بلوچستان کے ضلع ہرنائی میں فائرنگ سے مقامی کوئلہ کان کا ٹھیکیدار ہلاک اور ایک مزدور زخمی ہوگیا۔
پولیس کے مطابق واقعہ گزشتہ رات کالب لیز کول مائن ایریا میں پیش آیا جہاں ٹھیکیدار سرور کاکڑ کو نامعلوم مسلح افراد نے اغواء کرنے کی کوشش کی۔ اس دوران ٹھیکدار نے مزاحمت کی جس پر مسلح افراد نے فائرنگ کر دی اور فرار ہوگئے۔
فائرنگ کے نتیجے میں ٹھیکیدار سرور کاکڑ موقعے پر ہلاک اور ایک مزدور زخمی ہوگیا۔
واقعے کی اطلاع ملتے ہی پولیس کی بھاری نفری نے موقع پر پہنچ کر لاش اور زخمی کو ڈی ایچ کیو اسپتال منتقل کیا جہاں ضروری کارروائی کے بعد لاش ورثاء کے حوالے کر دی گئی جبکہ زخمی مزدور زیر علاج ہے۔
پولیس حکام کا کہنا ہے کہ واقعے کی تحقیقات جاری ہیں جبکہ اغواء کاروں کی گرفتاری کےلیے چھاپے مارے جا رہے ہیں۔
