نمیران اِنت منّان
نبشتہ: میار دشتی
دی بلوچستان پوسٹ
زندگی ءَ گوں جنگ کنگ گران نہ انت بلکیں زندگی ءِ بابت ءَ جیڑگ مردم ءَ باز تکانسر ءُ در پہ در کنت۔
من دگہ گپّے اِد ءَ تچک کن آں گْوش آں کہ بچار زندگی ءَ گوں جنگ کنگ یا زندگی ءِ بابت ءَ جیڑگ هَمک سر ءِ واست ءَ جیڑه ءِ نہ انت چیا کہ اِے دویں لبزاں هما مردم جیڑهے منّیت کہ آ بزدلے، یا آئی ءَ اِے لبزانی پجّار کنگ ءِ بودِشت نیست.
بچار بنی آدم ءَ را اِے دو روچی زِند مانا کنگ ءُ مردماں دیگی انت بے مانا ءُ بے شُناس ءَ زندگی کنگ بے مکسد انت نی ما همے بہ جیڑ ایں کہ زندگی چتو مانا بیت؟ یا اِے دو روچی ئیں زند چتو شُناس کنگ بیت؟؟؟من کمّو شمارا همے گالرداں جیڑگ پرمایاں بچار زندگی ءِ پجّار کنگ یا زندگی کنگ اِے نہ انت کہ بس پہ وتی زات ءِ واست ءَ تو زندگی کن، اِنّاں بلکیں زندگی ءِ مانا ءُ شُناس کنگ ایش انت کہ پہ دومی ءَ زندگی بکن، اگاں تو دومی آدم زات ءَ پہ زند گْوازینگ بِنا کُت، گڑا دلجم بی کہ تو زندگی مانا داتگ.
ءُ من همے سرپد باں کہ زندگی ءِ مانا دیگ ءَ، ءُ زندگی ءِ شُناس کنگ ءَ راجی ڈُبّہانی زیروک زان اَنت، آ زندگی ءَ یک هنچیں رنگی ءَ گوں رجین اَنت کہ سرجمیں دُنیا ءَ را اَبکّہ ءُ هیران کن اَنت.
همے زندگی ءِ مانا ءَ دیوکانی تہا یک هنچیں نام ءُ اَبدمانیں کارِستے،منی پِگر ءِ سرشماں گردگ اِنت دَرور چو اَگولیں سر ءَ گُشئے دمکاں گردگ انت آ راج ءِ نمیرانیں منّان انت.
هَو ڈاکٹر منّان تو نمیران ئے…!
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
