گوھرام، ایمانداری ءِ چیدگ
واجُل دشتی
دی بلوچستان پوسٹ
اکتوبر 2010 روچ من ءَ یات نہ اِنت بیگاہ ءِ وھد ءَ من ءَ شھید باھڑ ءَ پون کت ءُ لھتے سامان گُشت کہ تو ھمشاں بُزور من یکّے ءَ گُشتگ ترا مئے کرّ ءَ کار ایت ءُ سر کنت، من سامان زُرت اَنت ءُ ھما مردم ھم گوں پرپٹ ءَ اتک کہ من ءَ سنگتانی کرّ ءَ سر بہ کنت، من ءَ سنگت ءَ زُرت دیم پہ ھمانگر راہ ءِ نیم ءَ ما گوں شھید باھڑ ءَ ڈیک وارت، آئی ءَ پرپٹے گون اَت ءُ دگہ سنگتے ھم آئی ءِ ھمراہ اَت دیم پہ شھر ءِ نیمگ ءَ رؤگ ءَ اِت اَنت، آ دومی سنگت شھید ساگر اَت کہ اوّلی رند ءَ من دیستگ اَت ءُ پد ءَ رَند ءَ آئی ءِ گوما شرّیں وڑے ءَ پجاروکی بوت آیاں گشت کہ شما جاگہ ءِ سر ءَ برو اِت ما پد ءَ واتر ھمود ءَ کا ایں ۔
شھید باھڑ گوں دگہ لھتے سنگت ءَ شھر ءَ کارے ءَ اَتکگ اِت اَنت ءُ آیاں گوکدان ءِ نزیک ءَ جاگھے داشتگ اَت ءُ من ءَ سنگت ءَ ھما جاگہ ءَ بُرت ءُ سر کُت وت پد ءَ واتر بوت-
ساھتے ءَ رند شھید باھڑ ھم اَتک من ءَ انچو گمان بوگ ءَ اَت کہ سنگت اد ءَ چہ دَر کپ اَنت پرچا کہ آیاں وتی کُلیں سامان یکجاگہ کُتگ اِت اَنت، بلے باھڑ ءَ گُشت ما سنگتے ءَ ودار داتگ آ کیت گڑا در کپ اِیں-
ما کساس دو ادار ءَ گیش ودار کُت پرپٹے اَتک دو سنگت اِت اَنت، آیاں مئے واستا ورگ ھم گون اَت، میان کدّ ءُ بالاد ءُ مُوداں توک ءَ چہ رَندوکیں گوھَرام من ھمد ءَ دیست ھمے سنگتاں چہ یکے گوھرام اَت ھما سنگت ءِ کہ ودار اَت آ گوھرام اَت-
گوھرام ءِ گوما ھمے یکیں شپ ءَ منی نزیکی، پجاروکی ءُ سنگتی انچو بوت چو گُش ئے ما دیریگیں سنگت اِیں، شام ءَ چہ پد ما دگہ نیمگے شُت ایں جاگھے داشت لھتے سنگت پہ کارے ءَ دَر کپت ،من شھید باھڑ، شھید گوھرام ءُ شھید ابوبکر ءَ ھوار دگہ یک سنگتے ھمد ءِ مھتل بوت ایں، گپ گپ ءِ تہ ءَ من سرپد بوتاں کہ گوھرام بی آر اے ءِ سنگتے، اد ءِ سنگتاں دست گپتگ ءُ بی آر اے ءِ اوتاگ ءَ دیم دینت ئِے، شھید ھمّل، دُرجان ءُ شھید ماجد ھم گوھرام ءِ چارگ ءَ اتکگ اِت اَنت، بلے آ پد ءَ زوت واتر بوت اَنت-
گوھرام ءِ تبیت شر نہ اَت ءُ آئی ءِ سر سک درد ءَ اَت ، پد ءَ سنگت گُشگ ءَ اِت اَنت کہ (مواداں) سر درد داتگ سنگتاں (مواداں) چہ (مین) تراک جوڑ کتگ، ھمے مواداں نگیگ کتگ-
آ وھد ءَ کہ گوھرام من دیست سکیں ھاموش ءُ کم ھبریں سنگتے اَت نزاناں ما پہ آئی ءَ نوک اِت اِیں گپ کم کُت ئِے یا دگہ سوَبے، ھمے شپ ءَ رَند ما درست یک یک بوت اِیں ءُ گوھرام ءَ منی موبائل نمبر زُرت ءُ وھد وھد ءِ سر ءَ ھال اھوال برجاہ اَت-
یکروچے گوھرام ءَ من ءَ پون کت ءُ گشت کہ من رؤگ ءَ آں مستونگ ءِ نیمگ ءَ ھمانگر مارا سنگتاں لوٹ اِتگ، ھمے پون ءَ چہ رَند من سے ماہ ءَ گیش گوھرام نہ دیست ءُ پون ءَ ھم مئے ھال نہ بوت رَند ءِ من سرپد بوتاں کہ آ پہ ٹریننگ ءَ اوتاگ ءَ شُتگ اے میان ءَ مئے ھچ وڑیں ھال نہ بوت-
کساس سے ماہ ءَ پد یکروچے آ گوں دگہ سنگتے ءِ ھمراھی ءَ ھمود ءَ شھر ءَ اَتک ما داں دیراں نِشت اِیں گپ ءُ ھال بوت دیگر ءِ وھد ءَ آیاں من ءَ اجازت کُت در کپت اَنت، نوں من سرپد بوتاں کہ گوھرام مند ءِ نندوک اِنت، اے دومی گِندُک ءَ پد یکرندے پد ءَ مئے ھال اھوال برجاہ بوت، وھد وتی گاماں دیم ءَ بران اَت من پہ وانگجاہ ءِ (چُھٹیاں ) موکلاں وتی میتگ ءَ شُتاں گڑا ھمود ءَ گوھرام اَتک، آیاں ھمے دمگاں لھتے تُپنگ زُرتگ اَت ءُ ھمیشانی رَند ءَ اَتکگ اَت بلے اے وھد ءَ آئی ءَ بی آر اے یل داتگ اَت ءُ بی ایل ایپ ءَ اَت-
2011 ءَ آ پہ کار ءُ روزگار ءَ بھرین ءَ شُت (آئی ایس آئی)چیریں ادارہ آئی ءِ کستریں برات کیام ءَ آوار جنت ءُ پد ءَ شھید کنت، گڑا گوھرام پد ءَ واتر وتی سرڈگار ءَ کیت تچک ءَ سنگتانی کرّ ءَ رؤت نوں ما ھم شھر یل ءَ داتگ اَت ما گیشتر وھد ءَ یکجاہ اِت اِیں-
گوھرام سکّیں ایماندار ءُ مُکلسیں سنگتے اَت زاتی زِندگی ءَ سک چِڑ اِت جزباتی بوت بلے وھدیکہ گپ گل ءُ راجی جُنز ءِ بوت گڑا سک مھروان ءُ ایماندار اَت، سکیں تچک ءُ راست گُشیں سنگتے اَت ،آئی ءَ رَدی ءُ نزوری بِھ اوپار نہ کُت ھرکس کہ رَد اَت آئی ءَ دیم ءَ گُشت ءُ گل ءِ درگت ءَ آئی ءَ کسّی رِیا نہ کُت وتی گپّانی سر ءَ اوشتوکیں سنگتے اَت-
آئی ءِ توک ءَ لب ءُ لالچ نیست اَت ءُ نیکہ آئی ءَ وتی جِند ءِ لوگ ءُ چُکّانی واستا جیڑ اِت، آ راج ءِ شیدائی اَت سرڈگار ءِ ھاتر ءَ گنوک اَت اسول ءُ رھبندانی سر ءَ سک تُرند اَت، یک سرجمیں سرمچارے اَت-
پازُل جان پنام ء گوھرام بلوچ ایمانداری ءِ چیدگ اَت آئی ءَ شھری نیٹ ورکانی مُھکم ءُ سرگرم کنگ ءِ ھاتر ءَ سک باز جُھد کت، آئی ءَ گل ءُ اوتاگ ءِ گِھتری ءُ جوانی ءِ سر ءَ مدام جیڑ اِت گپ ءُ باوَست ئِے کت-
برات ءِ شھادت، لوگ ءِ تنگدستی ءُ ھندی مُکبر ءُ ایجنٹانی زوراکی ءُ پندلاں آ پروش دات نہ کت، مُھکم ءُ تمرد اَت ءُ دانکہ گُڈی ساہ ءَ گوں وتی گل ءُ راجی جُنز ءَ ایماندار اَت-
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
