زلم ءَ زلم مہ نویس
بانک سمیرا بلوچ
رجانک:- بابا جی آر بلوچ
دی بلوچستان پوسٹ
زلم چے ءَ گوش اَنت؟
بلے اے زلم چے یے,؟؟ ، گوں کجام ھم مردمے ءَ ھرابی ءَ پیش آیگ….
کجام ھم انسانے ءَ چہ ھک ءَ زبھر کنگ..!!
نا انساپیانی ھلاپ ءَ ھبر کنگ ءَ نیلگ..!!
راستی ءِ پدّر کنوک ءِ توار ءَ ترکّ ءُ نُک کنگ..!!
منی ھیال ءَ مستریں زلم ھمیش اِنت کہ ھرکس زلم کنت آئی ءِ ھلاپ ءَ ھبر ءِ کنگ ءَ ھم نیلگ…!!
راستی ایش اِنت ھرکس زلم کنت ھما زالم اِنت ءُ مزنیں ترسوک ءُ بے دلے ..!!
گْوش اَنت کہ چہ یک بزرگے ءَ جست گِرگ بوت کہ شرین ءُ ھرابیں چیزانی چِہ پیم پجار کنگ بیت؟
گڑا ھما بزرگ ءَ پسو ترّینت کہ ھرچ کارے پہ دُزی ءُ چیروکائی کنگ بہ بیت گڑا بزاں کہ آ ھرابیں کارے.
ھمے پیم ءَ پاکستانی زوراکیں لشکر ماں شپانی تھاری ءَ میتگانی سر ءَ اُرش کنت ءُ بلوچ مردین ،زھگ ءُ زالبول ءُ کماشاں آوار جنت ءُ آھاں وتی زنداناں بندیگ اِش کنت ءُ وتی کرتگیناں گیدی ءِ دیم ءَ چیر دیگ ءِ ھاتر ءَ نبشتہ کنگ ءُ گوشگ ءَ مکن کنت..
اگاں پاکستانی زوراکیں لشکر اے پیمیں کاراں پہ ھک ءِ ھاتر ءَ اگاں بہ کرتیں گڑا اے پیم ءَ ھبراں چیر دیگ ءِ جھد نہ کرتگ اَت پاکستانی لشکر ءِ بازیں کِسہ ھست اَنت ءُ اے ھر روچ گیشتر بوّان اَنت..
نوں ھر روچ بلوچ زالبول ءُ زھگ آوار جنَگ بوگ ءَ اَنت بلوچستان ءِ تہ ءَ بلوچ نودربر گَل ءُ سیاسی گَل پہ کار ءِ کنگ ءَ مکن کنگ بوگ ءَ اَنت،بلوچاں چَہ راجکاری (سیاست) ءَ دور کنگ ءُ آھانی بنکی ھک پچ گِرگ بوگ ءَ اَنت چوش کہ راجکاری نودربرانی ناں بلکیں دمگی جھمنندے ءِ بنداتی ھک اِنت ءُ نودربرے ءُ لَس مھلوک ءِ ھک اِنت کہ وتی لوٹانی بابت ءَ توار چست بہ کن اَنت اگاں گچین کنگی ءَ ھر یکے ءَ ھک ھست گڑا راجکاری ءَ ھم ھرکس ءَ ھک ھست ءُ آئی ءِ سر ءَ اے کار سدک بیت..
بلوچستان پہ زور یک مُھریں شور ءُ سلاھے ءَ سداں سال پشت ءَ پشت گیتکگ بلے راجکاری ھما چیز اِنت کہ وھدے ما وتی ھک ءِ واستا توار ءَ برز کن اِین ءُجُھد کنیں ءُ وتی ھک ءَ پچ گر ایں بلے نودربرانی گل ءِ سر ءَ بندش جنگ گڑا زلمے نہ اِنت چے یے..؟؟؟
ڈیرہ بگٹی ءِ دمگ سوئی ءَ چہ سرجمیں پاکستان ءَ گیس سر کنگ بیت بلے ناں ڈیرہ بگٹی ءَ اِلمی جوانیں ادارہ ھست ناں زندگی ءِ بنکی لوٹ ھست اَنت….
چیزے روچ پیش یک ورنایے ءَ ماں ٹویٹر ءَ پہ درمان داروی وانگی شھدربرجاھے ءِ (میڈیکل کالج)واستا گونڈ گپتیں کلوھے سرکاری سرکماشانی سر ءَ داتگ اَت کہ اے پیمیں کاراں پہ ڈیرہ بگٹی ءَ بہ کن اِت ءُ وانگجاہ بہ دے اِت کہ وانگ ءِ نیمگ ءَ مھلوک ءِ سسا کم اِنت ءُ وانگی لوٹ دو درسد اِنت ءُ ڈیرہ بگٹی ءَ یک انٹر کالج ءُ یک ماڈل وانگجاھے پہ جنک ءُ بچکاں ھست آ ھم پی پی ایل ءِ نیمگ ءَ چَہ بلے بژنی ھبرے کہ سرکاری کاگد پُر اَنت کہ ڈیرہ بگٹی وانگجاہ ءُ ایندگہ آسراتی بازیں چیز ھست بلے درست دروگ اَنت ءُ ھچ چشیں چیز نیست ھر وانگجاھے کہ بیتگ آ بند اَنت یا پاکستانی لشکر ءَ وتی بنجل جوڑ کتگ اَنت ءُ ھمے ھال اِنت بلوچستان ءِ ھمے دمگ ءِ کہ اے دمگ ءَ ھزارانی کچ ءَ مال ءُ مڈی پہ پاکستان ءَ مُچ بوگ ءَ اِنت ءُ بلوچستان ءِ ھزانگ پاکستان ءَ رس اِیت..
بس ھمے یکیں دمگ نہ اِنت بلکیں سرجمیں بلوچستان اِنت کہ ڈلگ چاریاں گوں دُچار اِنت ءُ بلوچانی جاور چوں درتگ پچانی اِنت ءُ بلوچ چہ بندات ءَ گوں پاکستان ءَ وتی ھک ءِ واستا جنگ ءُ چوپ کنگ ءَ اَنت ءُ وتی مات ءُ گھارانی ازت ءِ پھازگ ءِ واستا جنگ کنگ ءَ اَنت ءُ بنکی ھک ءُ زانت ءُ زانشت ءُ راجکاری ءِ جَنگ ءَ کنگ ءَ اَنت ءُ بلوچ وتی بیگواھیں کماش نودربر ، زھگ ءُ زالبولانی یلو بوگ ءِ واستا جھد کنگ ءَ اَنت کہ پاکستانی لشکر ءَ وتی زندان ءَ بندیگ کتگ اَنت ءُ وسر ءَ بے گناہ ءَ سزا دیگ بوگ ءَ اَنت، بلے پاکستان جَبر کنت ھم ھراب نہ اِنت ءُ بلوچ وتی ھک ءِ واستا جنگ ءَ اِنت گڑا ھراب اِنت!؟
پاکستان زلم کنت ءُ زلم ءَ چیر دیگ ءِ بے سوبیں جھد کنگ ءَ اِنت ءُ بلوچ زلم ءِ ھلاپ ءَ جنگ ءَ ساڑی اِنت ءُ سینگ ءَ ماں دیم ءَ کنت ءُ اُوشت اِیت، دیر بیت بلے باج ھر وھد ءَ ھک ءُ راستی ءِ بیت. وھد ھر وھد ءَ یکیں پیم ءَ نہ جَل اِیت زلم ءِ شپ راست اِنت مزن اَنت بلے سھب اَلم بیت.
پاکستان ھمے ھیال ءَ وتی دل ءَ در بہ کنت کہ مے زھگ ءُ زالبولانی آوار جنگ ءَ ما پشت ءَ کنز ایں آ آئی ءِ بے زانتی اِنت بلکیں مے جھد مھکم تر بیت زلم ءِ ھلاپ ءَ راج ساڑی اِنت کہ سینگ ءَ مِک بہ کنت ءَ بوشت اِیت ءُ دژمن ءِ ھر پیمیں ھیلاں ناکامیات بہ کنت چُش کہ پاکستانی لشکر دگہ سے گھار ماں شالکوٹ ءَ آوار جتگ ءُ بندیگ کتگ اَنت ءُ شالا پاکستان نیست ءُ نابود با.
“پَھلی لوٹاں چَہ گھار سمیرا ءَ کہ من کمے گیشیں چیز ھوار کتگ امیت کناں گھار من ءَ پَھل کنت”
بلوچستان آجو بات
بلوچ راج میزراں بات۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
