گواچنی ہیت ہندنے
نوشت: شئے رحمت بلوچ
دی بلوچستان پوسٹ
جہان نا تہٹی بنی آدم ءِ بھلو قدر ئس ارے انتیکہ بنی آدم ءِ سوچنگ سمجنگ پوہ مرینگ،عمل کرنگ،ہیت کرنگ و پین گنجاتا لائخی آن رب زمینے بخشا۔ و انسان نا شرف کُل مخلوق آتیان زیات ءِ انتیکہ انسان نا ملی کُل مخلوق آن زیات کاریم کیک، تینا ہردے ناخواست آتیکن ہزاراتا طریقہ آتے کاریم ٹی ہتیک اونا تولنگ بش مرنگ اونا چرنگ اونا ہیت کرنگ او تینا سیال وارث نا چائنگ مہر کرنگ او کُلءِ گڑا تے رب بشخانے تا، بلکن ای کُل ءِ بیان کرنگ کپر۔
ولے اینو نا زمانہ ٹی ہندو نو اُست پرغوکو جغر کپ کروکو دور اس بسونے کہ ہیت کرنگ گناہ جوڑ مسونے، حق ئنا ہیت ئنا بننگ گناہ جوڑ مسونے، اینو دُنو حالیت اس بسونے کہ ابن آدم نا زیہا ابن آدم ظلم کرنگ ئٹی ءِ۔
اینو اگہ اسٹ تینا قوم ئنا نمائندگی ءِ کیک، او ہلنگ و خلنگ مریک۔گواچن آن اینوجہان بھاز مُر ہنانے اگہ دُن مفروس گڑا کنا خیالا تینا حق ئنا خواہوک بے دردی ئٹ کسفنگتوکہ یا ہلنگ ٹارچر سیل آتے ٹی بند متورا۔ اینو جہان ام دا گڑا تے جوان چاہک کہ گناہ گار دیرے و بے گناہ دیرے ولے ہر کس اسیکہ تینا مفادے اُریک دوارہ گپ کیک و عمل کیک۔
نن اخس ام پان کہ بندغی حق ئنا ہیت حق ئٹ مریک ولے باز کم ءِ کہ اینو کس اسٹ ایلوڑ کن گپ کے۔ او نا حق ئنا ہلنگ کن اونا کُمک کیک ولے ننے دا ہم گڑا اُروئی ءِ کہ جہان نا تہٹی ہرا تینا حق اکن جہد کروکائے اسٹ کُمک کرینے۔ اینو اگہ گواچنی دُن مروس گڑا کردآک تینا ڈیہہ ئنا خواجہ تینٹ ئسر، فلسطین ئٹی انسانی جان آتیکن کس گچین وڑ اٹ ہیت کریکہ، افغانستان غزنی ٹی جنگ مریک ۰۲۱آن زیات پاکستانی ریاستی بندغ مریرہ ہمو کہ کابل،زیارت کندھار و ایلو جاگہ تا چناتا ساہ ءِ ہلیرہ اوفتیکن کس ہیت کریکہ و پاکستان ءِ گناہ گار پاریکہ۔
نن ہندا جیڑن کہ پاکستان و انڈیا نا نیام تعلق آک خراب مریرہ بلکن انڈیا پاکستان نا کمزور کرنگ کن ننے اخلاقی و مالی کُمک کے۔ اینو بلکن امریکہ سی پیک نا ناکام کرنگ کن ننا جہدے کُمک کے انتیکہ امریکہ خواہیپک کہ چائنا کنے آن زیات جہان اٹ کاروبار کے و پگہ دے کنکے کاٹم خل اس جوڑ مرے انتیکہ چائنا پاکستان آن علاوہ پین ام باز مُلک آتے ٹی کاروبار کرنگے بلکہ ایران افغانستان ننے کُمک کیر انتیکہ ایران و افغانستان ئٹی اخس ام دھماکہ مریک اوفتے ٹی پاکستان پاش تُدے، پین ام آسرہ بازے ہندا وڑ ئٹ۔
ولے افسوز نن ام اسے دے ئس سوچاناکہ ای وطن کے انت کریٹ، کنا جہد ئٹی انت کڑد ئسے، کنے تحریک ئٹی انت کروئی ءِ ہمو کہ ذمہ داری تے کنے سنگت آک تسور اوفتے ای پورہ کریٹ؟ کنے مونا انت کروئیءِ؟ ای گواچنی خنیوا باز آتیٹی نزوری ارے!ولے ای گچینی پاک اُٹ؟ اگہ اینو ننا جہد ئٹی کمزوری ئس مریک،انت ای او کمزوری ءِ ہلنگ کپرہ؟ ای اونا زیا کس ئتو ہیت کننگ کپرہ؟ افسوز کس ئس پاریکہ؛ ”گواچنی ہیت ہندنے! کنے ٹی ام نزوری ارے“۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
