راجی تحریک اٹ فیض محمد یوسفزئی نا کڑد
نوشتہ: یارجان زیب
دی بلوچستان پوسٹ
بلوچستان ہموڈغارءِ ہراڑے حق ءَ نا توارے بڑز کروکاتا ہچو کمی ئس اف۔ ہندن مستونگ ہمو ڈغارءِ ہراکہی سیاستدان، شاعر، ادیب، عالم دین، فن کار، گلوکار ودی کرینے۔ ہندن اسہ پِن ئس ملک فیض محمد یوسفزئی نا ءِ ہرا مستونگ نا زیباغا خلق پڑنگ آباد ٹی ودی مس، یوسف زئی قوم قابل فخرو تاریخ اسے نا خواجہ ءِ۔
ہراتم ہیت کننگ آ پابندی ئس، ہیت بننگ آ پابندی ئس، بشخندہ غا پابندی ئس ہمو وختا اوغوک و کم ئس ولے داسہ اوغوک و بھاز ءِ۔ دلاسہ تروک اوکم ءِ۔ ہمو دورءَ ٹی ملک فیض محمد یوسف زئی او منہ باشعور او ورنا وطن دوست ئسے جاگہ مریسہ جہد ءَ نا بنا ءِ کریر۔ ملک فیض محمد نا حساب وطن نا باشعور و پہہ انگا سیاستدان تیٹی مسکہ۔ اودے خدانا تروک اوبے کچ آ لائخیتا سوب آن خان قلات بلوچستان دارالعلوم نا باسک کرے او عالیجاہ ناخطاب ءِ تس۔
1928آن انجمن اتحاد بوچاں آن تینا سیاسی زند ءَنا بنا ءِ کرے ۔1929ئٹ نواب یوسف عزیز مگسی داٹی اوار مس۔
ملک صاحب، میر غوث بخش بزنجو نا سیخا ٹی پاکستان نیشنل پارٹی (لہڑی گروپ) (1995) ٹی اسکا، او بلوچستان ئٹ مروک آ ظلم او جبر سامراجی طاقت آتابر خلاف جہد کرسہ کرے۔
ملک فیض محمد ہمو خواجہ ءِ ہراتینا سرکاری آ ڈپٹی ءِ ہم وطن کن ندر کرے ملک فیض محمد یوسف زئی ہرا تحصیلدار ئس، انگریز آتا مون آ وطن نا عزت کہ تینا کہی سنگت آتے تو اوار ڈپٹی تن دزکش مسُّر۔ دا ہمو وخت ئس ہراتم قلات استٹیٹ پارٹی نا خلاف قانون قرار تسُّر، پارٹی نا فیصلہ غا باز آ باسک آک تینا ڈپٹی تن دزکش مسر۔ ملک فیض محمد یوسف زئی اولیکو بندغ ئس ہرا کل آن مست ڈپٹی ءِ ہلا۔
عبدالرحیم خواجہ خیل، میر عبدالکریم، میر فاضل محمد خان ہرا وزیر تعلیم ئس (ملک محمد سعید خان، مولانا محمد عمر، مولانا عرض محمد، مرزا فیض ہراتے ریاست بدر کننگا، منہ وخت آن پد میر گل خان نصیر، میر حمل خان گہرام زئی ہم تینا ڈپٹی تے ہلار۔
ملک فیض محمد کہی وار زندان تیٹی جیل و جولان تے سگا، ملک فیض محمد ہمو عظیم آ مجاہد تیٹی حساب مریک ہراک تینا گڈیکو ساعت اِسکان وطن نا ورنا تا حق کہ جنگ کریر، قید زندان و بندی گری آن پد ہم اونا ہمت او جہد ئٹ ہچو کمتی ئس بتو۔ملک صاحب ہزارا فریشانی تے سگا او تینا مونا تینا (بس) ہرانا ہموتم نہاد ونیم لکھ ءَ تبا خناتے تینا زمینداری، باغ تے او تینا خرّن آ فصل آتے وطن کن ندر کرے۔ ملک صاحب کم ونیم ( صدی) آن گیشتر وخت اِسکان سیاست نا میدان ءَ ٹی ئس، بلوچستان نا مخلوق نا حق آتے کہ کاریم کرے او کہی قربانی تے تس ننا سیاست نا روشن او استار ئس جوڑ مس، ملک فیض محمد یوسفزئی و سیاست اسہ ہلو تون تفوک اسّر۔
15مئی1913 جمعرات نا دے ملک داد محمد یوسفزئی نا اُرا خلق پڑنگ آباد مستونگ ئٹی ودی مس،67 سال اسکا بلوچستان نا خذمت ءِ کرے 82 سال نا عمر ءَ ٹی 28 ستمبر 1995 پنچ شمبہ نا دے ننے آن جتا مس۔
ملک فیض صاحب نا مسہ مارو: ملک نورمحمد یوسفزئی، ملک خالد یوسفزئی، و ملک بشر یوسفزئی
__
حوالہ : منہ بندغ تاریخ مریرہ……آغا نو رمحمد غلزئی
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
