کمےّ وھد کشّ
منھاج مختار
دی بلوچستان پوسٹ
تو ھم زانئے کہ من ترا گشگایاں بلے اگاں ترا موھ رست منی اے گلِگ ءَ چّمے بجن گوں
ترا یاد بیت مئی دوھزار یازدھ….. سکیّں آسگواریں موسمے ات تبد پہ وڈ زمین ءِ ساھ داراں پیلاشان ات ءُ ھمے آسگواریں تبد ءِ روچ ءَ ما ءُ شما وتی پولگ ءَ درکپتگ ایں ھمے زند ءِ لھتیں وھد ءُ ساھتانی ھمراھ پہ ایوکی ءِ گیابان ءَ ھما نام ءَ شوھازگ ءَ اِتاں کہ چاگرد ءَ داتگ اِتاں…. ما ءُ شما بچاریں ہمے واھگانی گرنچ اوستانی پند رژناھیں پجار ما زرُت ءُ دوست داشتاں؟
یک گپے پدا گشاں ترا یاد بیت ما شما چار سنگت اِتیں ما شما چے گشت؟ دمـبرگی نہ ایں۔ ترا یاد بیت؟
دوھزار نوزدھ انت تو دمُبرتے پرچا؟ تو مدام ھمے گپ منا ھم یات داتگ کہ بے تواری مئے شمے مرگ انت تو پرچا وت پہ مکیمُی بے توار بوتے؟
من اے گپ ءَ الم وت ھم ماراں کہ من رپٹگ ءَ آں ءُ پہ کئے؟ ھمائی واستہ کہ پہ وتی ھاجتانی واستہ وتی سرجمیں زند ناں!! بلکیں وتی لوٹوکانی ارمان گوں ھاکاں ھوار کتُ انتے پدا گشاں ناں من ھما کردار ءَ گشگا ھاں کہ آئی ھمک گوانک ءَ زمین ءُ شھیدانی توار ءَ وتی گوشاں اشکنگا ات ءُ پہ ستک دل مارا گشگا ات۔
من ھما شاعرءَ گُشگاھاں کہ گشتے
دزُگوں کپتگاں ڈُنگ گوں کپتگاں راج جُنز ءَ منی
آجوی ءِ سِلاھ بندیں گلّاں گشُ ات لشکر ءَ نوک کن
من ھما نام ءَ گشگاھاں کہ آئی ءَ وتی زند ءِ سرجمیں مارشت ءُ واھگ، لوٹ کشتگ ات انت پہ زمین زندگ ات من ھما آھوگ گُل ءَ گشگاھاں کہ آ نوروز بلوچ ءَ یا یوسپ ءَ چے آھوگ گلُ ءِ نام ءَ زانگ بوتگ… ءُ کھت ھمیش انت، من ھمے واستہ نبشتہ کنگاھاں کہ آھوگ منی نزیکتریں سنگتی ءَ ابید آھوگ گلُ یک انچیں کسہے ءِ جتائیں کردارے ءِ وڑا گندگ بوت۔ پمیشکا مناھما اوستانی پرشتگیں ارمان نبشتہ کنگ پرماھگا انت
جوانسالءَگوں رپٹگءَاتاں بہ بکش اِت گپ دراج بوت بلئے….!
اوستانی شھم کوردیم بنت واھگ وتا دُروہ انت بس سرتگیں اھدانی کدُوھاں گوات بارت۔ ءُ پدا کسہ ءِ آسریک انچیں بے چاڑی یے ودی کنت کہ دوستناک چہ بے سمائی وتا درشان کن انت ءُ اے گیشیں کھُت بنت، واھگ بنت، ارمان بنت کہ تھ ءِ گُک بجُ انت آھ درکئیت پرچی ءَ چو۔۔۔۔۔۔۔۔۔۔؟ جسُت گوں کئے ءَ چہ وتا چے پسّو اش کنگ بیت تو وت شرتر زانئے کہ چہ کلُاں نزیک تر بوتگ ئے سما بیت من. چیزے نبشتہ کنگاھاں بلے ھیراناں کسہّ ءَ کجاُ چہ بنگیج بکناں ءُ آسرکجُ ءَ بہ بیت
گوں ھمے کولنج ءَ آھ… دریگتیں چُش مہ بوتیں
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
