ڈیھ ءِ مَلنگیں سردو جان
نبشتہ کار :گزین بلوچ
دی بلوچستان پوسٹ
جھان ءِ توک ءَ بے ھساب مردُم گِندگ ءَ کیت بلے ھنچیں لھتیں مردُم ھدا وند جوڑ کَنت کہ آیان ءَ چہ کُلیں انساناں جُتا کنت پرچاکہ آ وتن دوست ،راج دوست ءُ انسان دوستیں مردُم بنت گُڑا آ وتی راجانی رکّینگ ءِ واست ءَ ھمُک سکّیانی دیمپان بنت ۔
مرچی من یک ھنچیں راج دوستیں انسانے ءِ گپ جناں راستی ءَ آ پہ بلوچ ءُ بلوچستان ءِ واست ءَ یک آجوئی ءِ پیگمبرے بوتگ، آئی ءِ ایمانداری ، مُخلصی ءُ بہادری بلوچ ءِجُھد ءَ را یک نوکیں رنگے داتگ، آ تمرّدیں مرد واجہ شھید سردو جان اِنت۔
شھید سردو جان بلوچستان ءِ دمگ آواران مشکے کندڑی ءَ واجہ یار مھمد ءِ لوگ ءَ ودی بُوتگ،
سنگت سردو جان وَتی میٹرک ءِ وانگ مشکے گجّر ءَ دربارت ، دیمتر ءَ سرکار ءَ یک ھیوان ڈاکٹرےءِ نام گِتیںں جوڑ کُتگ گُڑا ھمے وھد ءِ توک ءَ سردو جان یک چیزے مارتگ واکی کہ من گُلامے آں پرچا کہ من چِنکّس مھنت بِکناں چِنکّس دیم ءَ بُواناں مئے بلوچ ءِ کچّ ِکساس اے رستریں ھاکم ءِکرّ ءَ ہمش ِانت پرچاکہ ما زان اِیں اے زور گِیریں ریاست بلوچ ءَ دیم ءَ روگ ءَ ھچبر نیل اِیت کہ بلوچ بوان اِیت ءُ چَمّ پَچ کنت ءُ دُنیا سرپد بیت باندا روچ مارا ھم سرپد بِیت، گُڑا الّم ءَ منی ھِلاپ ءَ پاد کیت آ کُجام وھد ءَ کمو مارت کہ بلوچ ءِ یک چُکّے ونت ءُ در بُرّت، بس آئی ءَ را گار ءُ بیگواہ کنت، پد ءَ آئی ءِ کُنٹ ویرانگیں جاگھے ءَ دست کَپ اِیت چوشکہ شھید آگا آبد شاہ، کامریڈ کیوم جان ،کمبر چاکر، الیاس نزر، شھید واجہ گُلام مھمد، لالا مُنیر، سنگت ثنا جان ، شپی جان ءُ دِگہ بازیں شَھیدانی رنگ ءَ ھمے وھد ءَ بلوچستان ءِ آجوئی ءِ جنگ بِندات بُوتگ اَت، پد ءَ سردو جان 2009 ھم ھمے جنگ ءِ یک بھرے جوڑ بُوت پہ وتی بزّگیں راج ءَ یک جْوانیں کوپگے ءِ ڈول ءَ اُوشتات پہ وتی ڈیھ ءِ راج ءِ رکّینگ ءِ واست ءَ ھر محاز ءَ ھمُک جاہ ءَ دُژمن ءَ را جْوانیں پَنت ءُ سوج ئِے دات کہ بلوچ تَنِنگہ زِندگ اِنت، بلوچانی گیرت زندگ اِنت بلوچ وتی منشا ءَ چہ بگَیر کسّے ءَ را وتی ڈیھ ءِ تہ ءَ پاد ءِ اِیر کنگ ءَ نَیلِ ایت ،بلوچ پیسر ءَ مُرتگ پہ ڈیھ ءُ گیرت ءَ پدا انگت ھم مِریت، اگاں کَسّے وتی گیرت ءَ بھا کَنت پہ دو کلّدار ءَ وتی بِرات کُشی کنا اینیت اے کاروان ءِ ھِلاپ ءَ کنت آ بلوچ ءِ ھم یک دُژمنے ھساب کنگ بِیت ،
سردو پہ دژمن ءَ یک دھشتے ءِ نام بُوت،دُژمن ءِ ھوش ءُ سار پَرّتگ، کدی بلوچستان ءِ ھاک ءَ بیاتّکیں گُڑا گِس پہ ِگس سوج کنان اَت کہ سردو کدی مئے جنگاہ اَتّک مارا ھال بِکن اِت، ما وَتی راہ ءَ مٹیّن اِیں، پرچاکہ آئی ءِ دِل ءَ سردو ءِ وھم ءُ بِیم ھمِنچو ایر کپت اَت کہ نہ آئی ءَ را واب نہ کہ آرام اَستگ اَت ،بلوچ ءِ مات ھروچ سردو ءِ پیمیں بَچّ پیدا کن اَنت، بلے مئے اِیمان اِنت کہ ما وتی ڈیھ ءِ آجوئی ءِ واستءَ چو سنگت سردو جان ءُ آدگہ شھیدانی پیم ءَ پد نکِنز اِیں، وتی سراں ندّر کن اِیں،
گُڈّی ءَ شھید سنگت سردو جان وتی زگریں ھون پہ وتی ڈیھ ءُ کوم ءِ واست ءَ رِتک اَنت،
شھید سردو جان آواران ءِ دَمگّ مشکئے تنک چُٹّوک ءَ 13 دسمبر 2015 ءَ ریاستی ڈیتھ اِسکواڈ ءُ پاکستانی پوج آئی ءِ راہ ءَ پیسر ءَ بَستگّ سردو جان ءَ گوں دگہ یک سنگتے ءَ شھید ئِے کن اَنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
