ھوناں میچلِیں بانور۔۔۔
اِمُل بلوچ
دی بلوچستان پوسٹ
آئی ءَ پہ شانے وتی مِسک درنزیں ملگور رستگ اِت اَنت ءُ پہ ناز آدینک ءِ دیم ءَ نشتگ ءُ بچکندگ ءَ اَت، مدام ھمے ھیالاں مان گیش اِتگ ءَ کہ اے نوکیں زند باریں چوں بیت۔ گوں ھمے ھیال ءَ آئی جان ءِ تہ ءَ ترسے ودان اَت ۔ ھمے ساھت ءَ آئی ءِ آروس ءِ ڈُھل ءُ سازانی زیمریں توار ءَ سرجمیں میتگ سر ءَ زرتگ اَت۔۔۔۔۔۔۔۔۔۔
دیگر ءَ رولہ ءِ زیبائی میزان میزان ءَ ھَلاس بُوَان اَت ءُ آ ھمے مارگ ءَ اَت کہ گوں بیگاہ ءِ اِیرھت ءَ نوکیں زند ءِ وشی آئرا امباز کنگ ءَ اَنت۔۔۔۔
آئی ءَ ھمے ساھت ءَ چہ وتی کش ءَ ایریں پَرس ءِ تہ ءَ گوانکو کش اِت ءُ دیم ءِ اکس ءَ چارگ ءَ لگ اِت۔۔۔۔۔۔۔۔آ ھمائی ءِ اکس اَت کہ اے گُڈّی شپ اَت کہ آیانی تھنا ھَلاس بوَگ ءَ اَت ۔۔۔۔۔۔یکے دومی ءِ زند ءِ بھر بوَگ ءَ اِت اَنت۔۔۔۔۔۔ آ اکس ءَ انچو چارگ ءَ اَت کہ مردم گُش اِیت آ گوں اکس ءَ گپ کنگ ءَ اِنت،چیاکہ آ اکس اے ساھت ءَ تھنا یک اکسے نہ اَت، بلکیں آ اے ساھت ءَ اکس ءِ توک ءَ اِیر بُکّ اِتگ اَت ءُ گوں آئی ءَ لھمیں توارے ءَ گپ کنگ ءَ اَت، آ وتی آؤکیں زند ءِ بابت جیڑگ ءَ اَت ءُ ھمے گپ کنگ ءَ اَت کہ آروس ءَ پد آئی ءِ زند چوں بیت۔۔۔۔۔۔ آئی ءَ گوں اکس ءَ گپ ھمے ھاتر ءَ بندات کتگ اَت کہ اے ساھتاں مئے دوھینانی زند تھنا یکّے ءُ زند اِنت، بلے اے شپ ءَ پد مئے زند تھنا منی ءُ تئی نہ بیت،بلکیں مئے دوئینانی زند یکّے بیت! ھمک درد ءُ رنج، ھمک وشی ءُ گم دوئیناں ھوار گْوازینگ لوٹ اِیں۔۔۔۔۔ آئی ءَ پد ءَ کندگے جت ءُ پہ مھر گُشت” کہ من بے ھیال بوت آں، منی دل ءِ واھشت ءُ ارمان ھمیش اِنت کہ من ءُ تو چہ جن ءُ مردی ءَ پیسر بائد اِنت سنگت بِہ بہ اِیں ، چیاکہ سنگتی ءِ سیادی مُھکم اِنت ۔ آ مئے جن ءُ مردی ءِ سیادی ءَ سند ءُ سیل ءَ نیل اِیت۔۔۔۔۔۔۔۔۔۔پمیشکا مارا سنگتی ءِ ساد مُھر دارگی اِنت ۔
آ گوں اکس ءَگپ کنگ ءَ اَت داں ھمے ساھت ءَ لوگ ءِ دورازگ ءِ توار ءَ آئی ءَ را پچلرزینت۔۔۔۔۔۔۔ آئی ءَ کہ وھدے چم چست کت ءُ چارت داں آئی ءِ مستریں گْوھار اُوشتاتگ ءُ گوں آئی ءِ نیم چمّی ءِ چارگ ءَ ھوار مستریں گْوھار ءَ دِرّائینت” اگاں تو جاڑی ئے گّڑا سرجمیں مھمان اتکگ اَنت ءُ جھل ءَ پہ تئی چارگ ءَ وداریگ اَنت کہ بانور کد کیت، ما آئی ءِ دیدار ءَ بہ کن اِیں۔
آ گوں ھمے گپّاں بے چِڑکّہ گْوھار ءِ ھمرائی ءَ جھل ءَ شُت کہ ھال ءِ تہ ءَ سرجمیں سیاد ءُ وارس مُچ اِت اَنت ،گل ءُ شادانی اَت ۔ سیاد ءُ وارس ھمساھِگ ءُ مردماں مراد بادی دیان کُت، گونڈو ھال ءِ کُنڈے ءَ پہ گل ءُ وشی لیب کنگ ءَ اِت اَنت ءُ دومی نیمگ ءَ چار پیریں کماش وت ما وت دیوان اَت۔ وشیانی اے ساھت ءَ ھرکس گوں یکّے دومی ءَ وتی آروس ءِ گپاں کنگ اَت ، گُش ئےآ مروچی دُبر سالونک بوتگ اَنت۔۔۔۔۔۔
دزگْوھاراں بانور ءِ گوش ءِ تہ ءَ سُک سُک ءُ گلاگ زورگ بندات کتگ اَت۔ سرکاڑیں جنک ھرکس پہ وتی اے روچ ءَ ھیالانی تہ ءَ گار اِت اَنت، ھمے میان ءَ سوگات دَیگ مھلونک ءَ بندات کت،سرجمیں مھلونک پہ گل ءُ شات بانور ءَ امباز کنگ ءَ اَت ،بانور پہ بچکندے آیانی دستاں چُکّگءُ سوگاتاں زورگ ءَ اَت ۔۔۔۔۔۔۔
ھمے ساھت ءَ سرجمیں نِدارہ مٹ بوت ءُ دُمبالے ترکّ اِت ءُ آئی توار ءَ سرجمیں دمگ سر ءَ زُرت، چہ اے توار ءَ پد تانسریں نِدارگ شپ ءِ تھاری ءَ وتی امبازاں زُرت ءُ شادِئی گوں گریوگ ءُ زاری ءَ بدل بوت۔۔۔۔۔۔۔۔۔۔۔ھرکس ماں کُنجے ءَ وتی جند ءِ شوھاز ءَ درکپت۔ ھمے ساھت ءَ بانور ءِ چم وتی دیما ءَ ھما دوئیں دستاں کپت اَنت کہ ساھتے ءَ پیسر آئرا سوگاتے داتگ اَت۔۔۔۔۔۔ (دست چہ بندن ءَ جتا اِنت ءُ بالاد جُتا) بانور ءِ دیم ءَ کپتگ اِت اَنت۔۔۔۔۔۔۔ تانسریں ھال بے وسی ءِ چنکّاں دوزھیں نِدارگ ءِ باھوٹ اَت،ھمُک دیم ءَ گریوگ ءُ زاری۔۔۔۔۔۔۔۔۔۔دِگہ ھچ۔۔۔۔۔۔۔۔بس مودگ ءِ ابیتکیں زیمر ساز اِت۔۔۔۔۔۔۔۔۔۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
