کسانیں نبشتانکے پہ ریھان جان ءَ
نبشتہ کار: سنگت بابل
دی بلوچستان پوسٹ
منی وَ انچوکیں بستارے نہ اِنت کہ پہ ترا چیزے نبشتہ بکناں، بس وتی تٌستگیں دل ءِ مارتگیں ھیالاں گوں کاگزے ءَ سیاہ کنگ لوٹاں،اُپ تئی ھیال کاینت، دل لرزیت جان ءِ مِید ٹال ٹال بیان بنت،دمانے مراں پد ءَ زندگ باں،نزاناں چوں بکناں، تئی کرد ءَ ترا وَ دائم ءَ زندگ کٌتگ، بلے من وتی مٌرتگیں دل ءِ برمشاں چوں بکناں،وتی دل ءَ جیڑاں دمانے گِریواں دمانے کند آں۔
مروچی پد ءَ گٌش ئے تئی سیر ءِ لکیں منگیر ءِ سارتیں سیاھگاں ناچ کنگ ءَ آں، آ وَ تئی شادمانی دائم ءَ برجم اَنت، بلے من گوں وتی زندگیں جون ءَ مٌرتگیں جبین ءَ ھچ نزاناں کَے ءَ ملامت بکناں، تو کہ وت ءَ ندر کٌتگ پہ راج ءُ سرزمین ءِ واھگانی ھاتر ءَ گوں وتی ھوناں ڈگار سیرآپ کٌتک، بلے من انگت پشت کپتگاں۔
من ترا چوں بساڑایاں کہ تئی ساڑاھگ ءَ منی جند ءَ تئی وڑیں کردے کنگ لوٹ اِیت، من وَ دمبرتگ ، من بس وت ءَ گار کٌتگ، بلے تئی سنگت پد ءَ تئی لَڑ ءِ وداریگ اَنت پہ تئی وڑیں کردے ءَ.
تئی کرد ءَ جھان ءَ را پنتے داتگ ءٌ راجی جھد ءَ را دئمی منزل آسر کٌتگ،بلے بژنے کہ من انگت کَر ءٌ کٌور آں، پرچاکہ من بوپ ءٌ بالشتاں، سارتیں کٌڈاں، وشیں وردِناں ویل کنگ نہ لوٹاں۔
بائد انت کہ من چہ ترا مستریں کردے ءَ گوں وت ءَ زندگ بکناں ،بلے نوں من چے کٌت کناں، من چوں ھما ماتاں سلام بکناں کہ وتی زند ءِ دوست تریں بچ ،دوست تریں مڈی ءٌ پیری ءِ کوپگ گوں وتی دستاں دیم داتگ یا راج ءٌ ڈیھ ءَ ندر بیگ ءَ زانتے کہ یکیں دمان ءَ کلیں جھاں بدل بیت ،روت پد ءَ واتر نہ کنت، سد سلام ریھان جان۔
من پد ءَ تئی اکس ءَ گوں وتی دل ءِ زھراں تالان بکناں ءٌ وتی دل ءَ تسلا بدے آں، من چوں سلام بکناں ھما ماتاں کہ وتی دل ءِ بنداں چہ وتی دل ءَ سند اَنت ءٌ ندر کن اَنت، بلے من انگت ھما ماتانی منوگر نیاں، پرچاکہ پہ من اے وڑیں کرد سک باز گران اِنت،وتی زند ءٌ وتی زند ءِ واھشتانی ندر کنگ، منی وس ءٌ واک ءَ نہ انت، سد سلام ھما ماتاں پہ من گوں کلم ءَ اے وڑیں گپ نبشتہ کنگ گران اِنت، بلے پہ آواں ھمے کارانی نبیسگ گوں وتی ھوناں دمانے ءِ کار انت ،من زندگیں مردگے آں، آ دائم ءَ زندگ اَنت،بلے انگت وھد ھست کہ من بزاناں، بہ ماراں کہ من کجا رَداں کہ پشت کپتگاں۔
مروچی ریھان جان ءَ راجی جٌنز ءَ را یک انچیں جاھے ءَ سر کٌتگ کہ مروچیگیں وھد ءَ راج ءِ ھر یک گواندوے، پیر و کماشے، مات ءُ گھارے ریھان جان ءِ اے کِرد ءَ را سلام کنگ ءَ اِنت، چیاکہ ریھان جان ءِ ھمے پیسلہ راجی جٌنز ءِ تہ یک بلائیں مایوسی یے ھلاس کتگ.
گٌڈسر ءَ من ریھان جان ءُ بلوچی راج ءِ ایدگہ کٌلیں شھیداں سُھریں دْروت ندر کن آں۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
