کنوکانی کچءُ کساس ملین آنی تہا انت۔ وھدے یک قومءُ راجےءِ زبانءِ گپ کنوکانی تعداد ملین آنی تہا بہ بیت تو آ قوم باھد انت وتی زبانءَ زندگ بداریتءُ آ زبان گارءُ بیگواہ مہ بیت۔
جارکشءَ گشتگ کہ اے درگتءَ ھوریں قومانی گلءِ ادارہ یونیسکوءِ ذمہ واری انت کہ آ بلوچیءُ براہوئی زبانءِ رکینگءِ ہاترا گام گیج بزوریتءُ بلوچی براہوئی زبانءَ یونیسکوءِ لسٹءَ ھور بکنت۔ انچو بی بی سی، وائس آف امریکہ ءُُ فری یورپ ریڈیوءَ چہ مئے لوٹ انت کہ آ بلوچی زبانءُ براہوئیءِ تہا پروگرام شنگءُ تالان بکن انت۔ بلوچ قومءُ راج ءِ ذمہ واریءُ فرض انت کہ آوتی ماتی زبانءَ زیات چہ زیات بوان انت۔ بلوچی زبانءِ تہا زیاتءَ چہ زیات نبشتہ بکن انت۔ بلوچی تاکءُ ماھتاکاں بواں انت۔ وتی زھگ ءُُ نواسگاں بلوچی وانگ ءُُ نبشتہ کنگءِ سکینءَ بدئینت۔ ہوریں قومانی گلءِ اے ہم ذمہ واری انت کہ بلوچ قومءِ حق آجوئیءَ ہم قبول بکنتءُ بلوچستانءَ آجوئیءِ برجمیں جہدءَ بہ منیتءُ پاکستانءِ ظلمانی دارگءَ وتی کردءَ ادا بکنت۔
بی این ایمءِ جارکشءَ گشتگ کہ بنگلہ دیشءَ بنگالی زبانءِ ولگوج کنگءِ جہدءَ پد پاکستان مرچی بلوچی زبانءَ ولگوج کنگءِ جہد کنگءَ انت۔ بائدانت کہ دنیا اے گپءَ بیہال مہ بیتءُ بلوچ راجءُ بلوچی زبانءِ رکینگءِ وتی کردءَ پیلو بکنت۔ بیستءُ یک فروری اگن مارا بنگالی زبانءُ نوک دربرانی سرا اُرشءِ ترانگءَ گیجیت گُڑاں ما چشیں روچ باز دیستگ کہ بلوچ نودربر جنگ، برگءُ کشگ بوتگ انت۔ بلوچی کتاب قبضہ کنگ بوتگ انت۔ اگن دنیا ہمے ڈولءَ پاکستانءِ سرا آسرا بکنت گڑاں بلوچی زبانءُ بلوچ قوم دوئیں نہ ماننت۔ پدا اگن ما بنگالیانی پیمءَ وتی ڈیھ زُوت آجو نہ کت گُڑاں آ روچ دور نہ انت کہ مئے زبان، دود ءُ ربیدگ میوزیمانی نمائش جوڑ بنت۔ بنگلہ دیشءَ 1952ءَ نودربرانی سرا ارش مارا دو مارچ 2010ءِ ترانگءَ ہم گیجیت کہ انجنیرنگ ہونیورسٹیءَ خضدارءَ پاکستانی فوجءَ بلوچ کلچر ڈے داروکیں نودربرانی سرا اُرشءُ نودربر شہیدءُ ٹپی کت انت۔ چشیں روچاں تہنا بندیں کوٹیاں کانفرنس یا روچءِ دارگ مانہ داریت، بائدانت ہوریں قومانی گل عملی رنگءَ کار بکنتءُ بلوچی براہوئیءَ اوار درستیں زبانانی رکینگءَ وتی کردءَ پیلو بہ کنت۔
