احوالکار: نجیب سائر
آماچ ادبی دیوان (رجسٹرڈ) مستونگ نا پارہ غان کوئٹہ پریس کلب اٹ اسہ دے ئی سیمینار اس ہڈتننگا۔ سیمینار اِرا بشخ آ تالان ئس، اولیکو بشخ ئٹ کتاب آتا مون پاشی و ارٹمیکو بشخ ئٹ مشاعرہ ہڈ تننگا۔ تلاوت کلام پاک نا شَرف ءِ ہدایت فدا دوئی کرے۔
آماچ ادبی دیوان 19-2018 ئٹ دئے کتاب شینگ کرینے، دا کتاب آتیا جتا شخصیت آک تبصرہ کریر۔ عبدالرزاق ابابکی نا افسانہ غاتا کتاب ’’بے بندغی‘‘ آ پروفیسر غمخوار حیات، حسن ناصر نا افسانہ غاتا کتاب ’’چیہانٹ’’ آ یوسفی بلوچ، محسن فگار نا شاعری ’’آزڑدہ‘‘ غا احمد نعیم، حمید عزیز آبادی نا ’’براہوئی بلوچی زبانے کنا‘‘ آ رزاق ابابکی، احمد نعیم نا بوگ شوگی شاعری کتاب ’’الف ب‘‘ آ اکبر ساسولی، افضل مراد نا کتاب ’’کنا رومی‘‘ آ پناہ بلوچ، ’’سِخت‘‘ آ محسن فگار تینا خیال آتا درشانی ءِ کریر۔
شاعری و نثر نا کتاب آتیا خیال آتا درشانی ءِ کریسہ اوفک دا کتاب آتے براہوئی ادب اٹ گچین ءُ مڈی اس پاریر و نوشتہ کار آتا کاریم تے صفت نالائخ پاریر۔
ارٹمیکو بشخ ئٹ ثمینہ کنول بلوچی خلقی شئر اس پارے و اندن منہ شاعر اُردو و ایلوفک براہوئی شاعری بنفیر۔
شاعری آتیٹ نور خان نواب، ڈاکٹر سلیم کرد، رحیم ناز، عبدالقیوم بیدار، عارف ضیا، غلام نبی صیاد، راشد جانان، خواجہ زہیر، اعجاز سنگت، اطہر حسین، شاہ محمد عاجز، نصیر احمد گل جی، حیدر حسرت، شکور شہزاد، صیاد بلوچ، محمد ایوب دلسوز، سلیمان بلسم بلوچ، مدثر، احمد نعیم، ہدایت فدا، سید صغیر، یوسفی بلوچ، افتخار کاشف (پنجاب)، شمس شمسی، فرمان بشر، عالم نسیم، غریب شاہ انجم، عزیز اللہ آزاد، لطیف شہزاد، حسن عاجز، سعید کرد، گل زماں گل، عطا انجم، ساحر عزیز، ایوب صیاد، قاسم اسیر، حمید عزیز آبادی، نذیر حسرت، بشیر احمد شاد، ضیاالحق فراز، شہزاد غنی، نظام اسیر، بابل نسیم، محسن فگار، رحیم دانش، صابر ندیم، اکبر شاکر، شاکر ندیم و ایلوفک اوار ئسر۔
آماچ ادبی دیوان نا سروک حاجی شاہ بیگ شیدا تظیم نا کاریم تا بابت ہیت کرے و تینا سنگت آتا کاریم تے گچین گوندا۔ او پارے کہ اوفتا تنظیم دا وخت اسکان 25 کتاب شینگ کرینے، نہ بیرہ مستونگ بلکن مچھ، کوئٹہ و ایلو علاقہ غاتا ادیب آتا کاریم تے مونا ہتنگانے۔ شاہ بیگ شیدا اُست ہسونی نا درشانی ءِ کریسہ پارے کہ دا تنظیم ءِ حکومت نا پارہ غان ہچو کمک اس گرانٹ نا دروشم اٹ دا وخت اسکان رسینگتنے۔
مجلس ئٹ بلوچستان یونیورسٹی براہوئی ڈپارٹمنٹ نا چیئرمین لیاقت سنی، براہوئی ادبی سوسائٹی نا سروک قیوم بیدار، ریجنل ڈائریکٹر اکادمی ادبیات افضل مراد، بلوچی اکیڈمی نا چیئرمین ممتاز یوسف و گچین آ مہمانک تینا خیال آتا درشانی ءِ کریر۔
مجلس ئٹ تیوہ غا نوشتکار، جتا آ شخصیت و ادبی گَل آتے ٹیکی (ایوارڈ) تریسہ شَرف تننگا۔
یاتی مرے اولیکو بشخ ئنا صدارت ءِ آماچ ادبی دیوان نا چیئرمین حاجی شاہ بیگ شیدا کرے و گچین آ مہمان سیکرٹری لائیو اسٹاک دوستین جمالدینی ئس۔ مشاعرہ نا صدارت ءِ آماچ ادبی دیوان نا سیکرٹری جنرل رحیم ناز و گچین آ مہمان ایم پی اے اختر حسین لانگو ئس۔
اولیکو بشخ ئٹ مجلس ءِ آماچ ادبی دیوان نا حسن ناصر مونی درے و مشاعرہ نا اسٹیج سیکرٹری براہوئی بولی نا پنی آ ادیب و شاعر غمخوار حیات ئس۔
مجلس ئٹ زالبول و نرینہ غاتا بھلو کچ اس بشخ ہلک، دُن صوب نا یانزدہ بجہ غا بناء مروکہ دا زیبا غا مجلس نن نا ہشت آ ایسر مس۔
