مات ءِ مھر ءُ ناسرجمیں واب
نبشتہ کار: بابا جی آر بلوچ
دی بلوچستان پوسٹ
زھگ وھدیکہ ودی بیت گڑا لوگ ءِ درستیں مردم گل ءُ شادان بنت کہ زھگے پیداک بیتگ ءُ مات ءِ لیلو نہ بُرّ اَنت ءُ گھار ءِ نازینک ءُ شاگیں گوانزگ ءِ چنڈینگ نہ اُوشت اَنت، ھر دیم ءَ سر ءَ ترین گش ئے نُگرھے چَہ زمین ءِ دلبند ءَ کشّگ بیتگ ءُ گس ءِ درستیں مردم چَہ ھمے گنج ءَ سیت مند اَنت ءُ ھر دیم ءَ چمّاں شانک دے ھمے گمان بیت کہ یک وشھالی یے ندارگ گندگ ءَ کیت۔ اَنچش وھد باھند بنداں بیت ءُ زھگ رشت کناں کنت ءُ دو سال ءَ سر بیت ءُ مات ءِ نازینکانی تَب ڈولدار تر بیت ءُ مات پہ نازینک چُک ءَ وتی گْور ءَ توار جنت ءُ مات ءِ مھر ھمد ءَ گندگ ءَ کیت کہ مات چوں زھگ ءَ دوست دار اِیت، ھمے پیم ءَ زمانگ گوزان بیت ءُ زھگ ءَ پہ وانگ ءَ دیم دنت…!!.
بچ پہ وانگ ءَ در کپ اِیت ءُ مات ھر وھد ءَ ماں بچ ءِ گم ءَ ارس گوار اِیت ارس ھما وھد ءَ شل اَنت تاں مات گوں وتی دیدگاں بچ ءَ نہ گند اِیت ،بزگیں مات چی کنت کجام گم ءَ ماں بڈَّ زیر اِیت..!!
ماس زھگ ءَ گوں وتی نازاکیں دستاں رودین ایت اِے پِکر نہ کنت کہ یک ھونواریں لشکرے ماں مئے سر زمین ءِ دلبند ءَ ساڑی اِنت پہ ھون ءِ گُلمبگ ءَ تُنیگ اِنت ؟ ساہ ءِ کشگ ءَ ساڑی اِنت زھگانی چورہ کنگ ءَ ھچ چک ءُ پد نہ بیت زندان ءِ مان برُگ ءَ مھتل نہ بیت ، اے ھما زالمیں لشکر اِنت کہ نواب نوروز ھان ءِ کوش ءَ دست ءِ ھور اَنت ءُ نوزدہ سد ءُ ھپتاد ءُ دو ءَ سوئی ءُ ڈیرہ بگٹی ءِ لشکر کشی ءَ ھچ پُشت ءَ نہ کنز اِت ءُ بازیں مری ءُ بگٹی ءُ مینگل شھید کنت۔
اے ھما بے ڈولیں ءُ بے گِھاریں لشکر اِنت کہ ماتاں چَہ بچانی پُلگ ءَ ھچ مھتل نہ بیت، جوناں ماں گیاباناں چگل دنت، لھتیں پہ بے واھُندی زمین ءِ میار کنگ بنت کہ آھانی پجار نہ بیت چی ءَ کہ زالمیں لشکر کُنٹاں ھم جنت ژند ءُ شُوند کنت تا ھما کنٹ ءِ پجار اُوں مہ بیت۔
مات ءِ ھما دیستگیں واب کہ پہ وتی بچ ءَ دیستگ ئِے آ چی پیم سرجم بیت،چی پیم ارس ءِ گواری اُوشت اِیت،ھما پِگر مات ءَ پہ بچ ءَ کتگ اَنت کہ زھگ وان ایت ءُ مزن بیت ءُ منی ھر پیمیں واھشتاں پورو کنت آ چوں منزل ءَ سر بیت…؟؟؟
مات وھدے وتی زھگ ءِ شھیدی ءِ ھال ءَ وتی گوشاں اِشکنت گڑا ارسانی شلگ ھچ بند نہ بیت پد ءَ ھیال کنت کہ منی زھگ سالونک اِنت، گڑا ارس گواری ءُ نازینک ھوار بنت، برے پہ دپ گریوگ ءُ ھیسکارگ ءَ پُر بیت ءُ برے نازینک وتی پرشتگیں زبان ءِ سر ءَ گوش اِیت کہ آئی ءِ بچ دوبر سالونک کنگ بیت ءُ دلبند ماں ھوناں چکار اِنت دستانی ھنی ءِ بدل گلزمین ءِ سر ءِ رج اِتگیں آئی زھگ ءِ ھون اَنت کہ پاکستانی لشکر ءَ پہ آجوئی ءِ لوٹگ ءَ شھید کتگ ءُ آئی کنٹ ماں مات ءِ زانسرانی سر ءَ ایر اِنت ءُ مات ءِ ارس انارکانی سر ءَ لونجان اَنت ءُ گوں شھید ءِ ھوناں ھور ءُ تور اَنت۔
مات ھمے گوش اِیت کہ منی زھگ نمیران اِنت من رودینتگ پہ سر زمین، مروچی وتی مات ءِ ھک ئِے اد ءَ کُتگ ءُ من پہ ناز ھمے گپ ءَ گوش آں کہ منی بچ پہ سرزمین ءَ ندر بوت ءُ آئی سالونکی گُد گوں ھون ءَ دژمن ءَ رج اِتگ اَنت ءُ من وتی دستاں گوں گلزمین ءِ میار ئِے کن آں…
زھگانی شھیدی پہ ماتاں سکیں ازابے بلے پہ سرزمین ءِ آجوئی ءِ واستا مات ھم وتی بچانی ندر کنگ ءَ ھچ چَک ءُ پد نہ بنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
