بلوچ راجی جنز ءِ بگیری ءَ پاکستان ءِ نوکیں رپک
نبشتہ : ھسا بجار
دی بلوچستان پوسٹ
انچش کہ شما سرپد ات کہ زیکیں روچ ءَ ماں اواران ءِ جتا جتایں دمگاں چہ زالبول چہ وتی گساں چست کنگ ءُ برگ بوتگ ات انت ءُ آوانی سرا وتگڑیں بهتام جنگ بوتگ ات ءُ چیزے کلنڈیں سلاه ءُ سڑتگیں شورو دیما دیگ بوتگ ات انت – کہ” جی اے راجی جنز ءِ کُمکار انت کہ ما گوں سلاهاں گپتگ انت “-
همے جار اش ماں رسانکدراں شنگ کُت –
اگاں ما ایرتی ءَ گوں بچاریں تہ اشی ءِ پژدر ءَ مارا مکاریں پوج ءِ بازیں کارستانی ے گندگ کئیت –
یکے بلوچ چاگرد ءَ ماں زالبول ءِ بستار ، ءُ دومی هستیں جنز ءِ کدر –
پاکستان ءِ ریپکاریں پوج ءَ پہ جنز ءِ بگیری ءَ لس مهلوک ءِ دل ءِ تہ ءَ چہ آئی ءِ کدر ءِ کم کنگ ءُ وتی کاسگ لیس ءُ وتی منشا ءِ مردمانی دیما آرگ ءِ هاترا بلوچ زالبول چست کتگ ءُ گوں وتگڑیں کسمانکے ءَ رسانکدر ءَ آواناں دیما آؤرتگ ءُ پدا وتی اسمبلی ءِ تہ ءَ وتی کاسگ لیس پرماتگ انت گوں وتی دُربیانی ءُ جزباتی گشتانک آں ، پدا وتی مَنّ ءَ آوانی زهرشانی آنی پدا زالبولانی آجو کنگ ءِ جار پرینتگ –
(پهل کن ات منی مول بندیگیں مات ءُ گهارانی دائم ءَ بندیگی نہ انت) –
بلوچ زالبول تہنا همے چاریں مئے ماس ءُ گهار نہ بوتگ انت یا نہ انت –
اگاں آئی ءِ کاسگ لیس ءُ هستیں زمانگ ءِ بٹیسٹا آں هینچک کہ پہ بلوچ مات ءُ گهاراں توریت تہ اے دگہ هزاراں مات ءُ گهار سالانی سال بیگواه انت تہ آیانی سوج ءَ پرچہ کس نہ کنت –
ناں پاکستان ءِ پوج آیانی برگ ءِ مَنّگ ءَ ءُ مان رسانکدراں جار پرینگ ءَ تیار انت ءُ ناں آ پہ وتی بٹیسٹا آنی جزباتی گشتانکاں آوانی آجو کنگ ءَ –
کیچ ءَ بگر حب ءَ پنجگور ءَ بگر داں تپتان ءَ نوشکی ءُ ڈیره آں درا چشیں دمگ نیست کہ زالبول برگ ءُ بیگواه کنگ نہ بوتگ انت یک روچے ناں پاکستان ءِ جابریں پوج ءَ رسانکدر ءَ داتگ ءُ نہ پہ وتی بلوچیں کاردارانی گُوشگ ءِ پدا یل داتگ انت –
ادا چہ همے پدّر انت کہ هستیں دور ءَ ماں بلوچ سرڈگار ءَ هرچی کہ بوهگ ءَ انت تہ اے ویل ءَ اوار کلیں شے همے بٹیسٹا گونگیں چاپلوس ءُ کاسگ چٹانی منشا ءِ پدا بوهگ ءَ انت –
پہ وتی ساه ءِ تُرس ءُ چارکلدار ءِ هاترا وتی مات ءُ گهارانی ننگ ءُ ناموساں گوں گوازی کنگ آواناں آزار دیگ ءُ وتی واجہ ءَ را وش کنگ ءُ وت ءَ آسودگ کنگ ءَ ابید دگہ هچے نہ انت –
بلوچ راج یک گپے ءَ شر سرپد بی بیت کہ پاکستان ءِ لگوریں پوج ءَ بلوچ راج پهازیں لشکر ءِ دیما پروش وارتگ ، پمشکہ آ روچے گوں نوکیں پندلے ءَ بلوچ لس مهلوک ءَ ریپ دیگ ءُ وتی منشا ءِ مردمان دیما آرگ ءُ وت ءَ ماں بلوچ سرڈگار ءِ سرا زندگ دارگ ءِ بے سوبیں جهدے کنگ ءَ انت –
روچے زبیده جلال ءِ سیرانی دروشم ءُ روچے وردن بهر کنگ ءُ روچے ڈاکٹرانی دروشم ءَ گوں کهن ءُ سڑتگیں گولی ءُ درماناں علاج ءِ نیمون ءَ وت ءَ ماں لس بلوچ ءِ دل ءَ جاگہ دیگ ءَ انت – آوران ءِ اے ویل هم چمے رپکاں چہ یک نفسیاتی جنگے ءَ ابید هچے نہ انت –
کل بندیگ آجو بات انت
بلوچ سرڈگار آجو بات
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
