حوال: نذیر شاہوانی
راہشون ادبی دیوان نا پارہ غان ’’سوشل میڈیا نا بندغی زند آ اثرات آک‘‘ نا سرحال تون اسہ دے ئی ٹریننگ نا مجلس اس ساراوان ڈیجیٹیل لائبریری مستونگ ٹی ہڈ تننگا، ہراٹی بھلو کچ اسیٹی خوانندہ غاک، سیاسی و چاگردی باسک آک بشخ ہلکر۔
مجلس ئٹ سلطان ترین سوشل میڈیا نا جوان و گندہ بشخ آتا بابت ٹریننگ تس۔ دا وخت راہشون ادبی دیوان نا سروک و بلوچستان یونیورسٹی ٹی براہوئی ڈیپارٹمنٹ نا چیئرمین ڈاکٹر لیاقت سنی، راہشون نا چیئرمین بسمل بلوچ، مرکزی جنرل سیکرٹری محمد حسنین شاہوانی، مرکزی فنانس سیکرٹری رشید بلوچ، اسسٹنٹ لائبریرین سراوان لائبریری علی بلوچ، بلوچستان نیشنل پارٹی نا ضلعی ڈپٹی سیکرٹری میر یحییٰ رستم زئی، آغا رحمت شاہ، عمران رند و افتخار احمد آبیزئی ساڑی ئسر۔
دا وختا سلطان ترین معلومداری تریسہ پارے کہ ہراڑے سوشل میڈیا نا جُوان یا گچین ءُ اثرات ارے تو ہموڑے اونا گندہ یا بد ءُ اثرات ہم ساڑی ءُ، سوشل میڈیا آن کاریم ہلنگ ننا دوٹی ءِ کہ نن اوڑان معلومداری و پوسکنا علمی پٹ ءُ پول آتے اسکان سرمننگ کین اگہ دانا گچین آ اثرات آتیا چمشانک اس شاغنگے تو سوشل میڈیا نا سوب آن جہان گلوبل ولیج اٹ مٹ مسونے تیوی جہان آن زوت آن زوت معلومدار مننگ مریک، تعلیمی و سائنسی پٹ و پول، جان جوڑی و اخبار آک، مخلوق ءِ زوتس کمک کننگ نا بابت اُوننگ ءِ تو سوشل میڈیا نا سوب آن منٹ آتیٹ دوئی مننگ کیک ولے اگاں دانا گندہ آ اثرات آتیا چمشانک اس شاغنگے تو نن تینا اُرا بندغ آتیان ہم مُر مسونن، نن داڑا فائدہ ارفنگ نا جاگہ غا فیس بک، واٹس ایپ، ٹوئٹر و ایلو ایپس آتیا رَد و گڑا رادہ کریسہ تینا قیمتی آ وخت ءِ بائفنگ اُن و کتاب آتیان بھاز مُر مسونن، ننا چناک تیوہ غا نن سوشل میڈیا غا مشغول مریرہ تیوہ غا نن سما مننگ آن اوفتا تغ پورہ مفک ہرا ناجوڑی نا سوب مریک۔ داڑان بیدس اگاں اوننگے تو مجلس و دیوان آتیٹ ہرکس تینا موبائل تون وخت تیر کیک۔
مقررین تیٹ ڈاکٹر لیاقت سنی، سلطان ترین، محمد حسنین شاہوانی، علی بلوچ، بسم اللہ بلوچ و ایلوفک پاریر کہ سوشل میڈیا نا تجارتی، سیاسی و ایلو مسخت آتیکن گچین کاریم ہلنگ مریک و سوشل میڈیا کن وخت تخنگے کہ ننا زند آ اونا گندہ اثرات تمیپ۔
مجلس نا ایسر ئٹ راہشون ادبی دیوان نا سروک ڈاکٹر لیاقت سنی، اسسٹنٹ لائبریرین علی بلوچ و ماسٹر ٹرینر سلطان ترین بشخ ہلوک آتیٹ سند بشخار۔
