بلوچی اکیڈمی ءِ شستمی (۶۰) سالینہ دیوان اکیڈمی ءِ کماش ممتاز یوسف ءِ پاگواجہی ءَ جم دارگ بوت۔ کارگشاد ظاہر جان جمالدینی ءَ سالینہ کارکردگی رپورٹ پیش کت۔ماںگوستگیں سال ءِ مراگش، چاپ بوتگیں کتاب ، مالی ہرچ ءُ درچ ءِ باروا باسکاناں سرپدی دیگ بوت۔ واجہ ظاہر جان جمالدینی ءَ بلوچی اکیڈمی ءِ ہلاپ ءَ سازش ءُ دروہانی باروا باسکاناں گشت کہ اکیڈمی ءِ ساری ءِ کماش عبدالواحد بندیگ ءَ اکیڈمی ءِ نام ءَ ہمدپیں کاگدی ادارہے جوڑ کتگ ءُ بلوچی اکیڈمی ءِ گرانٹ پُل اِتگ۔اکیڈمی ءِ باسکاں اے گپ ءَ تپاک کت کہ عبدالواحد بندیگ ءِ پندل ءُ سازشانی سوبءَ اکیڈمی نام ءُ دپ بوئگ ءَ انت پمشکہ مجلس ءَ راکڈن کنگ بوت کہ آ عدالت ءُ کچہریءَ بہ رئوت ءُ بلوچی ادبی اکیڈمی ءِ نام ءِ بدل کنگ ءِ جہدءَ بہ کنت۔دیوان ءِ باسکاں اے گپ ءَ تپاک کت کہ ہر کسے کہ اکیڈمی ءَ را نام ءُ دپ کنت، آئی ءِ مال ءُ زرّاں پُلیت یا آئی ءَ را تاوان دنت بائد انت اے وڑیں مردمانی ہلاپ ءَ قانودی کاروائی بہ کنت۔
اکیڈمی ءِ باسکاں سَلاہ دات کہ بلوچی اکیڈمی بلوچی زبان ءِ نبشتہ رہبند ءِ گہتری ءِ باروا گامگیجاں ترند بہ کنت۔ پہ زہگانی وانگ ءُ ہیل کاریءَ کتاب چھاپ کنگ،دری لبزانکانی کلاسیکی کتاب ءُ ساچشت ماں بلوچی زبان ءَ رجانک کنائینگ، بلوچانی جغرافیہ ءُ زبان ءِ سروے ءُ پولکاری کنگ، زبان ءَ را نوکیں ٹیکنالوجی ءَ گوں ہمدپ ءُ ہمگام کنگ ءَ آئی ٹی سیکشن جوڑ کنگءُ غیر سَنَدی پولکاری کنائینگ بہ بیت ءُ اے بابت ءَ انچیں پالیسی جوڑ کنگ بہ بیت ثمردیوک ءُ سوبمند بہ بیت۔
دیوان ءَ لہتیں قرارداد منظور کنگ بوت ۔ ہما لبزانکی ادارہ کہ پہ بلوچی زبان، تاریخ ، دود ءُ ربیدگ ءِ دیمروئی ءَ جہد کنگ ءَ انت ، سرکار آہانی مدت ءُ کمک ءَ بہ کنت۔ سید ہاشمی اکیڈمی گوادر، بلوچستان اکیڈمی تربت، انسٹیٹیوٹ آف بلوچیا گوادر، عزّت اکیڈمی پنجگور ءُ راسکوہ ادبی دیوان نوشکی بازیںوہدے بیت کہ پہ زبان ءُ لبزانک ءَ جہدءَ انت ،پرے ادارہاںسالینہ گرانٹ نامینگ بہ بیت یا آہانی سالینہ گرانٹ ودّینگ بہ بنت۔اے دیوان چہ سرکار ءَ اے لوٹ کنت کہ انچیں کاگدی یا ڈمی ادارہ چوشکہ بلوچی ادبی اکیڈمی پہ ذاتی نپ ءُ فائدگ ءِ گرگ ءَ جوڑ کنگ بوتگ، اے پیمیں زاتی اکیڈمیاں گرانٹ دیگ مہ بیت۔بلوچی اکیڈمی ءِ دیوان چہ سرکار ءَ اے لوٹ ءَ کنت کہ آ اسکول ءُ وانگ جاہاں استیں نصاب ءَ مَٹّ بہ کنت ءُ نوکیں نصاب ءَ بلوچانی راجدپتر ، زبان ءُ دودمان ءَ جوانی ءَ شون بہ دنت۔ بلوچی اکیڈمی ءِ دیوان اے لوٹ ءَ ہم کنت کہ پہ بلوچستان ءَ نصاب ءِ کتابانی ٹاہینگ ءَ بلوچی اکیڈمی ءَ را نمائندگی بہ دنت۔ اے دیوان پنجاب ءِ سروزیر ءِ منّت وار انت کہ آئی ءِ جہدانی برورد ءَ ریڈیو پاکستان ملتان ءَ بلوچی مراگش بندات کنگ بوتگ ۔ اکیڈمی ءِ اے دیوان سرکاری شنگکاری ادارہاں گوں دست بندی کنت کہ کراچی، حیدرآباد ءُ خیر پور ریڈیو اسٹیشناں بلوچی زبان ءَ مراگش بندات بہ کن انتءُ کراچی ٹی وی ءَ بلوچی مراگش بندات کنگ بہ بنت۔
